Genesisi 40 - Tshwa Bible

Josefa a tlhamusela miloro.

¹ Zonake anzhako ka lezi zilo, a mucheleteli wa zakunwa za hosi ya Gipite ni mubhiki wakwe, va lo onhela a nwinyi wabye, a hosi ya Gipite.

² Zonake Faro i lo zangarela a tinduna takwe ta timbiri, a nduna ya vacheleteli va zakunwa ni nduna ya vabhiki.

³ I lo va enghenisa paxweni, a ndlwini ya nduna ya vanyakasani va wutshamu lego ku khotselweko Josefa.

⁴ Zonake a nduna ya vanyakasani yi lo byela Josefa lezaku a va hlayisa, na vona va lo tshama masiku yo kari lomu paxweni.

⁵ A nduna ya vacheleteli va zakunwa za hosi; ni nduna ya vabhiki va hosi ya Gipite, lava va nga lomu paxweni, va lo lora miloro hi wumbiri gabye, loyi ni loyi a lora zakwe ka gona wusiku lego ga ginwe; wunwe ni wunwani wu wa hi ni tlhamuselo ya wona.

⁶ Ni mixo Josefa i loya ka vona, a ya va kuma na va tsuvile.

⁷ I lo wutisa tinduna leto ta Faro, leti ti khotselweko zinwe naye lomu ndlwini ya nwinyi wakwe, aku: Hikuyini mu tsuvileko nyamutlha?

⁸ Vona va te ngalo kakwe: Hi lo lora miloro, makunu a ku kona wo hi tlhamusela. Josefa aku kabye: Kutlhamusela a kuti hi ka Nungungulu ke? Nzi byeleni lezi mu nga lora.

⁹ A nduna ya vacheleteli va zakunwa yi lo byela Josefa a noro wa yona yiku: Nzi lorile na nzi wona a sinya ya vinya mahlweni ka mina.

¹⁰ A sinya leyi yi wa hi ni maravi manharu; zonake laha na ma hlukile ku lo pfepfa zitsangi, ni zitata za wona zi wa hi ni mauva ma buvileko.

¹¹ A gombe ga Faro gi wa hi canjeni ga mina; zonake nzi lo teka mauva nzi kamela lomu ka gombe ga Faro, nzi nyika Faro a gombe ga kona.

¹² Josefa aku: A tlhamuselo ya kona hi leyi; Maravi manharu, masiku manharu;

¹³ ka ha ta hunza masiku manharu, Faro i ta ku tlakusa, u tlhelela ntirweni wa wena, u ta ya mu nyika Faro a gombe lomu canjeni gakwe kota lezi u nga maha kale, laha u nga wa hi mucheleteli wa vinya gakwe.

¹⁴ Kanilezi nzi alakanye laha zi ta nga lulama za wena, u nzi mahela wuxinji u nzi wulawulela ka Faro kasi a nzi humesa ka leyi yindlu.

¹⁵ Hakuva nzi lo yibyiwa le tikweni ga maHeberu, ni kwalaha a nzi onhangi nchumu lexi va nzi khotselako ha xona.

¹⁶ A nduna ya vabhiki laha na yi wonile lezaku a tlhamuselo wu nene, yi te ngalo ka Josefa: Minawu nzi lorile a noro wa mina; kuloreni ka mina nzi wa rwele zirunzu zinharu za zibaba, zo basa laha hlokweni ya mina.

¹⁷ Lomu ka xirunzu lexi xi nga hi hehla ku wa hi kona zakuga za tixaka tontlhe, leti ti bhikiwako ka Faro, ni tinyanyani ti lota jowotela lezi zi nga wa hi lomu xirunzwini lexi nzi nga wa rwele hlokweni ya mina.

¹⁸ Josefa i lo hlamula, aku: A tlhamuselo wa kona hi lowu: Zirunzu zinharu hi masiku manharu.

¹⁹ Ku ta hunza masiku manharu, Faro i ta tlakusa a hloko ya wena a kuva yi hayekwa sinyeni, a tinyanyani ti ta jowotela a nyama ya wena.

²⁰ Zonake hi siku ga wunharu, a siku ga kubelekwa ka Faro, i lo maha mubuzo wa malanza yakwe wontihe; i lo tlakusa a hloko ya nduna ya vacheleteli va vinya ni hloko ya nduna ya vabhiki xikari ka malanza yakwe.

²¹ I lo tlhelisela a nduna ya vacheleteli va vinya wutshanwini ga yona, kasi a nyikela a gombe canjeni ga Faro.

²² Kanilezi a nduna ya vabhiki yi lo hayekiwa, kota lezi Josefa a nga wa tlhamusele ka vona.

²³ Kanilezi a nduna ya vacheleteli a yi alakanyangi ha Josefa, yi lo mu rivala.