Ezra 8 - Tshwa Bible

¹ Leti hi tihosana ta tiyindlu ta vadadani vabye, ni mavito ya tinyangwa leti ti nga huma hi le Babuloni na mina, a xikhatini xa hosi Artaxerxesi:

² a ka vana va Fineasi hi Gerxome; a ka vana va Itamare, hi Danieli; a ka vana va Davida hi Hatuxa.

³ A ka vana va Xekania wa vanana va Paroxa, hi Zakaria; ku hlayilwe zinwe naye 150 wa vavanuna.

⁴ A ka vana va Pahat-Moabi hi Etiehoenai nʼwana Zarahia, i wa hi ni 200 wa vavanuna.

⁵ A ka vana va Xekania ku wa hi nʼwana Jahazieli, i wa hi ni 300 wa vavanuna.

⁶ A ka vana va Adina hi Ebedi nʼwana Jonatani, i wa hi ni 50 wa vavanuna.

⁷ A ka vana va Elami hi Jexaia nʼwana Atalia, i wa hi ni 70 wa vavanuna.

⁸ A ka vana va Xefatia hi Zebadia nʼwana Mikaeli, i wa hi ni 80 wa vavanuna.

⁹ A ka vana va Joabe hi Obadia nʼwana Jehieli, i wa hi ni 218 wa vavanuna.

¹⁰ A ka vana va Xelomite hi nʼwana Josefia, i wa hi ni 160 wa vavanuna.

¹¹ A ka vana va Bebai hi Zakaria nʼwana Bebai, i wa hi ni 28 wa vavanuna.

¹² A ka vana va Azgade hi Johanani nʼwana Hakatani, i wa hi ni 110 wa vavanuna.

¹³ A ka vana va Adonikamu va nga vo gumesa, a mavito yabye hi lawa: Elifeleti, na Jeueli, na Xemaia, va wa hi 60 wa vavanuna.

¹⁴ A ka vana va Bigvai hi Utai na Zabuda, va wa hi ni 70 wa vavanuna.

¹⁵ Uzi lo va tsombanyisa le Congweni lowu wu khulungelako le Ahava, hi gova masiku manharu. Laha nzi nga hlotile a vanhu ni vapristi, a nzi kumangi ni munwe wa vanana va ka Levi.

¹⁶ Nzi lo ruma vanhu a ku ya vitana Eliazere, na Arieli, na Xemaia, na Elnatani, na Jariva, na Elnatani, na Natani, na Zakaria, na Mexuluma, ti nga tona tihosana; na Jaiariba, na Elnatani, a vavanuna va kupima.

¹⁷ Nzi lo va ruma ka Ido a hosana ya tikwana ga Kasifia, nzi va leletela a timhaka leti va ta ngaya byela Ido, ni vanakulobye a vaNetinime, lava va akileko tikweni ga Kasifia, nziku: A va nehe a vanhu va ku ta tira a ntiro wa yindlu ya Nungungulu wa hina.

¹⁸ Kota lezi a canja ga Nungungulu wa hina gi nga wa hi hehla ka hina, va lo hi nehela a wanuna wa malanga wa vanana va ka Mali, a nʼwana wa Levi, wa Israeli, a nga Xerebia, zinwe ni vana vakwe ni 18 wa vanakulobye.

¹⁹ A munwani hi Haxabia, na Jexaia wa vana va Merari, ni vanakulobye ni vana vabye, va wa hi 20.

²⁰ Ku lota ni 220 wa vaNetinime, va lo hlawutiwa vontlhe hi mavito, va nga vaNetinime, lava Davida zinwe ni tihosana va nga wa va nyikile ku tirela vaLevi.

²¹ Na ha hi le Congweni wa Ahava, nzi lo tiyisa a siku ga kuyila, hi ti koramisa mahlweni ka Nungungulu wa hina, a ku kasi hi ti kombelela ka yena hi pfhumba ga hina go saseka, ni vanana va hina, ni zontlhe zilo za hina.

²² Hakuva nzi wa hi ni tingana a ku kombela ka hosi a butho ga tinhenha ni vakhileli va mahaxi, kasi va hi vikela ka valala lomu ndleleni, hakuva nzi wa ngha nzi byelile a hosi, nziku: A canja ga Nungungulu wa hina ga va yimela vontlhe lava va mu lavako, kanilezi a ntamu wakwe ni zanga yakwe, zilwa ni vontlhe lava va mu fularelako.

²³ Zinghaho hi lo yila, hi hlota ku vuniwa hi Nungungulu wa hina ka lezi; i lo hi ingisa.

²⁴ Zonake nzi hlawula a 12 wa tihosana ta vapristi, a nga Xerebia, na Haxabia, ni 10 wa vanakulobye.

²⁵ Nzi lo va pimela kutika ka siliva ni nzalama, ni zibya za hlengo wu nyikelweko ka yindlu ya Nungungulu wa hina hi hosi ni tinduna ta hubye gakwe, zinwe ni tihosana takwe, ni vontlhe va ka Israeli lava va nga wa hi kona.

²⁶ Nzi lo pima nzi va nyika 650 wa titalenta ta siliva, ni zibya za siliva za 100 wa titalenta ni 100 wa titalenta ta nzalama.

²⁷ Ni 20 wa magombe ya nzalama, ya tsengo wa 1,000 wa madarike, ni timbita timbiri ta suku wu hlutilweko to vangamela kota nzalama ya tsengo, na nziku kabye:

²⁸ Nwina mu hlazekile ka Jehova, ni zibya kambe zi hlazekile, ni siliva ni nzalama, a zilo lezi zi nyikelweko hi matsenya ka Jehova Nungungulu wa vadadani va nwina.

²⁹ Cuwukisisani, mu zi hlayisa kala a siku lego mu ta nga ya pima kutika ka zona mahlweni ka vapristi va hombe, ni vaLevi, ni tihosana ta tinyangwa ta vadadani va ka Israeli le Jerusalema, lomo zi hlayiswako kona ndlwini ya Jehova.

³⁰ Zinghaho a vapristi ni vaLevi va lo amukela a siliva ni nzalama ni zinwani zibya, hi lipimo la zona, kasi va fela ku zi neha Jerusalema ndlwini ya Nungungulu wa hina.

³¹ Hi lo suka Congweni wa Ahava hi siku ga 12 ga hweti yo sangula hiya Jerusalema; a canja ga Nungungulu wa hina gi wa hi zinwe na hina, a hi ponisa mandleni ya valala, ni lava va nga wa hi tumbelele lomu ndleleni,

³² hi kala hi chikela Jerusalema; hi humula kona masiku manharu.

³³ Hi siku ga wumune hi lo pima kutika ka siliva, ni nzalama, ni zibya lomu ndlwini ya Nungungulu wa hina, hi zi hendleleta mandleni ya mupristi Meremote nʼwana Uria, na hi na Eleazare nʼwana Fineasi, na Jozabada nʼwana Jexua, na Noadia nʼwana Binui, a vaLevi.

³⁴ A tsengo ni kutika ka zona zontlhe ku lo tsaliwa xwalexo xikhati.

³⁵ Zonake lava va wuyileko hi le wukhumbini va lo nyikela a munyikelo wa kuhiswa ka Nungungulu wa ka Israeli; ku lo mahiwa muphahlo wa vontlhe va ka Israeli hi 12 wa tikuzi, ni 96 wa tihamba, ni 77 wa tiyivana, ni 12 wa timhongo ta muphahlo wa kuonha; zontlhe lezo va lo phahlela ka Jehova hi ku zi hisa.

³⁶ Va lo hendleleta zileletelo za hosi ka tinduna ta hosi ni vafumeli va le tlhatuko wa congo, zonake va lo vikela a vanhu zinwe ni yindlu ya Nungungulu.