Genesisi 7 - Tshwa Bible

¹ Zonake Jehova i te ngalo ka Noa: Enghena lomu tarwini, wena ni nghamu ya wena yontlhe; hakuva nzi ku wonile na u lulamile mahlweni ka mina ka lexi xizukulwana,

² ka zontlhelele zihari lezi zi hlazekileko u ta teka ka zona ntlhanu ni mimbiri mipatswa, matsune ni kati; ni ka zontlhelele zihari lezi zi nga hlazekangiko u ta teka zimbiri, matsune ni kati wakwe. Levi 11:2

³ Ni ka tinyanyani ta tilo u ta teka ntlhanu wa mipatswa ni mimbiri, matsune ni kati; kasi u hlayisa a mbewu nghoheni ka yontlhe misava.

⁴ Hakuva hi nzhako ka ntlhanu wa masiku ni mambiri nzi ta nisa a vula misaveni a 40 ya masiku ni wusiku ga kona; zontlhe zi hanyako nzi zi mahileko nzi ta zi lovisa a nghoheni ya misava.

⁵ Na Noa i lo maha zontlhe lezo Jehova a mu layileko zona.

⁶ Noa i wa hi ni 600 wa malembe laha a ntalo wa mati wu ngata misaveni.

⁷ Noa i lo enghena lomu tarwini, ni vana vakwe, ni sati wakwe, ni vasati va vana vakwe, hi kota ya ntalo.

⁸ A zihari lezi zi hlazekileko, ni zihari lezi zi nga hlazekangiko ni zilo zontlhe zi makanyako misaveni,

⁹ zi lo enghena hi mipatswa lomu tarwini, matsune ni kati, kota lezi Nungungulu a nga layile Noa.

¹⁰ Na ku mahisile lezo hi nzhako ka ntlhanu wa masiku ni mambiri a mati ya ntalo ma lo chikela misaveni.

¹¹ Hi lembe ga wu 600 ya kuhanya ka Noa, hi hweti ya wumbiri, hi siku ga wuntlhanu ni mambiri, hi siku lego a zibuka zontlhe za kueta loku ka hombe zi lo vululeka, ni tinyangwa ta tilo ti lo vululeka, Joba 38:16

¹² yi lona laha misaveni 40 ya masiku ni 40 ya wusiku.

¹³ Gwalego siku i lo enghena lomu tarwini Noa, na Xemi, na Hamu, na Jafete a vana va Noa, ni sati wakwe, ni vasati va vana va Noa va vanharu.

¹⁴ Vona ni zihari zontlhelele hi tixaka ta zona, ni zifuyo hi tixaka ta zona, ni zontlhelele zi kokakokako laha misaveni hi tixaka ta zona, ni tinyanyani tontlhelele hi tixaka ta tona, ni tinyanyani tontlhe ta ti tsongwani ta tixaka ti hambeneko.

¹⁵ Zi lo enghena na Noa lomu tarwini a mipatswa ya zihari zontlhe zi nga ni muhefemulo wu hanyako.

¹⁶ Lezi zi nga enghena zi wa hi matsune ni kati wakwe, kota lezi Nungungulu a nga wa leletisile zona; na Jehova i lo mu valela lomu xikari.

¹⁷ Yi lona yi maha ntalo laha misaveni 40 ya masiku: a mati ma lo kukumuka, ma tlakusa a taru, gi tlakuka hehla ka misava.

¹⁸ A mati ma lo tala ma tlakuka nguvu laha misaveni; ni taru gi deluka hehla ka mati.

¹⁹ A mati ma lo anza nguvu laha misaveni; ni zontlhe zitsunga lezi zo leha zi nga lahasi ka tilo zi lo fenengetwa.

²⁰ A mati ma lo tlakuka 15 ya mikono hehla ka zitsunga.

²¹ Yi lofa a nyama yontlhe yi makanyako misaveni: tinyanyani, ni zifuyo, ni zihari zontlhe, ni lezi zi kokakokako misaveni, ni vanhu vontlhelele.

²² A zilo zontlhe lezi zi nga hi ni muhefemulo wu hanyako, zontlhe lezi zi nga muhanzeni wu omileko zi lofa.

²³ Ku lobyiswa zontlhe lezi zi hanyako misaveni, ni vanhu, ni zihari, ni zikokakoka, ni tinyanyani ta tilo; zi lobyiswa misaveni; ku lo sala Noa yece ni lezi a nga hi nazo lomu tarwini. 1 Ped. 3:20; 2 Ped. 2:5; 3:6

²⁴ A mati ma wa tele laha misaveni a 150 wa masiku.