Genesisi 20 - Tshwa Bible

Abrahama na Abimeleki.

¹ Abrahama i lo rura laho aya tikweni ga le Dzongeni, i lo tshama xikari ka Kadexi ni Xure; a luvela Gerare.

² Abrahama i lo wula hi Sara a sati wakwe, lezaku makweru, na Abimeleki a hosi ya le Gerare i lo ruma ku ya teka Sara.

³ Kanilezi Nungungulu i lota ka Abimeleki a norweni wa wusiku, i te ngalo kakwe: Languta, wena u file hi kota ya loyi wasati u mu tekileko; hakuva i sati wa vambe.

⁴ Kanilezi Abimeleki i wa nga se tshinela ka yena; i te ngalo: Hosi, u ta lovisa a tiko gi lulamileko ke?

⁵ A nga wulangi ka mina lezaku loyi makweru ke? Na yenawu wasati a nga wulangi ka mina lezaku makabye wa mina ke? Nzi mahile lezi zilo hi kululama ka mbilu ya mina ni kubasa ka canja ga mina.

⁶ Nungungulu i te ngalo kakwe le norweni: Nza zi tiva lezaku u mahile lezo zilo hi kululama ka mbilu ya wena; hikwalaho nzi lo ku siwukisa mina, akuva u nga nzi onheli; hi kota ya lezo a nzi ku vumelangi a kuva u mu henya.

⁷ Hikwalaho tlhelisa a sati wa vambe, hakuva a nuna wakwe muprofeti, i ta ku kombelela u hanya, kanilezi loku u nga mu tlhelisi, zi tive lezaku wena u tafa futsi ni zontlhe lezi zi nga za wena.

⁸ Abimeleki i lo vuka ni mixo, i lo vitana wontihe malanza yakwe, a va byela tontlhe leti timhaka; ni vanhu va lo chava nguvu.

⁹ Zonake Abimeleki i lo vitana Abrahama, aku ngalo kakwe: U mahile yini ka mina ke? Nzi onhile yini ka wena ke? U neha a nanzu wa hombe ka mina ni mufumo wa mina hi kota ya yini ke? U nzi mahele lezi zi nga faneliko a ku mahiwa.

¹⁰ Abimeleki i lo engeta aku ngalo ka Abrahama: U wona yini, u mahele yini lezi ke?

¹¹ Abrahama aku ngalo: Hakuva nzi waku ku hava kuchava Nungungulu ka legi wutshamu; nziku kutani va nga nzi daya hi ku fela a sati wa mina.

¹² Kanilezi laha kaku makweru, lelo lisine hakuva i nhanyana wa dadani, kanilezi a nga belekwi hi mamani, lezo i lo maha sati wa mina.

¹³ Zonake loku Nungungulu a nzi mahile munzulanzuli hi le ndlwini ya dadani wa mina, nzi te ngalo kakwe: Legi hi wuxinji legi u to mahela gona ka matshamu wontihe lawo hi ta ngaya ka wona, wula ha mina aku: Loyi makabye wa mina.

¹⁴ Abimeleki i lo teka tiyivu ni tihomu, ni malanza, ni malanza ya xisati, a nyika Abrahama, a tlhelisa Sara a sati wakwe.

¹⁵ Abimeleki i te ngalo: Languta, a tiko ga mina gi le mahlweni ka wena; aka laho u ku ranzako.

¹⁶ A ka Sara i te ngalo: Languta, nzi nyikile ka makabye wa wena a 1,000 wa zipanze za siliva: languta, zona zi tava xifenengeto xa mahlo ya wena ka vontlhe lavo u nga navo, lezaku gi basisilwe a vito ga wena.

¹⁷ Abrahama i lo kombela ka Nungungulu: na Nungungulu i lo hanyisa Abimeleki ni sati wakwe, ni malanza yakwe ya xisati; va lo beleka.

¹⁸ Hakuva Jehova i wa valile hakunene wontihe a marumbu ya yindlu ya Abimeleki hi kota ya Sara, a sati wa Abrahama.