Genesisi 37 - Tshwa Bible

¹ Jakobe i wa akile tikweni ga le Kanani legi a raru wakwe a nga luvele ka gona.

Josefa a xaviswa ni ku yiswa le Gipite.

² Makunu a tixaka ta Jakobe hi leti: Josefa i wa hi ni 17 wa malembe na a kari a risa mitlhambi zinwe ni vanakulobye; makunu a mufanyana loyi i wa tolovelene ni vana va Bilha, ni vana va Zilpa, a vasati va raru wakwe; na Josefa i woya a blevela a raru wakwe a wudumo ga kubiha kabye.

³ Makunu Israeli i wa ranza Josefa ku hunza vontlhe vana vakwe, hakuva i wa hi nwanana wa wukhosana gakwe; i lo mu mahela a bhaji go leha.

⁴ Makunu laha vanakulobye va nga wona lezaku wa ranziwa hi raru wabye ku hunza vontlhe vanakulobye, zonake va lo mu venga, va nga wulawuli naye hi kurula.

⁵ Josefa i lo lora a noro a byela a vanakulobye, vona va lo mu venga nguvu.

⁶ Hakuva i te ngalo kabye: Zwanani a noro lowu nzi lorileko!

⁷ Hi wa kari hi boha a milumbi le masinwini; Zonake nzi lo wona a numbi wa mina na wu suka wu yima; zonake nzi wona a milumbi ya nwina yi ta ranzela a numbi wa mina yi wu khizamela.

⁸ A vanakulobye vaku ka yena: Kasi u tava hosi ya hina, u fuma hehla ka hina ke? Zonake va lo mu venga nguvunguvu hi kota ya miloro yakwe ni kuwulawula kakwe.

⁹ Zonake i lo lora munwani noro, i lo engeta a byela vanakulobye, aku: Nzi lorile munwani noro kambe; nzi lorile na nzi wona a gambo ni hweti ni tinyeleti ta khume ni yinwe na zi nzi khizamela.

¹⁰ Laha a nga byela a raru wakwe ni vanakulobye; a raru wakwe i lo mu kawuka, aku: I noro muni lowo u lorileko ke? Kasi mina ni nyine wa wena ni vanakuloni hi ta khizama mahlweni ka wena hi ku khozela ke?

¹¹ Zonake a vanakulobye va lo mu mahela mona; kanilezi a raru wakwe i lo alakanya a timhaka leto a ti hlayisa.

¹² Zonake a vanakulobye va Josefa va lo famba kuriseni ka mitlhambi ya raru wabye le Xekemi.

¹³ Israeli i te ngalo ka Josefa: A vanakuloni a va le kuriseni ka mitlhambi le Xekemi ke? Ngonake, nzi ku ruma ka vona. Yena aku: Nzi laha.

¹⁴ Yena aku kakwe: Wa ngaya u ya va wona, u tiva lezaku a vanakuloni va hanyisa kuyini zinwe ni mitlhambi yabye, u ta wuya u ta nzi byela a timhaka ta kona. Zinghaho i lo mu rumisa lezo hi le nkoveni wa Hebroni aya le Xekemi.

¹⁵ Zonake i lo kumiwa hi munhu wo kari na a kari a nzula lomu xiwuleni, a munhu loye i lo mu wutisa aku: U lava yini?

¹⁶ Josefa i lo hlamula, aku: Nzi lava vanakulori, va risela kwihi?

¹⁷ A munhu aku ka yena: Va sukile laha, hakuva nzi va zwile vaku ngalo: A hi yeni le Dotani. Zonake Josefa i lo va lanza, a ya va kuma le Dotani.

¹⁸ Laha va nga mu wona na ha hi kule, na a nga se chikela kusuhani, va lo xuxa xikungo xa ku mu daya,

¹⁹ Va lo wulawulisana, vaku: Wata nyamilorwani, hi loyi.

²⁰ Ngonani hi ta mu daya hi mu hoxa rinzini, hi ta yaku: I delwe hi zivanza; hi ta wona lezaku a miloro yakwe yi ta kuyini.

²¹ Rubeni i lo zizwa, yena i wa lava ku mu ponisa mandleni yabye, aku: Ngha hi nga mu dayi.

²² Rubeni i lo engeta aku: Mu nga halati nkhata, kanilezi mu hoxeni lomu rinzini ga le xiwuleni, mu nga kali mu veka canja hehla ka yena. Yena i lo wula lezo kasi ku mu ponisa mandleni yabye, a mu tlhelisa ka raru wakwe.

²³ Laha Josefa a nga chikela ka vanakulobye, va lo mu runzuwula a bhaji gakwe, gona bhaji legi go leha a nga wa ambele.

²⁴ Va lo mu khoma va mu hoxa lomu rinzini; ni rinzi gi wa nga hi na nchumu, a mati ma wa hi hava.

²⁵ Zonake va to tshama lahasi vaga. Lokuloku va lo tlakusa a mahlo yabye va wona a ntlawa wa va ka Ixmaeli na vata hi le Gileadi, na va hi ni makameli na ma rwele a hlakati ni makha, na vaya nazo le Gipite.

²⁶ Zonake Juda aku ka vanakulobye: Xana hi ta bhinzula yini loku hi daya a nakulori, hi fihla nkhata wakwe ke?

²⁷ Ngha hi mu xavisa ka vaIxmaeli, kasi a mandla ya hina ma ngavi hehla kakwe, hakuva yena i nakulori, i nyama yinwe na hina. A vanakulobye va lo mu vumela.

²⁸ Laha va nga wa hunza va mahungani va maMidiani, va lo humesa Josefa hi lomu rinzini, zonake va lo mu xavisa ka vaIxmaeli hi mali yo basa ya 20 wa maxekeli. A vamahungani va lo famba na Josefa le Gipite.

²⁹ Zonake Rubeni i lo tlhela aya rinzini, i loya wona lezaku Josefa a nga kona.

³⁰ Hikwalaho i lo hanzula tinguwo takwe, i lo wuya ka vanakulobye aku: A nwanana a nga ha hi kona, xana nzi taya kwihi mina?

³¹ Zalezo va lo daya ximhutana, va teka bhaji ga Josefa va lo gi totela nkhata;

³² va lo rumela a bhaji lego go leha ka raru wakwe, va yaku: Hi nga cuwuka a bhaji legi hi nga gi kuma, kutani i bhaji ga nʼwana wa wena, kutani a hi gona.

³³ Jakobe i lo gi tiva aku: Hi gona a bhaji ga nʼwana wa mina; i gilwe hi zivanza! Mayo! Josefa i pfhemulwe!

³⁴ Jakobe i lo hanzula tinguwo takwe, i lo boha tisakwa, a rila nʼwana wakwe masiku yo tala.

³⁵ A vafana vakwe vontlhe ni vanhanyana vakwe vontlhe va lo mu chavelela, kanilezi i lo ala ku chavelelwa, aku: Nzi ta relela nziya kufeni a ka nʼwana wa mina hi hlomulo. A raru wakwe i lo mu rilela.

³⁶ Zonake a maMidiani ma lo ya mu xavisa le Gipite ka Potifare a nduna ya Faro a murangeli wa vanyakasani.