Genesisi 39 - Tshwa Bible

Josefa a valelwa poxtoeni.

¹ Josefa i lo yiswa Gipite; Potifare, a nduna ya Faro, a murangeli wa vanyakasani, a muGipite, i lo mu xava ka vaIxmaeli lava va nga mu yisa leyo.

² Jehova i wa hi zinwe na Josefa; i wa hi munhu a nga hi ni thomo; a tshama lomu ndlwini ya nwinyi wakwe a muGipite.

³ A nwinyi wakwe i lo wona lezaku Jehova i zinwe naye, ni lezaku zontlhe lezi a zi mahako, Jehova wa zi vuvumisa canjeni gakwe.

⁴ Hi kota ya lezo Josefa i lo kuma thomo mahlweni kakwe, a mu tirela. Zonake a nwinyi wakwe i lo mu yimisa ku maha muhlayisi wa yindlu yakwe, ni kuva muhlayisi wa zontlhe lezo a nga wa hi nazo.

⁵ Ku suka hi laha na a mu yimisile a kuva muhlayisi wa yindlu yakwe ni zontlhe lezi a nga hi nazo, Jehova i lo katekisa a yindlu ya muGipite hi kota ya Josefa; a zikatekiso za Jehova zi wa hi hehla ka zontlhe lezi a nga hi nazo, lomu ndlwini ni le masinwini.

⁶ Yena i lo veka zilo zontlhe a nga hi nazo canjeni ga Josefa, i wa nga ti karati ha nchumu, ntsena a kuga loku a nga waga. Josefa i wa hi lipswhitla.

⁷ Zonake anzhako ka lezo a sati wa nwinyi wakwe, i lo navela Josefa, aku: Etlela zinwe na mina.

⁸ Yena i lo ala, aku ka sati wa nwinyi wakwe: A nwinyi wa mina a nga ti karati hi zontlhe lezi zi nga lomu ndlwini yakwe, zontlhe lezi a nga nazo i zi vekile mandleni ya mina.

⁹ I hava wahombe ka leyi yindlu ku hunza mina, a nga nzi tsimbeteli nchumu a handle ka wena, hakuva u nga sati wakwe. Nzi ta mahisa kuyini loku kubiha, nzi onha ka Nungungulu ke?

¹⁰ Hambu lezo a nga wa wulawula na Josefa masiku ni masiku lezaku ngha a etlela naye, ni kuva zinwe naye, Josefa a nga vumelangi.

¹¹ Hi ginwani siku Josefa i lo enghena lomu ndlwini ku tira mitiro yakwe; lomo ndlwini ku wa hi hava munwani munhu.

¹² A wasati i lo khoma Josefa hi nguwo yakwe, aku: A hi etlele hontlhe! Kanilezi i lo siya nguwo yakwe canjeni gakwe, a tsutsuma a huma handle.

¹³ Makunu laha wasati a nga wona lezaku i siyile a nguwo yakwe a tsutsuma a huma handle,

¹⁴ yena i lo vitana a vanhu va yindlu yakwe, aku: Cuwukani, ku nehilwe a muHeberu laha ngangweni wa hina ku ta hi xengetela. Yena i lota ka mina aku ngha a etlela na mina, kanilezi nzi loba huwa.

¹⁵ Zonake laha a ngazwa lezaku nzaba huwa, i lo siya a nguwo leyi yakwe canjeni ga mina a tsutsuma a huma handle.

¹⁶ Yena i lo hlayisa a nguwo ya Josefa a kala a Wuya a nuna wakwe.

¹⁷ I lo wulawula ni nuna wakwe; aku: A nanza legi ga muHeberu, loyi wena u hi neheleko, i wa tile ka mina a ku ta nzi xengetela.

¹⁸ Laha nzi ngaba huwa, i lo siya a nguwo leyi yakwe a tsutsuma a huma handle.

¹⁹ Laha a nwinyi wakwe a nga zwile timhaka ta sati wakwe, taku: A nanza ga wena gi nzi mahile lezi ni lezi, a zanga yakwe yi lo vindlukelana.

²⁰ A nwinyi wa Josefa i lo mu khoma a mu hoxa paxweni, lego ku khotselwako kona a tiperesu ta hosi; zinghaho i lo tshama paxweni.

²¹ Kanilezi Jehova i wa hi zinwe na Josefa; i lo mu kombisa wuxinji, a mu maha lezaku a kuma thomo ka nduna ya paxo.

²² A nduna ya paxo yi lo yimisa Josefa hehla ka tontlhe tiperesu leti ti nga wa hi paxweni; ni zontlhe lezi zi nga wa mahiwa lomo, zi wa mahiwa hi yena.

²³ Ni nduna ya paxo yi wa nga ha cuwuki nchumu xa lezi zi nga wa hi canjeni ga Josefa, hakuva Jehova i wa hi zinwe naye; ni zontlhe lezi a nga wa zi maha, Jehova i wo zi katekisa.