Genesisi 43 - Tshwa Bible

A vanakulobye va Josefa vaya le Gipite khati ga wumbiri.

¹ A ndlala yi lo tshinga tikweni ga Kanani.

² Laha va nga wa mbhetile mavele lawa va nga yile va ya xava le Gipite, Jakobe aku ka vana vakwe: Engetani kambe mu ya hi xavela zakuganyana!

³ Juda i lo hlamula, aku: Inaloye i tiyisile ka hina, aku: Cima mu nga ta wona a nghohe ya mina loku mu nga wuyi ni nzisana ya nwina.

⁴ Loku u vumela hi famba ni nakulori, hi taya hi ya ku xavela zakuga.

⁵ Kanilezi loku u nga hi vumeli ku famba naye, cima hi nga ta famba, hakuva inaloye i te ngalo ka hina; Mu nga ta wona a nghohe ya mina loku mu nga wuyi ni nzisana ya nwina.

⁶ Israeli aku: Hikuyini mu nzi maheleko kubiha, hi ku byela inaloye lezaku mu na ni munwani nakuloni?

⁷ Vona va lo hlamula, vaku: Inaloye i lo hi wutisisa hi kutikisa, a timhaka ta hina ni ngango wa hina, aku: A raru wa nwina wa hanya ke? Hikwalaho hina hi lo mu byela, hi hlamula magezu yakwe. Ngha hi zi tivisile kuyini lezaku i taku ngalo: Fambani mu ya teka a nakuloni ke?

⁸ Juda aku ka Israeli a raru wakwe: Veka mufana loyi ntanweni wa mina, hi ta suka hi famba; kasi hi fela ku hanya, hi ngafi, hina na wena ni zihlangana za hina.

⁹ Mina nzi ti bohile ku mu hlayisa, wena u ta mu lava canjeni ga mina; loku nzi nga mu nehi ka wena, nzi ta ku nyika nʼwana wa wena, mina nzi tava ni nanzu mahlweni ka wena wontihe masiku ya kuhanya ka mina.

¹⁰ Hakuva loku hi wa nga hlwelangi, lezi ngha hi tlhelele kambiri.

¹¹ Israeli a raru wabye aku ka vona: Loku zi nghaho, mu fanele ku mahisa lezi: Tekani tisakwa ta nwina, mu chela mihanzu yo nanziha ya tiko legi lomu tisakweni ta nwina, mu ya nyika inaloye; mu teka ni hlakati ni wulombe ni makha, ni mure, ni timanga, ni maalmonde.

¹² Mu teka ni mali yi wuyetilweko canjeni ga nwina, ni mali leyi yi nga ya tlheliswa yi chelwa lomu milonwini ya tisakwa ta nwina, mu yi tlhelisa; kutani mu wa lo hoxisa.

¹³ Zonake mu teka ni nakuloni, mu famba ka naloye.

¹⁴ Nungungulu wa Ntamu Wontihe a mu mahe mu kuma thomo mahlweni ka naloye, kasi a fela ku mu tlhatlhisela munwani nakuloni zinwe na Benjamini. Loku mina zi nzi fanele a kuva nzi lahlekelwa hi vana va mina, a nzi lahlekelwe hi vona.

¹⁵ Zonake va lo teka zinyikiwo lezo, va teka ni mali yi wuyetilweko ku hlayiwa canjeni gabye, zinwe na Benjamini; va lo suka va relela kuya Gipite va lo ya chikela ka Josefa.

¹⁶ Laha Josefa a nga wona Benjamini na va hi naye, i te ngalo ka nekwa ya yindlu yakwe: Heleketa vanhu lava le kaya, u ya va longisela ku va fihluta, hakuva lava vanhu nzi taga navo a mumu lowu.

¹⁷ A wanuna i lo maha kota lezi Josefa a leleteleko, i lo va heleketa ndlwini ya Josefa.

¹⁸ Zonake va lo dzuka, hilezi va nga wa heleketwa ndlwini ya Josefa, vaku: Hi yiswa lomu ndlwini yakwe hi kota ya mali yi nga wa enghenisilwe lomu tisakweni ta hina xikhati lexiyani; kasi va kuma xigelo xo hi vukela ha xona, va wela hehla ka hina, va hi khoma ni timbongola ta hina, hi maha tikhumbi takwe.

¹⁹ Va lo tshinela ka nekwa ya yindlu ya Josefa, va lo wulawula naye laha nyangweni ya yindlu,

²⁰ vaku: O! hosi ya hina, leziyani hi nga wa tile legi go ranga hi ta xava zakuga,

²¹ hi te loku hi chikele wutshanwini ga kuetlela, hi sangula ku tlhatlha tisakwa ta hina, hi lo hlamala hi ku wona a mali ya munwe ni munwani wa hina na yi hi kona nonwini wa sakwa yakwe, ni mali yi wa hi yona a mali ya hina hi tsengo wa yona; makunu ha yi tlhelisa hi canja ga hina.

²² Hi tekile ni yinwani mali, kasi ku ta xava Zakuga; na hi nga tivi lezaku himani a nga enghenisa a mali ya hina lomu tisakweni ta hiha.

²³ A nekwa yiku ka vona: A kurula a kuve na nwina, hakuva Nungungulu wa nwina ni Nungungulu wa raru wa nwina hi yena a mu nyikileko mali lomu tisakweni ta nwina; a mali ya nwina nzi yi kumile. Zonake i lo humesa Simoni lomu paxweni.

²⁴ A nekwa yi lo va enghenisa lomu ndlwini ya Josefa, i lo va nyika mati va hlamba milenge yabye, a nyika foliji ka timbongola tabye.

²⁵ Vona va lo longisa zinyikiwo zabye, kasi ku ta nyika Josefa xikhati xa kuwuya kakwe laha munwini; hakuva va wa zwile ku ngalo va taga laho zakuga.

²⁶ Laha Josefa a nga wa enghenile lomu ndlwini, va lo neha zinyikiwo lezi va nga wa hi nazo, va ti koramisa mahlweni kakwe.

²⁷ Yena i lo va wutisa kuhanya kabye, aku: A raru wa nwina wa hanya ke? Loyi wa xikhosana mu nga hlawutela ha yena, wa ha hanya ke?

²⁸ Vaku ka yena: A nanza ga wena, a raru wa hina, wa ha hi kona, wa ti hanyela. Va lo korama va mu khizamela.

²⁹ Josefa i lo tlakusa mahlo yakwe a wona Benjamini a nakulobye wo belekwa naye nyine munwe, aku: Hi yena nakuloni tsongwani loyi mu nga nzi hlawutela ha yena ke? Aku: Nungungulu a ku katekise, nwananga!

³⁰ Zonake Josefa i lo hatlisa a ya lava wutshamu go ya rila ka gona, hakuva a mbilu yakwe yi lo henyiwa hi liranzo ka nakulobye; i lo enghena ndlwini yakwe, a ya rila kona.

³¹ Loku a hlambile nghohe i lo huma a ti khoma, aku: Nehani zakuga.

³² Va lo mu phamela hi tlhelo, ni vaGipite lava a nga kari aga navo va lo phamelwa hi tlhelo, hakuva a vaGipite va wa nga gelani ni maHeberu, hakuva lexi xi wa hi xinyenyeko kabye.

³³ Vona va lo tshamiswa mahlweni ka Josefa, va xaxametwa hi tintanga tabye, zonake va lo cuwukana munwe ni munwani hi kuhlamala.

³⁴ Zonake i lo va phamela a kuga loku ku nga wa hi mahlweni kakwe; kanilezi Benjamini i lo mu phamela hi ku wuyeta ntlhanu wa zikhati ku hunza vontlhe. Va lonwa va tsaka zinwe naye.