Genesisi 11 - Tshwa Bible

A tawa ga le Babeli.

¹ A misaveni yontlhe ku wa hi ni lirimi linwe ni kuwulawula kunwe.

² Na ku mahisile lezo a kusukeni kabye vaya le Mutsuwuka-gambo, va lo kuma a mikova a tikweni ga Xinari; va lo aka ka gona.

³ Va lo wulawulisana vaku ngalo: A hi maheni zitini, hi zi hisa khwatsi. A zitini zi wa hi maribye yabye, ni biturni ku wa hi nzhope yabye.

⁴ Vaku: A hi akeni a muti ni likhokhola, leli a xixungwa xa lona xi ta nga chikela tilweni; hi ti chula a vito kasi hi nga hangalaki misaveni yontlhe.

⁵ Jehova i lo relela a ku ta wona a muti ni likhokhola, leli a vana va vanhu va nga wa li aka.

⁶ Na Jehova i te ngalo: Langutani; a tiko ginwe, ni lirimi linwe ka vona vontlhe; makunu va sangula ku maha lezi, na kona a ku na nchumu xi ta nga va tsimbeta a ka zontlhe lezi va xuvileko ku zi maha.

⁷ A hi releleni hi ya hakasa a lirimi labye, kasi va nga zwanani kuwulawuleni.

⁸ Zinghaho Jehova i lo va hangalasa misaveni yontlhe, va tsika ku aka muti.

⁹ Hikwalaho a vito ga wona va lo wu vitana ku ngalo hi Babeli; hakuva Jehova i lo hakasa a lirimi la tiko gontlhe; na Jehova i lo va hangalasa misaveni yontlhe.

A zizukulwana za Xemi.

¹⁰ Lezi hi zizukulwana za Xemi. Laha Xemi a nga hi ni 100 ga malembe i lo beleka Arpaxade, malembe mambiri anzhako ka ntalo.

¹¹ Hi le nzhako ka kubelekwa ka Arpaxade, Xemi lo hanya 500 wa malembe, a beleka varisanyana ni vanhanyana.

¹² Laha Arpaxade a nga hi ni 35 wa malembe i lo beleka Xela.

¹³ Anzhako ka ku beleka Xela, Arpaxade i lo hanya 403 wa malembe, a beleka varisanyana ni vanhanyana.

¹⁴ Laha Xela a nga hi ni 30 wa malembe i lo beleka Eberi.

¹⁵ Anzhako ka kubelekwa ka Eberi, Xela i lo hanya 403 wa malembe, a beleka varisanyana ni vanhanyana.

¹⁶ Laha Eberi a nga hi ni 34 wa malembe i lo beleka Pelegi.

¹⁷ Anzhako ka kubelekwa ka Pelegi, Eberi i lo hanya 430 wa malembe, a beleka varisanyana ni vanhanyana.

¹⁸ Laha Pelegi a nga hi ni 30 wa malembe i lo beleka Rehu.

¹⁹ Anzhako ka kubelekwa ka Rehu, Pelegi i lo hanya 209 wa malembe, a beleka varisanyana ni vanhanyana.

²⁰ Laha Rehu a nga hi ni 32 wa malembe i lo beleka Serugi.

²¹ Anzhako ka kubelekwa ka Serugi, Rehu i lo hanya 207 wa malembe, a beleka varisanyana ni vanhanyana.

²² Laha Serugi a nga hi ni 30 wa malembe i lo beleka Nahori.

²³ Anzhako ka kubelekwa ka Nahori, Serugi i lo hanya 200 wa malembe a beleka varisanyana ni vanhanyana.

²⁴ Laha Nahori a nga hi ni 29 wa malembe i lo beleka Tera.

²⁵ Anzhako ka kubelekwa ka Tera, Nahori i lo hanya 119 wa malembe, a beleka varisanyana ni vanhanyana.

²⁶ Laha Tera a nga hi ni 70 wa malembe i lo beleka Abrama, na Nahori, na Harani.

A zizukulwana za Tera.

²⁷ Makunu lezi hi zizukulwana za Tera: Tera i lo beleka Abrama, na Nahori, na Harani; Harani i lo beleka Loti.

²⁸ Harani i lofa hi mahlweni ka Tera a raru wakwe, a tikweni legi a nga belekelwa ka gona, lomu Ure wa maKaldea.

²⁹ Abrama na Nahori va lo ti tekela vasati; a vito ga sati wa Abrama hi Sarai, ni vito ga sati wa Nahori hi Milka, a nhanyana wa Harani, raru wa Milka na Iska.

³⁰ Na Sarai i wa hi ngonwa, i wa nga hi na nʼwana.

³¹ Na Tera i lo teka Abrama, a nisanyana wakwe, na Loti a nisanyana wa Harani, a zukulu wakwe, na Sarai a katamwane wakwe, a sati wa mufana wakwe Abrama; i lo Suka navo le Ure wa maKaldea vaya tikweni ga le Kanani, va lo chikela Harani va aka lomo.

³² Ni masiku ya Tera ma wa hi 205 wa malembe; yena i lofa le Harani.