Genesisi 41 - Tshwa Bible

¹ Zonake kumbheleni ka malembe mambiri, Faro i lo lora noro. I lo lora na a yimile mbhirini ya congo.

² I lo wona ntlhanu ni mambiri a mapswele ya tihomu to saseka na ti kulukile, na ti huma hi lomu congweni, na tiga lomu hlangeni.

³ I lo engeta a wona tinwani tihomu ta mapswele ta ntlhanu ni timbiri, tonawu na ti huma hi lomu congweni, na ti wonzile, ti hi mikotso; zonake ti lo yima kusuhani ni leti tinwani a mbhirini ya congo.

⁴ Zonake a tihomu leti to wonza ni ta mikotso, ti loga leti to kuluka ta ntlhanu ni timbiri to saseka. Zonake Faro i lo khindlimuka.

⁵ I lo engeta a etlela ga wumbiri, i lo lora na a wona a miponwani ya ntlhanu ni mimbiri, na yi huma lihlangeni linwe, na yi chelile khwatsi.

⁶ I lo engeta kambe a wona yinwani miponwani ya ntlhanu ni mimbiri, yi wunileko, na yi womile hi mheho ya xikobani;

⁷ a miponwani leyi yi wunileko yi lo mita leyi yo nyuka, yi chelileko khwatsi ya ntlhanu ni mimbiri. Zonake Faro i lo khindlimuka, a wona lezaku i noro.

⁸ Na gi cile laha mixweni, Faro i lo karateka nguvu lomu mbilwini yakwe; hikwalaho i lo rumela lezaku ku vitanwa zitumbe zontlhe za le Gipite, ni titlhari ta kona. I lo va hlawutela miloro yakwe, kanilezi i wa nga hi kona loyi a nga wa tiva ku tlhamusela miloro leyo ya Faro.

⁹ Zonake a nduna ya vacheleteli va vinya yi te ngalo ka Faro: Inyamutlha nza alakanya a nanzu wa mina.

¹⁰ Hi ginwani siku Faro i wa zangarele malanza yakwe, a hi enghenisa paxweni, lomu ndlwini ya nduna ya vanyakasani, mina ni nduna ya vabhiki.

¹¹ Makunu hi wa lo lora miloro ya hina wusiku ginwe, mina na yena; munwe ni munwani i wa lo lora a noro lowu wu nga ni tlhamuselo wa wona.

¹² Makunu ku wa hi kdna na hina a mufana wa muHeberu, a nanza ga nduna ya vanyakasani. Hi lo mu hlawutela, yena i lo tlhamusela a miloro ya hina, ka munwe ni munwani kota lezi a lorisileko zona.

¹³ Makunu zi mahisile zalezi a tlhamuseleko ka hina; Faro i nzi tlhelisele ntirweni wa mina, a munghana wa mina a hayekwa.

¹⁴ Zonake Faro i lo rumela ku ya vitana Josefa; zalezo va hatlisa ku ya mu humesa paxweni. I lo ti cinga, a ambala tinguwo tinwani, a ya enghena ka Faro.

¹⁵ Zonake Faro aku ka Josefa: Nzi lorile a miloro, kanilezi a nga kona a zi kotako a ku yi tlhamusela. Makunu nzi zwile lezaku loku wena uzwa a noro wa zi kota ku wu tlhamusela.

¹⁶ Josefa i lo hlamula Faro, aku: A hi mina, Nungungulu hi yena a to hlamula khwatsi ka Faro.

¹⁷ Zonake Faro aku ka Josefa: A norweni wa mina, nzi lo lora na nzi yimile mbhirini ya congo.

¹⁸ Laho ku lo huma hi lomu congweni a mapswele ya tihomu ya ntlhanu ni mambiri, na ma kulukile ma sasekile, na ma kari maga lomu hlangeni.

¹⁹ Zonake hi nzhako ka wona, ku lo huma tinwani tihomu ta ntlhanu ni timbiri, na ti wonzile, ti bihile nguvu, ti hi mikotso; laha kaku cima a nzi wonangi a to nyenyeza to kota leto tikweni gontlhe ga Gipite.

²⁰ Makunu a tihomu leto ta mikotso ni to nyenyeza, ti loga leti to ranga ta ntlhanu ni timbiri to kuluka.

²¹ Kanilezi loku ti ti mitile, a ti wonekangi lezaku ti wa gile nchumu; ti lo simamisa ti hi mikotso kota kale. Zonake nzi lo khindlimuka.

²² Nzi lo engeta nzi lora na nzi wona ntlhanu ni mimbiri miponwani na yi hi ka lihlanga linwe, na yi chelile khwatsi.

²³ Nzi lo wona na ku huma yinwani ya ntlhanu ni mimbiri ya mipumbunzela, na yi wunile yi swile, hi moya wa xikobani.

²⁴ Zonake a miponwani ya mipumbunzela yi lo mita leyi ya ntlhanu ni mimbiri ya yi nene. Makunu nzi lo byela zitumbe, kanilezi a zi zi kotangi ku tlhamusela.

²⁵ Josefa aku ka Faro: A noro wa Faro munwe; Nungungulu i kombisile ka Faro lezo a lavako ku zi maha.

²⁶ A tihomu leti ta ntlhanu ni timbiri to saseka, hi malembe ya ntlhanu ni mambiri; a miponwani leyi ya ntlhanu ni mimbiri ya yi nene hi malembe ya ntlhanu ni mambiri; a noro munwe.

²⁷ A tihomu leto ta ntlhanu ni timbiri ta mikotso na ti nyenyezile, leti ti nga huma a nzhako ka leti to saseka, hi malembe ya ntlhanu ni mambiri; ni miponwani leyi ya ntlhanu ni mimbiri ya mipumbunzela yo wuna, na yi swile hi moya wa xikobani, ku tava a malembe ya ntlhanu ni mambiri ya ndlala.

²⁸ Hi tona timhaka nzi byelako Faro; a zilo lezi Nungungulu a lavako ku zi maha i zi kombisile ka Faro.

²⁹ Ku tata a malembe ya ntlhanu ni mambiri ya pfuno wa hombe tikweni gontlhe ga Gipite.

³⁰ Hi le nzhako ku tata a malembe ya ntlhanu ni mambiri ya ndlala; a pfuno wontihe wu ta rivalwa lomu tikweni gontlhe ga Gipite, a ndlala yi ta mbheta tiko.

³¹ A pfuno wu nga ha ta tibyiwa lomu tikweni hi kota ya ndlala leyi yi ta ngata hi le nzhako, hakuva yi tava ndlala ya hombe nguvu.

³² A miloro leyo yi wuyetilwe ka Faro, hakuva i mhaka yi tiyisilweko hi Nungungulu, na Nungungulu i ta hatlisa ku maha lezo zilo.

³³ Makunu ngha Faro a hlawula a munhu wa mano na tlharihile, a mu yimisa hehla ka tiko ga Gipite.

³⁴ Ngha Faro a veka ni tinduna lomu tikweni gontlhe, leti ti ta nga teka xipanze xa wuntlhanu xa lezi va ta nga hula lomu tikweni gontlhe ga Gipite, lomu ka ntlhanu wa malembe ni mambiri ya pfuno.

³⁵ Ngha vona va hlengeletela kuga ka malembe ma tako laya ya ma nene, ngha vona va tsombanyisela a mavele canjeni ga Faro, va hlayisa zakuga lomu mitini,

³⁶ kasi a kuga loko ku tava mbuva ya tiko lomu ka ntlhanu wa malembe ni mambiri ya ndlala, laya ma ta ngava kona a tikweni ga Gipite, kasi a tiko gi nga lovi hi ndlala. Faro a yimisa Josefa a kuva hosana te Gipite.

³⁷ A timhaka leto ti lo tsakisa Faro ni malanza yakwe wontihe.

³⁸ Zonake Faro i te ngalo ka malanza yakwe: Xana hi ta mu kuma a munhu wo kota loyi ke? Loyi a nga ni Moya wa Nungungulu ke?

³⁹ Zonake Faro aku ka Josefa: Kota lezi Nungungulu a ku kombileko a timhaka tontlhe leti, a nga kona munhu wo tlhariha ni wo pima kota wena.

⁴⁰ Wena u tava wa hombe hehla ka yindlu ya mina, a tiko ga mina gontlhe gi ta fumelwa hi nomu wa wena. Ntsena lezaku nzi tava wa hombe ka wena hi wuhosi ga mina basi. Tis. 105:21; Miti. 7:10

⁴¹ Faro i lo engeta kambe aku ka Josefa: Nzi ku yimisile hehla ka tiko gontlhe ga Gipite.

⁴² Faro i lo susa a phera yakwe titihweni lakwe, a yi vekela litihweni la Josefa, i lo mu ambexa a tinguwo to saseka ta wukene, i lo mu boha a kadiyadi ga nzalama nhanwini yakwe.

⁴³ I lo mu khilelisa kareteni yakwe ya wumbiri, va kanyuluka mahlweni ka yena, vaku: Abreki! Lezo i lo mu yimisa hehla ka tiko gontlhe ga Gipite.

⁴⁴ Faro aku ka Josefa: Nzi mina Faro, a handle ka kuruma ka wena a nga kona a to tlakusa canja gakwe ni nenge wakwe lomu tikweni gontlhe ga Gipite.

⁴⁵ Faro i lo chula vito ga Josefa aku hi Zefaneti-panea; i lo mu nyika Asenate, nʼwana Potifera a mupristi wa le Oni, a kuva sati wakwe. Zonake Josefa i lo teka a pfhumba go kambela a tiko ga Gipite.

⁴⁶ Josefa i wa hi ni 30, wa malembe xikhati lexo a nga yima mahlweni ka Faro, hosi ya Gipite; zinghaho Josefa i lo suka mahlweni ka Faro a fambela tiko gontlhe ga Gipite.

⁴⁷ Zonake a malembe laya ya ntlhanu ni mambiri ya pfuno, a tiko gi lo pfuna nguvunguvu.

⁴⁸ Josefa i lo hlengeletela zakuga zontlhe za ntlhanu wa malembe ni mambiri lomu tikweni ga Gipite, i lo hlayisa zakuga lomu mitini, i lo veketela zakuga ka muti munwe ni munwani, leyi yi nga kusuhani ni masimu.

⁴⁹ Josefa i lo hlengeletela a mavele yo tala khwatsi hi seke ga bimbi, a kala a tsika ku hlaya hakuva zi wa tsanza vahlayi,

⁵⁰ Na ma nga se chikela malembe ya ndlala, ku lo belekwa varisanyana vambiri ka Josefa, lava Asenate, nʼwana Potifera mupristi wa Oni, a nga beleka ka Josefa.

⁵¹ Loyi wa matewula, Josefa i lo mu chula ku ngalo hi Manasse, aku: Nungungulu i nzi mahile nzi rivala kuxaniseka ka mina, ni zontlhe za le kaya ka dadani.

⁵² Loyi wa nzisana i lo mu chula vito gaku hi Efraime, aku: Hakuva Nungungulu i nzi nyikile vanana lomu tikweni ga hlomulo wa mina.

⁵³ A malembe laya ya pfuno laya ya ntlhanu ni mambiri ma lo mbhela lomu tikweni ga Gipite.

⁵⁴ Zonake ku lo sangula a malembe ya ntlhanu ni mambiri ya ndlala, kota lezi Josefa a nga wa wulile. A ndlala yi lo tshinga matikweni wontihe; kanilezi lomu tikweni gontlhe ga Gipite ku wa hi kona zakuga.

⁵⁵ Makunu laha a tiko ga Gipite gi nga wa tshingelwe hi ndlala, a vanhu va lo ya rilela zakuga ka Faro. Faro aku ka vaGipite vontlhe: Yanani ka Josefa, mu ta ya maha zontlhe lezi a ta nga mu byela.

⁵⁶ A ndlala yi lo fenengeta tiko gontlhe; zonake Josefa i lo vulula zihlangala zontlhe za kuga, a xavisa mavele ka vaGipite; ni ndlala yi lo anza nguvu tikweni ga Gipite.

⁵⁷ Zonake a matiko wontihe ma lota Gipite ku ta xava mavele ka Josefa, hakuva a ndlala yi wa hi ya hombe nguvu ka matiko wontihe.