Genesisi 35 - Tshwa Bible

Nungungulu a katekisa Jakobe le Beteli.

¹ Nungungulu aku ka Jakobe: Rura u kanziha kuya Beteli, u ya tshama kona; u ta ya aka kwalaho a alati ga Nungungulu loyi a nga woneka ka wena xikhatini lexo u nga wa chava mahlweni ka nakuloni Esau.

² Jakobe i lo byela vanhu va ngango wakwe ni vontlhe lava va nga hi zinwe naye, aku: Susani vanungungulu va matiko; lava mu nga navo, mu ti basisa mu ambala tinguwo tinwani. Jox. 24:2, 23; 1 Sam. 7:3

³ Zonake hi ta suka hi kanziha hiya Beteli, nzi ta ya aka laho a alati ga Nungungulu loyi a nga nzi hlamula xikhatini xa kuxaniseka ka mina; i wa hi na mina ndleleni leyi nzi nga wa famba ka yona.

⁴ Va lo hendleleta ka Jakobe vontlhe vanungungulu va matiko, lava va nga wa hi navo, ni zingwavila lezi zi nga wa hi tindleveni tabye, Jakobe i lo zi kolela lahasi ka nkuhlu lowu wu nga wa hi kusuhani ni le Xekemi.

⁵ Va lo andlamuka. A xichavo xa Nungungulu xi wa hi ka miti leyo yi nga wa va ranzele, hikwalaho vona a va va lanzangi a vana va Jakobe.

⁶ Jakobe ni vontlhe vanhu lava a nga wa hi navo va lota Luza, ku nga kona Beteli, tikweni ga Kanani.

⁷ Zonake i lo aka laho a alati, a gi chula wutshamu lego ku ngalo, El-Beteli; hakuva hi kwalaho Nungungulu a nga ti wonekelisa ka yena xikhatini lexi a nga wa chava nakulobye.

⁸ Ku lofa Debora, a muanwisi wa Rebeka; i lo lahliwa lahasi ka Beteli, a hasi ka nkuhlu; hikwalaho va lo wu chula vito gaku i Nkuhlu wa Mihloti.

⁹ Nungungulu i lo engeta a ti wonekelisa ka Jakobe laha na a wuya hi le Padanaramu, i lo mu katekisa.

¹⁰ Nungungulu i te ngalo kakwe: A vito ga wena u Jakobe, kanilezi a vito ga wena va nga ta ha wula vaku Jakobe; a vito ga wena u Israeli; zalezo i lo mu chula vito ga Israeli.

¹¹ Nungungulu aku kakwe: Hi mina Nungungulu wa ntamu wontihe; pswalani mu anza. Ku ta huma hi ka wena a tiko, ni wunyingi ga matiko, ni tihosi ti ta huma hi xiwunwini xa wena.

¹² A tiko legi nzi nga nyika Abrahama na Isaka, nzi ta gi nyika ka wena, nzi ta gi nyika ni ka pswalo wa wena anzhako ka wena.

¹³ Nungungulu i lo kanziha, a suka ka wutshamu lego a nga wa wulawula zinwe naye.

¹⁴ Jakobe i lo aka a mhinga ya maribye ka wutshamu lego Nungungulu a nga wulawula naye ka gona, i lo phahlela hehla ka yona, i lo chela mafura hehla ka yona.

¹⁵ Jakobe i lo chula a wutshamu lego Nungungulu a nga wa wulawula naye ka gona, a vito ga Beteli.

¹⁶ Va lo suka Beteli. Na ka ha hi pfhukana ku chikela Efrata; Rakeli i lo lunwa, kanilezi ku hefemula ku wa tsanza.

¹⁷ Makunu laha kuhefemula ku nga wa tsanza, a sungukati giku ka yena: U nga chavi, hakuva u ta kuva ni nisanyana munwani.

¹⁸ Zonake laha wu nga wa huma muhefemulo wakwe, i lo mu chula vito ga Ben-oni na a nga se kufa; kanilezi a raru wa mune i lo mu chula vito ga Benjamini.

¹⁹ Zinghaho Rakeli i lofa a lahliwa laha ndleleni ya kuya Efrata, ku nga Betlehema.

²⁰ Jakobe i lo aka xialakanyiso hehla ka nkele wakwe; xialakanyiso xa nkele wa Rakeli kala nyamutlha.

²¹ Israeli i lo suka, a gwimba tenda gakwe mahlweni ka Migdal-Edere.

²² Zonake laha Israeli na akile ka lego tiko, Rubeni i lo etlela na Bilha, a mundlukulu wa raru wakwe; Israeli i lozwa mhaka leyo. Makunu a vana va Jakobe va wa hi khume ni vambiri.

²³ A vana ya Lea hi Rubeni, a matewula ya Jakobe, na Simoni, na Levi, na Juda, na Isakari, na Zebuloni.

²⁴ A vana va Rakeli hi Josefa na Benjamini.

²⁵ A vana va Bilha, a nanza ga xisati ga Rakeli, hi Dani na Naftali.

²⁶ A vana va Zilpa, a nanza ga xisati ga Lea, hi Gadi na Axeri. Lava hi vana va Jakobe lava a nga beleka le Padanaramu.

²⁷ Zonake Jakobe i lo chikela ka Isaka, a raru wakwe, le Mamre a mutini wa Kiryat-arba kwale. Hebroni, laho ku tshamileko Abrahama na Isaka.

²⁸ A masiku ya Isaka ma wa hi 180 wa malembe.

²⁹ Zonake Isaka i lo nyikela moya wakwe, afa; i lo amukelwa ka va ka kabye na a hi wa kale, a hi ni masiku yo tala; a vana vakwe Esau na Jakobe, va lo mu lahla.