Hagai 1 - Tshwa Bible

A kuaketwa ka tempeli.

¹ Hi lembe ga wumbiri ga kufuma ka hosi Dariusi, hi hweti ya wuntlhanu ni yinwe, hi siku go ranga ga hweti, ku lota a mhaka ya Jehova hi nomu wa muprofeti Hagai ka Zerubabeli a nʼwana Xealtieli, a mwamangulu wa le Juda, ni ka Joxua a nʼwana Jehozadaki, a mupristi wa hombe, yiku: Lu. 3:27

² Jehova wa tiyimpi i ngalo: A vanhu lava ve ngalo: A xikhati a xi se chikela xa ku aka ha xona a yindlu ya Jehova!

³ Zonake a mhaka ya Jehova yi lota hi nomu wa muprofeti Hagai, yiku:

⁴ Xikhati xa kuva mu tshama lomu ka tiyindlu leti a makhurisi ya tona ma mehelweko hi mapulangu, na leyi yindlu yi hahlukile ke?

⁵ Hikwalaho Jehova wa tiyimpi i ngalo: Ehleketani hi tindlela ta nwina!

⁶ Mu byalile nguvu, kanilezi mu tshovele zitsongwani; maga, kanilezi a mu xuri; manwa, kanilezi a mu kolwi; ma fenengela, kanilezi a mu kufumeli; loyi a tirelako hakhelo i hakhela ku yi chela lomu xikhwameni xi bhoxekeleko.

⁷ Jehova wa tiyimpi i ngalo: Ehleketani hi tindlela ta nwina!

⁸ Kanzihani xitsungeni mu ya tsema timhanze, mu ta aka a yindlu; zonake nzi ta yi tsakela, ni kambe nzi ta dumiswa, ku wula: Jehova.

⁹ Mu wa cuwukela zo tala, kanilezi mu kumile zitsongwani; ni laha mu nga zi neha kaya nzi lo zi buveta. Hikuyini, ku wula Jehova wa tiyimpi. Hi kota ya yindlu ya mina yi hahlukileko, laha a munwe ni munwani wa nwina a hatlisako ku aka a yindlu yakwe.

¹⁰ Hikwalaho a tilo gi alile ni nzhokati ya gona, ni misava yi alilea mihanzu ya yona.

¹¹ Nzi nehile kubalela hehla ka tiko, ni le hehla ka zitsunga, ni le hehla ka mavele, ni le hehla ka vinya, ni le hehla ka mafura, ni le hehla ka zontlhe lezi zi humako misaveni, ni le hehla ka vanhu, ni le hehla ka zihari, ni le hehla ka mitiro yontlhe ya mandla ya nwina. 1 Tih. 17:1; 2 Tih. 8:1; Has. 2:18

¹² Zonake Zerubabeli a nʼwana Xealtieli, na Joxua a nʼwana Jehozadaki, a nga hi mupristi wa hombe, ni misalela yontlhe ya vanhu, va lo ingisa a gezu ga Jehova a Nungungulu wabye, ni timhaka ta muprofeti Hagai, khwatsi hilezi Jehova a Nungungulu wabye a mu rumileko; zonake a vanhu va lo chava Jehova.

¹³ Zonake Hagai, a ntsumi wa Jehova, i lo wulawula ni vanhu kota lezi a leletelweko hi Jehova, aku: Nzi na nwina, ku wula Jehova.

¹⁴ Jehova i lo vuxa a moya wa Zerubabeli a nʼwana Xealtieli, a mwamangulu wa le Juda, ni moya wa Joxua a nʼwana Jehozadaki, a mupristi wa hombe, ni moya wa yontlhe misalela ya vanhu, lezaku vata va ta sangula ku aka a yindlu ya Jehova wa tiyimpi, a Nungungulu wabye,

¹⁵ hi siku ga 24 ga hweti ya wuntlhanu ni yinwe, hi lembe ga wumbiri ga kufuma ka hosi Dariusi.