Genesisi 42 - Tshwa Bible

A vanakulobye va Josefa vaya le Gipite.

¹ Makunu laha Jakobe a nga wona lezaku le Gipite ku kona mavele, i te ngalo ka vana vakwe: Hikuyini mu cuwukelanako?

² Aku: Nzi zwile lezaku a mavele ma kona le Gipite; hikwalaho relelani muya leyo, mu ya hi xavela kasi ha hanya hi ngafi.

³ Zonake a vanakulobye va Josefa va lo relela na va hi khume, vaya Gipite ku ya xava mavele.

⁴ Kanilezi Benjamini, a nakulobye wa Josefa, Jakobe a nga mu rumangi ni vanakulobye, hakuva i waku a nga dzuka a humelwa hi mhango.

⁵ A vana va Israeli va loya kuxujeni zinwe ni vanwani, hakuva a ndlala yi wa hi kona lomu tikweni ga Kanani.

⁶ Josefa i wa hi mufumeli tikweni ga Gipite, hi yena kambe a nga xavisa ka vanhu va matiko; ni vanakulobye va lota khizama mahlweni kakwe.

⁷ Laha Josefa a nga wona vanakulobye, i lo va tiva; yena i lo ti mahisa ku khwatsi hi munhu a nga va tiviko, a wulawula kabye hi mona, aku: Muta hi kwihi? Vaku: Hita hi tikweni ga le Kanani, hita hi ta xava zakuga.

⁸ Josefa i lo va tiva vanakulobye, kanilezi vona a va mu tivangi.

⁹ Josefa i lo alakanya miloro yakwe, leyi a nga wa lorile ha vona; aku ka vona: Nwina mu tihloli, mu tela ku ta hlola tiko, kasi ku wona laha mu ta nga gi putsuketa ha kona.

¹⁰ Vona vaku kakwe: Ahihi hosi, a malanza ya wena ma tela ku ta xava zakuga.

¹¹ Hina hontlhe hi vana va munhu munwe, hi vanhu va nene, a malanza ya wena cima a hi tihloli ta nchumu.

¹² Yena aku ka vona: Ahihi, mu tela ku ta hlola tiko kasi ku wona laha mu ta nga gi putsuketa ha kona.

¹³ Vaku kakwe: Hina malanza ya wena hi 12 wa vavanuna, a vana va munhu munwe le tikweni ga le Kanani; loyi wa tsongwani i sele kaya ni dadani wa hina, kanilezi munwani a nga hi kona.

¹⁴ Josefa aku ka vona: Hi zalezo nzi wulako ha zona lezaku mu tihloli;

¹⁵ nwina mu ta ringiwa laha, hakuva nzi tiyisile na nzi hlambanya hi wutomi ga Faro! Cima mu nga ta huma laha, loku mu nga nehi nzisana ya nwina laha!

¹⁶ Rumani munwe wa nwina a lanza nzisana ya nwina; nwina nwentlhe mu ta bohiwa mu sala laha, kasi a timhaka ta nwina ti ta woneka lezaku ti nene; loku zi nge nghaho, nza hlambanya hi wutomi ga Faro, mu tihloli.

¹⁷ I lo va enghenisa vontlhe lomu paxweni, va tshama masiku manharu.

¹⁸ Zonake hi siku ga wunharu, Josefa aku kabye: Mahani lezi mu ta hanya, hakuva nzi munhu nzi chavako Nungungulu.

¹⁹ Loku nwina mu hi vanhu va nene, munwe wa nwina a sale lomu paxweni, vanwani va famba va heleketa mavele, kasi va ya hanyisa a tinghamu ta nwina.

²⁰ Mu ta ya wuya ni makabye wa nwina wa tsongwani, kasi magezu ya nwina ma woneka ma hi ya zinene, kasi mu ngafi. Va lo maha zalezo.

²¹ Vona va lo wulawulisana voce, vaku: Hakunene hi na ni nanzu ka nakulori, hakuva hi lo mu wona na a xaniseka Mbilwini yakwe, hi ala ku mu zwela wusiwana, laha a nga wa hi khongotela; hi kota ya lezo ha humelwa hi khombo ga kunghahi.

²² Rubeni i lo va hlamula, aku: A nzi mu byelangi nziku, mu nga mahi kubiha ka nakulori ke? Kanilezi a mu ingisangi; hi nkhata wakwe wu labyiwako makunu.

²³ Va wa nga zi tivi lezaku Josefa wa zizwa, hakuva i wa wulawula navo hi mutlhamuseli.

²⁴ Zonake Josefa i lo va fularela a rila; i lo tlhela a wuya kabye a ta wulawula navo; i lo teka Simoni a mu boha mahlweni kabye.

²⁵ Zonake Josefa i lo laya lezaku ku cheletelwa mavele tisakweni tabye, ni lezaku a mali ya munwe ni munwani yi vekiwa lomu sakweni yakwe, va va nyika timbuva ta kuga laha ndleleni; va lo maha lezo.

²⁶ Va lo teka tisakwa tabye va rwexa timbongola tabye, va famba.

²⁷ Laha va nga chikela wutshanwini ga ku etlela, a munwe wabye i lo tlhatlha a sakwa yakwe kasi ku nusela mbongola yakwe, i lo wona mali yakwe na yi hi kona nonwini wa sakwa yakwe.

²⁸ Zonake aku ka vanakulobye: A mali ya mina yi tlhelisilwe, hi leyi lomu sakweni ya mina. Zonake a timbilu tabye ti lo dzuka, va rurumela vaku ka munwe ni munwani: Xana xini lexi Nungungulu a hi maheleko!

²⁹ Laha na va chikele ka Jakobe a raru wabye, le tikweni ga le Kanani, va lo hlawutela zontlhe lezi zi nga va humela, vaku:

³⁰ Inaloye, a hosi ya tiko lego, i la su wulawula ka hina hi mona, aku: Mu tela ku ta hlola tiko.

³¹ Hiku ka yena: Futsi hina hi vanhu va nene, a hi teli ku ta hlola tiko.

³² Hina hi vana va raru munwe; hi wa hi khume ni vambiri, kanilezi munwani a nga ha hi kona, ni loyi wa nzisana i le kaya ka dadani le tikweni ga Kanani.

³³ Makunu inaloye wa hosi ya tiko lego i te ngalo ka hina: Loku nzi ta zi tiva lezaku mu vanhu va nene, siyani munwani nakuloni laha ka mina, mu rwala mavele mu famba, hi kota ya ndlala leyo yi nga kona mingangweni ya nwina.

³⁴ Mu ta ya wuya ni nzisana ya nwina, kasi nzi ta tiva lezaku a mu tihloli, mu vanhu va nene. Nzi ta ta mu nyika nakuloni, ni lezaku mu ta simamisa kuta mu xuja ka legi tiko.

³⁵ Makunu laha va nga wa chulula tisakwa tabye, va lo kuma zikhwama za timali tabye vontlhelele; laha va nga wona zikhwama za timali tabye, va lo dzuka zinwe ni raru wabye.

³⁶ Jakobe a raru wabye, aku ka vona: Ma nzi mbhetela vanana! Josefa a nga ha hi kona, yenawu Simoni a nga ha hi kona, lezi mu lava ku nzi tekela na Benjamini. Zontlhe zo nzi xanisa mina!

³⁷ Zonake ku lo hlamula Rubeni, aku ka raru wakwe: Loku nzi nga wuyi naye ka wena, u ta daya a vana va mina va vambiri; mu hendlelete canjeni ga mina, nzi ta wuya naye.

³⁸ Jakobe aku; Mu nga ta famba ni nʼwana wa mina, hakuva a nakulobye i file, hi yena yece a seleko; loku mu famba naye mu dzuka mu humelwa hi mhango lomu ndleleni leyo mu ta nga famba ka yona, mu ta relelisa a wuvu ga mina hi xiviti le nkeleni.