Genesisi 9 - Tshwa Bible

¹ Na Nungungulu i lo katekisa Noa ni vana vakwe, aku ka vona: Pswalani mu anza, mu tata misava.

² A zihari zontlhe za laha misaveni, ni tontlhe tinyanyani ta tilo, zi ta mu chava, zi rurumela mahlweni ka nwina; ni zontlhelele lezi zi makanyako laha misaveni, ni zidluwani zontlhelele za bimbi zi nyikilwe mandleni ya nwina.

³ A zilo zontlhe lezi zi fambako, zi hanyako, zi tava kuga ka nwina; nzi mu nyika zona kukotisa lezi nzi mu nyikileko a zibyalo zontlhe zo nyuka.

⁴ Kanilezi a nyama leyi yi nga ni wutomi, gi nga wona nkhata, mu ngagi. Levi 17:10; Miti. 15:20

⁵ A nkhata wa nwina, wu nga kuhanya ka nwina, hakunene, nzi ta wu rihisa mandleni ya zihari zontlhe, nzi ta wu rihisa ni le mandleni ya vanhu; nzi ta rihisa wutomi ga vanhu, a ka munwe lomu canjeni ga munwani.

⁶ Loye a halatako a nkhata wa munhu, a nkhata wakwe wu ta halatwa hi munhu; hakuva Nungungulu i lo maha vanhu hi mufananiso wakwe. Mat. 26:52; Kuv. 13:10

⁷ Pswalani, mu anza; tatani misava mu enzeleka ka yona.

⁸ Nungungulu i lo wulawula ka Noa ni ka vana vakwe, aku:

⁹ Langutani, nzi ta tiyisa a xivumelwano xa mina zinwe na nwina, ni pswalo wa nwina anzhako ka nwina;

¹⁰ zinwe ni zilo zontlhe lezi zi hanyako zi nga na nwina: a tinyanyani ta tilo, ni zifuyo, ni zihari zontlhe za khwati zi nga na nwina; zontlhelele lezi zi nga huma hi lomu tarwini, ku kala ka zontlhe zihari za misava.

¹¹ Nzi ta tiyisa a xivumelwano xa mina zinwe na nwina; cima ku nga ta lobyiswa a nyama yontlhe hi mati ya ntalo; cima ku nga ha tava kona kambe a ntalo wo onha a misava.

¹² Nungungulu i te ngalo: Lexi xi tava xiwoniso xa xivumelwano, nzi xi yimisako xikari ka mina na nwina, ni ka zivangwa zontlhe zi hanyako zi nga na nwina, ku kala kupinzuka:

¹³ nzi ta yimisa a wura ga mina le marefini, giva xikombiso xa xivumelwano xikari ka mina ni tiko.

¹⁴ Ku taku loku nzi neha marefu hehla ka misava, na wura gi woneka marefini,

¹⁵ nzi ta alakanya a xivumelwano xa mina xi nga xikari ka mina na nwina ni ka zivangwa zontlhelele zi hanyako; a mati ma nga ta ha maha a ntalo wa ku lovisa a nyama yontlhe.

¹⁶ A wura gi tava marefini, nzi ta gi cuwuka, nzi alakanya a xivumelwano xa pinzukelwa, xi nga xikari ka Nungungulu ni zivangwa zontlhe za tontlhe tixaka ta nyama yi nga misaveni.

¹⁷ Nungungulu i te ngalo ka Noa: Lexi hi xikombiso xa xivumelwano, nzi xi yimisileko xikari ka mina ni nyama yontlhe yi nga kona laha misaveni.

Xemi a katekiswa.

¹⁸ Ni vanana va Noa lava va nga huma hi lomu tarwini, hi Xemi, na Hamu, na Jafete; Hamu hi yena raru wa Kanani.

¹⁹ Lava vanharu va wa hi vana va Noa, ku humile hi ka vona vontlhelele lava va hangalakileko misaveni.

²⁰ Na Noa i lo maha murimi wa misava, i lo ranga a byala xivini;

²¹ i lonwa a vinya, a popiwa; i lo etlela na a hi ximbyiri, lomu tendeni gakwe.

²² Na Hamu a raru wa Kanani i lo wona a wumbyiri ga raru wakwe, i lo ya byela vamakabye vakwe va vambiri va nga wa hi lahandle.

²³ Xemi na Jafete va lo teka nguwo, va yi tlhateka makatleni vona vambiri, va lo famba ha xinzhakwani, na tinghohe tabye va cuwukile le nzhako, cima a va wonangi a wumbyiri ga raru wabye.

²⁴ Laha Noa na a vukile hi le kupopiweni, i lozwa lezo zi nga wa mahilwe hi nʼwana wakwe loyi wa nzisana.

²⁵ I te ngalo: I rukatelwe Kanani. I ta kuva a nanza ga malanza ka vanakulobye.

²⁶ Kambe i te ngalo: I katekisilwe Jehova Nungungulu wa Xemi; Kanani i ta kuva nanza gabye.

²⁷ Nungungulu i ta kulisa Jafete, A tshama matendeni ya Xemi; Kanani i ta kuva a nanza ga bye.

²⁸ Anzhako ka ntalo Noa i lo hanya 350 wa malembe;

²⁹ ni wontihe masiku ya Noa ma wa hi 950 wa malembe, zonake i lofa.