Genesisi 5 - Tshwa Bible

A zizukulwana za Adamu.

¹ Legi hi bhuku ga zizukulwana za Adamu. A siku legi Nungungulu a nga vanga vanhu ha gona, i lo va vanga hi kufanana na Nungungulu. Lu. 3:36

² I lo va maha wanuna ni wasati, i lo va katekisa a chula a vito gabye ku Vanhu, ka siku lego va wumbilweko ha gona.

³ Na Adamu i lo hanya a malembe ya 130, zonake i lo beleka a nisanyana wa ku fanana na yena, i lo chula vito gakwe ku hi Sete.

⁴ A masiku ya Adamu anzhako kakuva a belekile Sete ma wa hi 800 wa malembe; a ka xikhati lexo i lo beleka varisanyana ni vanhanyana.

⁵ Ni wontihe masiku ya kuhanya ka Adamu ma wa hi 930 wa malembe, zonake i lofa.

⁶ Laha Sete a nga hi ni 105 wa malembe, i lo beleka Enoxi.

⁷ Anzhako kakuva a belekile Enoxi, Sete i lo hanya 807 wa malembe, a ka xikhati lexo i lo beleka varisanyana ni vanhanyana.

⁸ Lezo a masiku ya Sete ma wa hi 912 wa malembe, zonake i lofa.

⁹ Laha Enoxi a nga hi ni 90 wa malembe i lo beleka Kenani.

¹⁰ Anzhako kakuva a belekile Kenani, Enoxi i lo hanya 815 wa malembe, a ka xikhati lexo i lo beleka varisanyana ni vanhanyana:

¹¹ Lezo wontihe masiku ya Enoxi ma wa hi 905 wa malembe; zonake i lofa.

¹² Laha Kenani a nga hi ni 70 wa malembe, i lo beleka Mahalaleli.

¹³ Anzhako kakuva a belekile Mahalaleli, Kenani i lo hanya 840 wa malembe, a ka xikhati lexo i lo beleka varisanyana ni vanhanyana.

¹⁴ Lezo wontihe masiku ya Kenani ma wa hi 910 wa malembe; zonake i lofa.

¹⁵ Laha Mahalaleli a nga hi ni 65 wa malembe i lo beleka Jerede.

¹⁶ Anzhako kakuva a belekile Jerede, Mahalaleli i lo hanya 830 wa malembe, a ka xikhati lexo i lo beleka varisanyana ni vanhanyana.

¹⁷ Lezo wontihe masiku ya Mahalaleli ma wa hi 895 wa malembe; zonake i lofa.

¹⁸ Laha Jerede a nga hi ni 162 wa malembe, i lo beleka Enoki.

¹⁹ Anzhako kakuva a belekile Enoki, Jerede i lo hanya 800 wa malembe, a ka xikhati lexo i lo beleka varisanyana ni vanhanyana.

²⁰ Lezo wontihe masiku ya Jerede ma wa hi 962 wa malembe; zonake i lofa.

²¹ Laha Enoki a nga hi ni 65 wa malembe, i lo beleka Metusela.

²² Anzhako kakuva a belekile Metusela. Enoki i lo famba zinwe na Nungungulu 300 wa malembe; a ka xikhati lexo i lo beleka varisanyana ni vanhanyana.

²³ Lezo wontihe masiku ya Enoki ma wa hi 365 wa malembe.

²⁴ Enoki i lo famba zinwe na Nungungulu; na yena i lo nyamalala, hakuva i lo tekwa hi Nungungulu. Maheb. 11:5

²⁵ Laha Metusela a nga hi ni 187 wa malembe, i lo beleka Lameki.

²⁶ Anzhako kakuva a belekile Lameki, Metusela i lo hanya 782 wa malembe; a ka xikhati lexo i lo beleka varisanyana ni vanhanyana.

²⁷ Lezo masiku ya Metusela ma wa hi 969 wa malembe; zonake i lofa.

²⁸ Lameki i lo hanya 182 wa malembe, i lo beleka a nisanyana,

²⁹ i lo mu chula vito gakwe ku hi Noa, na aku: Yaloyi i ta hi humuta kukaraleni ka hina, ni le kuxanisekeni ka mitiro ya hina yo rima misava leyi Nungungulu a yi rukateleko.

³⁰ Anzhako kakuva a belekile Noa, Lameki i lo hanya 595 wa malembe, a ka xikhati lexo i lo beleka varisanyana ni vanhanyana.

³¹ Lezo wontihe masiku ya Lameki ma wa hi 777 wa malembe; zonake i lofa.

³² Na Noa i lo hanya 500 wa malembe laha a nga beleka Xemi, na Hamu, na Jafete.