Genesisi 15 - Tshwa Bible

Abrama a tsumbiswa a nwanana.

¹ Anzhako ka lezi zilo ni gezu ga Jehova gi lota ka Abrama hi kulora, giku: U nga chavi, Abrama! Nzi xitlhangu xa wena; a nchachazelo wa wena wa hombe nguvu.

² Abrama i te ngalo: Hosi Jehova, u ta nzi nyika yini ke? Nzi suka na nzi nga hi na nʼwana, loyi a ta ngaga a tshomba ya mina, kasi Eliazare wa le Damasku i tava mugi wa tshomba ya mina.

³ Abrama i te ngalo: Languta, a ku nzi nyikangi a nʼwana; hi nga cuwuka, a nanza ga ku belekwa lomu ndlwini ya mina gi tava mugi wa tshomba ya mina.

⁴ Zonake a gezu ga Jehova gi lota, giku: Loye a nga ta kuva mugi wa tshomba ya wena; kanilezi loyi a ta nga belekwa hi wena, hi yena a ta ngava mugi wa tshomba ya wena.

⁵ Yena i lo mu humesa lahandle aku ngalo: Cuwuka le tilweni, u hlaya tinyeleti, loku u zi kota ku ti hlaya. Yena i te ngalo kakwe: Zi tava nghaho ni pswalo wa wena. Deut. 10:22; Maheb. 11:12

⁶ Abrama i lo kholwa Jehova; hi kukholwa loko Jehova i lo mu hlayela kululama. Rom. 4:3; Gal. 3:6; Jak. 2:23

⁷ Yena i te ngalo ka yena: Hi mina Jehova loyi a nga ku humesa le Ure wa maKaldea, kasi nzi ku nyika legi tiko kuva tshomba ya wena.

⁸ Yena i lo hlamula, aku: Hosi Jehova, nzi ta zi tivisa kuyini lezaku gi tava tshomba ya mina ke?

⁹ Jehova i te ngalo: Nzi tekele a role ga malembe manharu, ni mbuti ya phaphakazi yi nga ni malembe manharu, ni hamba ya malembe manharu, ni tuva ni vinyani ga xipomba.

¹⁰ Na yena i lo mu tekela zontlhe lezo zihari, a zi avanyisela hi laha xikari, i lo zi xaxameta zi cuwukana; kanilezi a zinyanyani a nga zi avanyisangi.

¹¹ A makoti ma lota hehla ka zirumbi, Abrama i lo ma hlongola.

¹² Zonake hi kupela ka gambo, a wurongo ga hombe gi lota ka Abrama; languta, ku lota kakwe a kuchava ni munyama wo tshisa.

¹³ Na yena i te ngalo ka Abrama: Zi tive khwatsi lezaku a pswalo wa wena wu tava valuveli a tikweni legi gi nga hiko gabye, va ta ya khoza; va ta xaniswa 400 wa malembe;

¹⁴ kanilezi a mufumo lowo va ta nga wu khozela nzi ta wu lamula; ni nzhako ka lezo va ta huma ni kufuma ka hombe.

¹⁵ Kanilezi wena u taya ka vararu va wena hi kurula; u ta kelelwa na u khosahele.

¹⁶ Hi ka xizukulwana xa wumune va ta wuya kambe lomu: hakuva a kuonha ka maAmori lezi a ku se nga tala.

¹⁷ Laha kuphumeni ka gambo ku wa hi kona a munyama, languta, a phingo ga musi ni kungangamela ka nzilo zi lo hunza xikari ka zipanzana lezo.

¹⁸ Lego siku Jehova i lo maha xivumelwano na Abrama, aku: Nzi nyikile ka pswalo wa wena legi tiko, kusukela congweni wa le Gipite kala gi chikela a congweni wa hombe, wona congo wa Eufrate:

¹⁹ a maKeni, ni maKenizi, ni maKademoni,

²⁰ ni maHiti, ni maPerizi, ni maRefaime,

²¹ ni maAmori, ni maKanani, ni maGirgaxi, ni maJebusi.