Genesisi 12 - Tshwa Bible

Abrama a suka le Harani.

¹ Makunu Jehova i te ngalo ka Abrama: Suka tikweni ga nwina, ni le maxakeni ya wena, ni le ndlwini ya raru wa wena, uya tikweni legi nzi ta nga ku kombisa gona. Miti. 7:3; Maheb. 11:8

² Nzi ta ku maha lixaka la hombe, nzi ta ku katekisa, nzi kulisa a vito ga wena; u ta kuva xikatekiso.

³ Nzi ta va katekisa lavo va ku katekisako, nzi mu ruka loye a ku rukatelako; hi ka wena wontihe matiko ma ta katekiswa. Miti. 3:25; Gal. 3:8

⁴ Zinghaho Abrama i lo suka kota lezi Jehova a wulileko ka yena, na Loti i lo famba naye. Na Abrama i wa hi ni 75 wa malembe laha a nga suka Harani.

⁵ Na Abrama i lo teka Sarai a sati wakwe, na Loti a nʼwana wa nakulobye, ni tshomba yabye yontlhe, leyi va nga wa fuyile, ni malanza lawa va nga wa ma kumile le Harani; va lo suka vaya tikweni ga le Kanani.

⁶ Na Abrama i lo tsemakanya tiko aya chikela tikweni ga le Xekemi, sinyeni ya More. A maKanani ma wa akile lomo tikweni xikhatini lexo.

⁷ Jehova i lo woneka ka Abrama, aku ngalo; Nzi ta nyika ka pswalo wa wena legi tiko. Zonake i lo aka a alati ga Jehova, loyi a nga woneka ka yena laho. Neh. 9:8; Miti. 7:5; Gal. 3:16

⁸ I lo rura laho aya xitsungeni le Mutsuwuka-gambo wa Beteli, a ya yimisa a tenda gakwe kona, kasi Beteli ku le Muhlwa-gambo, ni Ai ku le Mutsuwuka-gambo; laho i lo aka a alati ga Jehova, a khozela a vitweni ga Jehova kona.

⁹ Zonake Abrama i lo simama ku famba a komama Dzongeni.

Abrama a famba le Gipite.

¹⁰ Ku wa hi ni ndlala lomu tikweni; na Abrama i lo relela le Gipite a ya tshama kona, hakuva a ndlala yi wa kulile tikweni.

¹¹ Laha a nga wa tshinela ku enghena Gipite, i te ngalo ka Sarai, a sati wakwe: Wa wona, nza zi tiva lezaku u mbhuri ya wasati.

¹² Laha a vaGipite va ta nga ku wona, va taku ngalo: Loyi hi sati wakwe, va ta nzi daya, wena u hanya.

¹³ Wula ka vona uku u makweru, kasi ku mahiwa khwatsi ka mina hi kota ya wena; kasi nza hanya hi kota ya wena.

¹⁴ Zonake laha Abrama a nga enghena Gipite, a vaGipite va lo wona wasati lezaku i sasekile nguvu.

¹⁵ Ni tinduna ta Faro ti lo mu wona ti babaza ha yena mahlweni ka Faro; ni wasati i lo engheniswa lomu ndlwini ya Faro.

¹⁶ Na Abrama i lo khomiwa khwatsi hi kota ya sati wakwe, na yena i wa hi ni tiyivu ni tihomu, ni vamatsune va timbongola, ni malanza ya xinuna ni ya xisati, ni timbongola ta mikati ni makameli.

¹⁷ Na Jehova i loba Faro ni yindlu yakwe hi mababyi ya hombe hi kota ya Sarai, a sati wa Abrama.

¹⁸ Na Faro i lo vitana Abrama i te ngalo: Zini lezi u mahileko ka mina ke? hi yini u nga kala ku nzi byela ku ngalo i sati wa wena ke?

¹⁹ U wulele yini ku ngalo makwenu, kala nzi mu teka akuva sati wa mina ke? Languta, hi loyi a sati wa wena, mu teke u famba.

²⁰ Na Faro i lo leletela a vanhu vakwe ha yena, va mu fambisa zinwe ni sati wakwe, ni zontlhe lezi a nga hi nazo.