Genesisi 26 - Tshwa Bible

Isaka a famba le Gerari.

¹ Ku wa hi kona a ndlala lomu tikweni, na ku nga hi leʼyo sangula yi nga wa hi kona xikhatini xa Abrahama. Isaka i loya le Gerari, ka Abimeleki, a hosi ya maFilistia.

² Jehova i lo woneka ka yena, aku ngalo: U nga releli uya Gipite;: aka lomu tikweni legi nzi ta nga ku byela gona.

³ Tshama tikweni legi, nzi tava na wena, nzi ku katekisa; hakuva wontihe laya matiko nzi ta ma nyika ka wena ni ka pswalo wa wena, nzi ta tiyisa xifungo lexi nzi nga hlambanya ka Abrahama a raru wa wena.

⁴ Nzi ta anzisa a pswalo wa wena, va ku khwatsi hi tinyeleti ta tilo, nzi ta nyika ka pswalo wa wena wontihe laya matiko; hi ka pswalo wa wena wontihe matiko ya misava ma ta katekiswa;

⁵ hakuva Abrahama i lozwa a gezu ga mina, a ingisa kuwula ka mina ni ziyimiso za mina ni zileletelo za mina, ni milayo ya mina.

⁶ Isaka i lo tshama le Gerari.

⁷ Zonake a vanhu va lego wutshamu va lo mu wutisa hi sati wakwe; yena aku ngalo makweru; hakuva i lo chava ku ngalo i sati wa mina, hi ku kutani a vanhu va lego wutshamu va nga nzi daya hi ku fela Rebeka; hakuva i wa hi mbhuri kucuwukekeni.

⁸ Laha na a tshamile kona xikhati xo leha, Abimeleki a hosi ya maFilistia, i lo cuwuka hi laha njhaneleni, i lo wona Isaka na a xwangana na Rebeka a sati wakwe.

⁹ Abimeleki i lo vitana Isaka, aku kakwe: Languta, yena i sati wa wena hakunene; u wulele yini ku ngalo makwenu ke? Isaka aku ngalo kakwe: Hakuva nzi lo chava ku dawa hi kota yakwe.

¹⁰ Abimeleki aku ngalo: Xini lexi u xi mahileko ka hina ke? Kutsongwani kaku ngha munhu a etlele ni sati wa wena, u wa ta ngha u hi vangele a nanzu.

¹¹ Abimeleki i lo leletela vanhu vakwe, aku: Loye a khomako hi kubiha loyi munhu ni sati wakwe i ta dawa futsi,

¹² Isaka i lo, rima ka lego tiko, a kuma hi ka zana lego lembe, hakuva Jehova i lo mu katekisa.

¹³ Yena i lo kula, a simama ku kula a maha munhu wa hombe futsi.

¹⁴ I wa fuyile tiyivu ni tihomu, ni malanza yo tala; ni maFilistia ma lo mu lusela.

¹⁵ A tihlowo tontlhe leti ti nga wa kelilwe hi malanza ya raru wakwe a masikwini ya Abrahama, a maFilistia ma wa ti seletele, ma ti fuvisa. Gen. 21:25

¹⁶ Abimeleki aku ngalo ka Isaka: Suka lomu ka hina, hakuva wa hi pala nguvu.

¹⁷ Isaka i lo suka lomo, a ya govela lomu mikoveni ya Gerari, a tshama kona.

¹⁸ Isaka i lo kela kambe a tihlowo ta mati, leti ti nga wa kelilwe xikhatini xa Abrahama a raru wakwe, hakuva a maFilistia ma wa ti seletela anzhako ka kufa ka Abrahama, i lo ti vitana hi mavito lawa a raru wakwe a nga ma chulile.

¹⁹ A malanza ya Isaka ma wa kela lomu nkoveni, ma lo kuma laho a hlowo ya mati ma khulungako.

²⁰ Zonake a varisi va le Gerari va lo kanetisana ni varisi va Isaka, vaku: I mati ya hina. Yena i lo chula a vito ga hlowo ku Eseki; hakuva va lo kanetisana naye.

²¹ Va lo engeta va kela yinwani hlowo; va lo kanetisana ha yona kambe; i lo chula vito ga yona ku Sitna.

²² Yena i lo suka leyo, i lo engeta a kela yinwani hlowo; leyoke a va kanetisanangi ha yona. I lo chula vito ga yona ku Rehoboti; na aku ngalo: Hakuva Jehova i hi nyikile wutshamu, hi ta pswalelana lomu tikweni.

²³ Yena i lo suka a kanziha aya Berexeba.

²⁴ Hi lego wusiku Jehova i lo woneka ka yena, aku: Hi mina Nungungulu wa Abrahama a raru wa wena; u nga chavi, hakuva nzi na wena, nzi ta ku katekisa, nzi anzisa a pswalo wa wena hi kota ya Abrahama a nanza ga mina.

²⁵ Yena i lo aka laho a alati, a khozela vitweni ga Jehova, i lo yimisa a tenda gakwe laho; kwalaho a malanza ya Isaka ma lo kela a hlowo.

²⁶ Zonake Abimeleki i loya kakwe na ata hi le Gerari, na Ahuzatu, xaka gakwe, na Fikoli a nduna ya yimpi yakwe.

²⁷ Isaka aku ngalo kakwe: Mu tela yini ka mina na mu kari mu nzi venga? Mu nzi hlongole ka nwina.

²⁸ Vona vaku ka yena: Ha wona ziku dlunya, lezaku Jehova i na wena; hi nge ngalo: A xive kona xifungo xikari ka hina, hina na wena, hi maha xivumelwano na wena,

²⁹ lezaku u nga hi maheli kubiha, hilezi a hi ku xanisangi, hilezi hi ku mahele zinene khwatsi, hi lo ku fambisa hi kurula; kota lezi u katekisilweko hi Jehova.

³⁰ Yena i lo va mahela zakuga, va loga, vanwa.

³¹ Va lo vuka ni mixo va hlambanyelana; Isaka i lo va fambisa, va famba hi kurula.

³² Zonake ka gwalego siku a malanza ya Isaka va lota mu byela hi hlowo leyi va nga kari va kela, vaku kakwe: Hi kumile a mati.

³³ Yena i lo yi vitana aku ngalo, Xiba: hikwalaho ku humako a vito ga muti wa Berexeba kala ni nyamutlha.

³⁴ Esau i wa hi ni 40 wa malembe, i lo teka vasati, Juditi, a nhwana wa Beri a muHiti, na Basemati, a nhwana wa Elone a muHiti;

³⁵ kanilezi va wa hi zikarato mbilwini ya Isaka na Rebeka.