Genesisi 50 - Tshwa Bible

A kulahliwa ka Jakobe ni kufa ka Josefa.

¹ Zonake Josefa i lo wela hehla ka nghohe ya raru wakwe, i lo rila hehla ka yena, a mu pswopswa.

² Josefa i lo leletela a malanza yakwe ya tinʼanga ku petsela ni ku tota a raru wakwe; ni tinʼanga ti lo longisela a xirumbi xa Israeli.

³ Ku lo hunza 40 wa masiku, hakuva a masiku ya kulongisela ma wa hi lawo; ni vaGipite va lo mu rila 70 wa masiku.

⁴ Makunu laha na masiku ya xirilo ma hunzile. Josefa i lo wulawula ni vanhu va yindlu ya Faro, aku: Loku mina nzi kumile thomo mahlweni ka nwina, nzi wuleleni tindleveni ta Faro muku:

⁵ Dadani wa mina i nzi hlamhanyisile aku: Nzi lava kufa; u ta ya nzi lahla nkeleni wa mina, lowu nzi ti xaveleko tikweni ga Kanani. Makunu nzi vumeleni nzi kanziha nzi ya lahla dadani; nzi ta wuya.

⁶ Zonake Faro aku ka yena: Kanziha u ya lahla raru wa wena kota lezi a ku hlambanyisileko.

⁷ Josefa i lo kanziha a ku ya lahla raru wakwe, zinwe ni wontihe malanza ya Faro, a masingalakati ya yindlu ya Faro, ni masingalakati wontihe ya tiko ga Gipite, va lo kanziha zinwe naye.

⁸ Zinwe ni vontlhe va ngango wa Josefa, ni vamakabye vakwe, ni vontlhe va ngango wa raru wakwe; va lo siya zivanana zabye, ni tiyivu tabye, ni tihomu tabye lomu tikweni ga le Goxeni.

⁹ Ku lo kanziha zinwe naye a tikareta, ni vakhileli va mahaxi; ku wa hi xidlemo xa hombe nguvu.

¹⁰ Vona va lo chikela minzhimbyeni ya ku hulela kona le Atade, lowu wu nga tlhatukweni wa Jordani, laho va lo rila hi hlomulo wa hombe ni mikosi ya hombe nguvu; Josefa i lo maha a nkosi wa ku rila raru wakwe ntlhanu wa masiku ni mambiri.

¹¹ Zonake a vaaki va tiko lego, va nga vaKanani, loku va wonile a xirilo lexo xi mahilweko laho nzhimbyeni wa ku hulela wa le Atade, vaku: Xirilo xa va le Gipite, hi lexi xa hombe; hikwalaho va lo chula a nzhimbo lowo ku Abel-mizraime, lowu wu nga tlhatukweni wa Jordani.

¹² A vana va Jakobe va lo maha ka yena kota lezi a nga va leletele.

¹³ A vana vakwe va lo mu yisa tikweni ga le Kanani, va ya mu lahla lomu ka mhako ya simu ga Makapela, leyi Abrahama a nga xava ka Efroni, a muHiti hi tlhelo ga Mutsuwuka-gambo wa Mamre, kasi ku maha xilahla xa vafi. Miti. 7:16

¹⁴ Zonake laha Josefa na lahlile raru wakwe, i lo tlhelela Gipite ni vanakulobye, ni vontlhe lava a nga famba navo ku ya lahla raru wakwe.

¹⁵ Laha a vanakulobye va Josefa va nga wona lezaku a raru wabye i file, va lo wulawulisana xikari kabye, vaku: Kutani Josefa i ta hi venga, a hi tlhelisela kubiha kontlhe loku hi nga mu mahela.

¹⁶ Va lo byela Josefa, vaku: Dadani wa wena na a nga se kufa, i hi leletele, aku:

¹⁷ Mu ta byela Josefa, muku: Tsetselela milanzu ya vamakabye va wena ni kuonha kabye, hakuva va ku mahele kubiha; hikwalaho tsetselela malanza ya Nungungulu wa raru wa wena, a kuonha kabye! Zonake Josefa i lo rila laha va nga wa wulawula ka yena.

¹⁸ A vanakulobye va lo ta ti wisa wutsumbu gabye mahlweni ka yena, vaku: Hina hi malanza ya wena.

¹⁹ Josefa aku ka vona: Mu nga chavi; kasi nzi ta ti veka wutshanwini ga Nungungulu xana ke?

²⁰ Nwina mu wa alakanyile ku nzi mahela kubiha, kanilezi Nungungulu i lo nzi alakanyela kusasa, kasi a fela ku maha lezi zi mahekileko, ni lezaku a ponisa a tiko legi ga hombe.

²¹ Hikwalaho mu nga chavi, nzi ta mu wundla ni vana va nwina. Zinghaho i lo va chavelela, a tangalisa timbilu tabye.

²² Josefa i lo simamisa a tshama le Gipite zinwe ni va yindlu ya raru wakwe: Josefa i lo hanya 110 wa malembe.

²³ Josefa i lo wona vanana va Efraime va xizukulwana xa wunharu; ni vana va Makira nʼwana Manasse, na vona va lo belekelwa madzolweni ya Josefa.

²⁴ Zonake Josefa aku ka vanakulobye: Mina nzafa; kanilezi Nungungulu i ta mu enzela, hakunene i ta mu humesa ka legi tiko, a mu yisa tikweni legi a nga hlambanya ka Abrahama, na Isaka, na Jakobe, lezaku i ta va nyika gona.

²⁵ Josefa i lo hlambanyisa a vana va ka Israeli, aku: Laha Nungungulu a ta nga mu enzela, nwina mu ta rwala a marambu ya mina mu famba nawo. Ekso. 13:19; Jox. 24:32; Maheb. 11:22

²⁶ Zonake Josefa i lofa na hi ni 110 wa malembe; va lo lulamisela a xirumbi xakwe, va mu veka nghaxeni le Gipite.