Hosea 10 - Tshwa Bible

A ku khozela zifananiso ni kutsayiswa.

¹ Israeli i vina wu tlhumileko nguvu, wu pswalako mihanzu. I anzisile a maalati yakwe maringano ni wunyingi ga mihanzu yakwe; laha a misava yakwe yi nga enzeleka ku nona, hi kona a nga engetela kusaseka ka zifananiso.

² A timbilu tabye ti khohlakele, hikwalaho va ta koneka. Nungungulu i ta khungumula a maalati yabye, a wisa zifananiso zabye.

³ Hizinene vona ta taku: A hi na hosi, lezi hi nga chaviko Jehova; kanilezi a hosi yi nga hi vuna yini?

⁴ Va wulawula magezu ya hava, va hlambanya hi mawunwa loku va maha xivumelwano. Hikwalaho a kulamula ku ta mita khwatsi nyakhwari a milako lomu miseleni ya masimu.

⁵ A vaaki va le Samaria va ta chava hi kota ya role ga le Betavene; hakuva a vanhu va kona va ta gi rilela, ni vapristi va gona va ta rurumela hakuva a wukosi ga gona gi sukile.

⁶ Va ta gi fambisa le Assiria, gi yava xinyikiwo ka hosi Jarebe. Efraime i tawa tingana, na Israeli i tava ni tingana hi kota ya wusungukati gakwe.

⁷ Samaria i file, a hosi yakwe yi khwatsi i khuvi gi nga hehla ka mati.

⁸ Ku ta lobyiswa ni matshamu ma tlakukileko ya le Aven ma nga xionho xa Israeli. A mizwa ni zigetlwani zi ta mita lomu maalatini yabye; zonake va taku ka zitsunga: Hi khubhunyeteni! Vaku ka miganga: Welani hehla ka hina! Isa. 2:19; Lu. 23:30; Kuv. 6:16

⁹ Israeli, u onhile kusukela masikwini ya Gibea. Va lo yima laho, kasi a yimpi yi vukelako a vakubiha yi nga va kumi le Gibea. Vala. 19:22

¹⁰ Nzi ta va tsayisa ni xihi xikhati nzi xi ranzako; a matiko wontihe ma ta tsombana ma va vukela, ni ku va boha zihambunyetweni zabye za zimbiri.

¹¹ Efraime i thokazi legi gi gonzisilweko, gi ranzako ku hula mavele: kanilezi nzi vekile muyoko nhanwini ya gona yo saseka. Nzi ta veka mukhileli hehla ka Efraime; Juda i ta rima, na Jakobe a fayetela marukwani. Deut. 25:4; 1 Kor. 9:9

¹² Ti byaleleni hi kululama, mu tshovela hi wuxinji; rimani wuhlavi ga nwina, hakuva makunu xikhati xa ku hlota Jehova, kala a ta mu nisela kululama.

¹³ Mu rimile kubiha, mu tshovela kugoha; mu gile a mihanzu ya mawunwa, hakuva u tsumbile a ndlela ya wena, ni wunyingi ga tinhenha ta wena.

¹⁴ Ku ta huma pfilupfilu xikari ka vanhu va wena, a makhokhola ya wena wontihe ma ta khungumulwa, kota lezi Xalmani a nga khungumula Bet-arbeli hi siku ga kulwa, laha a vamamani va nga pswandlaswa zinwe ni vanana.

¹⁵ Nwina mu ta mahelwa zalezo le Beteli hi kota ya kubiha ka nwina ka hombe. Ni mixo a hosi ya ka Israeli yi ta lobyiswa bhi.