Genesisi 38 - Tshwa Bible

Juda na Tamari.

¹ Makunu hi lexo xikhati Juda i lo suka ka vanakulobye, i loya ka munhu wa le Adulamu, a tibyako Hira.

² Juda i lo ya wona a nhanyana wa munhu wa muKanani, a vito gakwe hi Xua; yena i lo mu teka, i lo enghena ka yena.

³ Yena i lo xura nyimba, a beleka nisanyana; i lo mu chula vito ga Era.

⁴ I lo engeta a xura nyimba, i lo beleka nisanyana, a mu chula vito ga Onani.

⁵ I lo engeta a xura nyimba kambe, a beleka nisanyana, a mu chula vito ga Xela, Juda na a hi le Keziba.

⁶ Makunu Juda i lo lowota a nʼwana wakwe wa matewula, a vito ga sati wa kona hi Tamari.

⁷ Kanilezi Era a matewula ya Juda i wa bihile mahlweni ka Jehova, Jehova i lo mu daya.

⁸ Juda aku ka Onani: Enghena ka sati wa nakuloni u mu hlambela, u vuxa a pswalo wa nhonzo ya wena. Rute 4:5; Mat. 22:24

⁹ Onani i wa zi tiva lezaku a vanana va kona va nga tava vakwe, hikwalaho loku aya ka sati loye wo siyiwa hi nakulobye, i wo halatela hasi kasi a nga nyiki pswalo ka nhonzo yakwe.

¹⁰ Makunu lezi a nga wa zi maha zi wa bihile mahlweni ka Jehova, hikwalaho Jehova i lo mu dayawu kambe.

¹¹ Zonake Juda aku ka Tamari, a katamwane wakwe: Yana ka raru wa wena u ya tshama na u hi noni, kala Xela a nʼwana wa mina a kula. Hakuva i wa alakanya ku ngalo a nga fawu kota vanakulobye. Hikwalaho Tamari i loya kabye.

¹² Na ku hunzile masiku yo tala, a nhanyana wa Xua, kata Juda, i lofa; zonake laha Juda na a chavelelwe, i lo kanziha aya Timna ka vakayi va tiyivu takwe, zinwe ni munghana wakwe Hita a muAdulamu.

¹³ X lo byelwa Tamari lezaku, a nwingi Wa wena i kanzihile Timna ku ya kaya tiyivu takwe.

¹⁴ Yena i lo susa tinguwo ta wunoni gakwe, i lo ambala tinguwo to vevuka, a ti fenengeta kambe ha tona, i lo ya tshama laha nyangweni ya le Enaime hi le ndleleni ya kuya le Timna. Hakuva i lo wona lezaku Xela i wa kulile, kanilezi i wa nga nyikiwi a kuva a maha sati wakwe.

¹⁵ Laha Juda a nga mu wona i lo alakanya lezaku xibhayi; hakuva i wa fenengetile a nghohe yakwe.

¹⁶ Zonake i lo hambuka aya ka yena, aku: Nzi vumele nzita ka wena. Hakuva i wa nga zi tivi lezaku i katamwane Wakwe, hakuva i wa fenengetile a nghohe yakwe. Zonake aku: U ta nzi nyika yini loku u enghena ka mina?

¹⁷ Yena aku: Nzi ta ku rumela a ximhutana xa le ntlhambini wa mina. Wasati aku: Nzi ta sala ni xifungo muni u kala u rumela a ximhutana?

¹⁸ Yena i te ngalo: U lava a xifungo muni? Wasati aku: Nzi lava a xingwavila xa wena, ni masinza ya wena, ni nhonga leyo yi nga canjeni ga wena. Yena i lo zi nyika ka yena, i loya enghena ka yena, a mu xurisa nyimba.

¹⁹ Yena i lo suka a famba a ya susa tinguwo leto, a ambala ta wunoni gakwe.

²⁰ Juda i lo rumela hi canja ga munghana wakwe, wa muAdulamu, kasi a ta teka zitsumhiso zakwe canjeni ga wasati; kanilezi i lo ta kuma lezaku a nga kona.

²¹ Zonake i lo wutisa ka vanhu va laho mutini, aku: I kwihi loyi wa xibhayi a nga wa hi Enaime, kusuhani ni ndlela? Vona vaku: Laha a ku na ngava ni xibhayi.

²² Yena i lo tlhela aya ka Juda,, a yaku: A nzi mu kumangi; a vanhu va laho mutini va te ngalo: Ku wa nga hi na xibhayi laha.

²³ Juda aku: A zi hlayise, ku nga taku hi kuma tingana; nzi rumele lexi ximhutana, kanilezi a ku mu kumangi.

²⁴ Zonake hi nzhako ka tihweti tinharu, Juda i lo byeliwa lezaku: A katamwane wa wena Tamari i bhayile; ni lezaku i kumile a nyimba ya wubhayi. Juda aku: Mu humeseni a hiswa.

²⁵ Zonake laha va nga mu humesa, i lo rumela mhaka ka nwingi wakwe, aku: Loyi a nga nzi xurisa nyimba hi nwinyi wa lezi zilo. Cuwukisisa, u ta tiva lezaku lezi za mani, lexi xingwavila xa xifungo, ni masinza, ni nhonga leyi.

²⁶ Zonake Juda i lo zi tiva, aku: I lulamile ku hunza mina, hakuva a nzi mu nyikelangi ka Xela, a nʼwana wa mina. A nga ha engetangi aya ka yena kambe.

²⁷ Zonake laha a xikhati xa ku hefemula xi nga wa chikele, i lo hefemula mahahla.

²⁸ Makunu laha a nga kari a hefemula, a munwani i lo humesa canja: a sungukati gi lo teka lihinza lo pswhuka gi lo mu boha, giku: Loyi hi yena a nga ranga ku huma.

²⁹ Makunu laha a nga wa tlhelisa a canja gakwe a makabye wakwe i lo huma. A sungukati giku: U fohlele yini? Zonake i lo mu chula vito ga Perezi.

³⁰ Hi lenzhako ku lo huma nakulobye loyi a nga wa hi ni lihinza lo pswhuka a canjeni gakwe; i lo mu chula a vito ga Zera.