Filemoni 1 - Tshwa Bible

¹ Paule, a peresu ya Kristu Jesu, na Timote a makabye wa hina, ha rungula Filemoni a ranzekako ni xitirikulori, Efe. 4:1; Fil. 2:25; 2 Tim. 1:8

² na Apfia a makweru, na Akipusi a sochwa-kulori, ni bandla legi gi nga lomo ndlwini ya wena: Rom. 16:5; 1 Kor. 16:19; Kol. 4:17

³ A tipswalo ni kurula a tive na nwina, zi humako hi ka Nungungulu a Dadani wa hina ni ka Hosi Jesu Kstu. Efe. 1:2

⁴ Nza bonga Nungungulu wa mina xikhati xontlhe, loku nzi ku kumbuka mikhongelweni ya mina, Kol. 1:4; 1 Tes. 1:2; 2 Tes. 1:3

⁵ hakuva nzi zwile hi liranzo leli u ranzako ha lona vontlhe vobasa, ni kukholwa loku u nga nako ka Hosi Jesu. Efe. 1:15

⁶ Mina nza kombela lezaku a kukholwa loku u hlengelako ha kona zinwe na hina ku fela ku tira hi ntamu, u kala u tiva a zilo zontlhe zo saseka lezi hi nga nazo ka Kristu. Fil. 1:9

⁷ Hakuva mina nzi tsakisilwe nguvu ni ku tangaliswa hi liranzo la wena, hakuva a timbilu ta vobasa ti tiyisetilwe ha wena, makabye. 2 Kor. 7:13; 2 Tim. 1:16 Paule a kombelela Onesimusi,

⁸ Hikwalaho hambu lezi nzi nga ni ntamu ka Kristu wa ku ku laya ku maha lezi zi faneleko, 1 Tes. 2:6

⁹ kasi-ke hi kota ya liranzo nza ku kombela, na nzi hi Paule wa kunghahi wa xikhosana, mina loyi nzi nga peresu ya Kristu Jesu.

¹⁰ Nza ku khongotela hi nwananga Onesimusi, loyi nzi mu belekileko nzi hi makhotsweni ya mina, 1 Kor. 4:15; Gal. 4:19; Kol. 4:9

¹¹ loyi a kale a nga kala a nga vuni nchumu ka wena, kanilezi makunu wa vuna ka wena ni ka mina.

¹² Hi yena nzi mu tlhelisako ka wena; nzi mu rumela aku khwatsi i nkhata wa mina,

¹³ nzi nga ranza a ku ngha nzi tshama naye, lezaku a fela ku nzi tirela wutshanwini ga wena, a makhotsweni lawa nzi nga nawo hi kota ya ivangeli. 1 Kor. 16:17; Fil. 2:30

¹⁴ Kanilezi nzi wa nga ranzi ku maha nchumu a handle ka ku vumelwa hi wena; kasi a wunene ga wena gi nga hi ga kukurumetwa, kanilezi giva ga kuranza ku tlhatlhekileko. 2 Kor. 9:7

¹⁵ Hakuva kutani i lo hambana na wena a xikhatana, kasi u fela ku mu kuma u tshama naye masiku wontihe; Gen. 45:5, 8; Rom. 8:28

¹⁶ na a nga ha hi khumbi, kanilezi ku hunza khumbi, ave makabye a ranzekako nguvu ka mina, kanilezi nguvunguvu ka wena, a makabye nya meni ni le Hosini. Mat. 23:8; Kol. 3:22; 1 Tim. 6:2

¹⁷ Loku uku nzi nakuloni mu amukele aku khwatsi hi mina. 2 Kor. 8:23

¹⁸ Kanilezi loku a ngha a ku gohele nchumu, hambu loku a hi ni nanzu ka wena, zi hlayele hlanini wa mina.

¹⁹ Mina Paule, nza tsala hi canja ga mina wutsumbu, nziku; Nzi ta xi riha mina. A nzi wuli lezaku u na ni nanzu ka mina, a nanzu wa kona hi wutsumbu ga wena.

²⁰ Ina, makabye, ngha nzi hi ni kutsaka ha wena Hosini; tangalisa a mbilu ya mina ka Kristu.

²¹ Nzi ku tsalele lezi na nzi tsumba a kuingisa ka wena, lezaku u ta maha ni ku hunza lezi nzi zi wulako. 2 Kor. 7:16

²² Tlhatakumbiri nzi longisele yindlu; hakuva nza tsumba lezaku hi kota ya mikhongelo ya nwina nzi ta vumelwa kuta ka nwina. 2 Kor. 1:11; Fil. 1:25; 2:24

²³ Epafrasi, a peresu-kulori hi kota ya Kristu Jesu, wa ku rungula; Kol. 1:7; 4:12

²⁴ na Marku, na Aristarkusi, na Demasi, na Luka, a zitiri-kulori. Miti. 12:12; 19:29; 27:2; Kol. 4:10

²⁵ A tipswalo ta Hosi ya hina Jesu Kristu a tive ni moya wa wena. Amen!