Eksodusi 9 - Tshwa Bible

A kufa ka xifuyo.

¹ Zonake Jehova aku ka Mosi: Famba ka Faro, u yaku ngalo ka yena: Jehova, Nungungulu wa maHeberu, i ngalo: Tlhatlha a vanhu va mina vaya nzi khozela.

² Hakuva loku u ala ku va tlhatlha, u va beletela kambe,

³ a canja ga Jehova gi tava hehla ka mitlhambi ya wena, leyi yi nga le mikoveni, ni hehla ka mahaxi, ni hehla ka timbongola, ni hehla ka makameli, ni hehla ka tihomu, ni hehla ka tiyivu, ku tava ntungu wa hombe nguvu.

⁴ Kanilezi Jehova i ta hambanyisa a zifuyo za va ka Israeli ni zifuyo za vaGipite, cima ku nga tafa nchumu xikari ka zifuyo zontlhe za vanana va ka Israeli.

⁵ Jehova i lo yimisa xikhati, aku: Manziko Jehova i ta maha lezi zilo lomu tikweni.

⁶ Hi manziko wa kona Jehova i lo sangula ku maha lezo zilo. A zifuyo zontlhelele za vaGipite zi lofa; cima a ku fangi nchumu lomu mitlhambini ya vanana va ka Israeli.

⁷ Faro i lo wutisisa hi lezi zi mahekileko, kanilezi i lo kuma lezaku cima a ku fangi hambu ni xifuyo xinwe lomu mitlhambini ya vanana va ka Israeli. Hambu lezo a mbilu ya Faro yi lo nonoha, cima a nga va tlhatlhangi a vanana va ka Israeli va famba.

A ntungu wa zidlayi.

⁸ Zonake Jehova aku ka Mosi na Aroni: Nusani a khuma laha khombarini, mu tata mandla, Mosi a gi xwanyela hehla gi tsutsusela mahlweni ka Faro;

⁹ gi ta hunzuka gi maha tsutsungwani lowu wu ta nga fenengeta a tiko gontlhe ga Gipite, wu humesa zidlayi lezi zi ta nga maha zilonza ka vanhu ni ka zifuyo lomu tikweni gontlhe ga Gipite.

¹⁰ Zonake va lo nusa khuma laha khombarini, vaya mahlweni ka Faro; Mosi i lo gi xwanya le hehla, gi hunzuka gi vanga zidlayi lezi zi nga maha zilonza ka vanhu ni ka zifuyo.

¹¹ Zonake a tinʼanga ti lo tsanzeka ku maha nchumu mahlweni ka Mosi hi kota ya zidlayi, hakuva hambu tona tinʼanga ta vaGipite ti wa hi nazo zidlayi zinwe ni vaGipite vontlhe.

¹² Jehova i lo nonohisa a mbilu ya Faro, a nga ingisi timhaka ta Mosi na Aroni, khwatsi hi lezi Jehova a wulileko ka Mosi.

A vula ya maralala.

¹³ Jehova aku ka Mosi: U ta vinzuka ni mixo u ya yima mahlweni ka Faro, uku ngalo kakwe: Jehova, Nungungulu wa maHeberu, i ngalo: Tlhatlha a vanhu va mina va ya nzi khozela.

¹⁴ Hakuva lezi makunu nzi ta rumela makhombo wontihe hehla ka wena, ni hehla ka malanza ya wena, ni tikweni ga wena, kasi wena wa fela ku zi tiva lezaku a nga kona munwani wo fanana na mina misaveni yontlhe.

¹⁵ Hakuva loku nzi wa tlakusile a canja ga mina nzi kuba hi ntungu, wena ni vanhu va wena, ngha u lovile u mbhela laha misaveni.

¹⁶ Kanilezi nzi ku tsikile kasi wena wa fela ku wona mintamu ya mina, ni lezaku a vito ga mina gi fela ku tibyiwa misaveni yontlhe. Rom. 9:17

¹⁷ Loku wa ha ti kukumukisa hehla ka vanhu ya mina, u ala ku va tlhatlha va famba,

¹⁸ manziko hi xwalexi xikhati, nzi ta nisa a vula ya maralala yo tshisa nguvu, leyi ya ku cima a mu se yi wona lomu tikweni ga Gipite, kusukela kusanguleni ka gona kala lezi.

¹⁹ Makunu rumela ku ya wuyisa a zifuyo za wena, ni zontlhe zilo za wena, lezi zi nga le handle. Hakuva a vula ya maralala yi ta nela vanhu vontlhe ni zifuyo zontlhe lezi zi ta nga kumiwa le handle, zontlhe lezi zi nga valiwangiko lomu tindlwini zi tafa.

²⁰ Xikari ka malanza ya Faro, lava va nga ingisa kuleletela ka Jehova, va lo hatlisa va wuyisa malanza yabye ni zifuyo zabye lomu tindlwini,

²¹ Kanilezi lava va nga kala ku khatala hi gezu ga Jehova, va lo tsika malanza ni zifuyo zabye lehandle.

²² Zonake Jehova aku ka Mosi: Tlakusa a canja ga wena le hehla, kasi kuna a vula ya maralala lomu tikweni gontlhe ga Gipite, yi nela a vanhu ni zifuyo, ni byanyi gontlhe lomu tikweni ga Gipite.

²³ Mosi i lo tlakusa a nhonga yakwe a xungeta tilweni. Jehova i lo rumela kudzinza ni maralala, kuva ni nzilo laha misaveni. Jehova i lo nisa a vula ya maralala lomu tikweni ga Gipite.

²⁴ A vula ya maralala yi lona, a nzilo na wu patsene ni maralala. Ma wa hi yo tshisa nguvu, yaku cima ma wa nga se woniwa lomu tikweni gontlhe ga Gipite kusukela kusanguleni ka tiko.

²⁵ A vula ya maralala yi lo hihirita lomu tikweni gontlhe ga Gipite zontlhe lezi zi nga wa hi handle, a vanhu, ni zifuyo, ni byanyi gontlhe ga tiko, ku tshoveletelwe ni tisinya tontlhe ta khwati.

²⁶ Kanilezi a vula ya maralala yi wa nga hi kona le Goxeni, laha ku nga tshama a vanana va ka Israeli.

²⁷ Zonake Faro i lo vitana Mosi na Aroni, aku ka vona: Makunu mina nzi onhile; Jehova i lulamile, mina ni vanhu va mina hi vaonhi.

²⁸ Kombelani ka Jehova lezaku ku nga dzinzi hambu kuna vula ya maralala hakuva za tshisa nguvu, mina nzi ta mu tlhatlha mu famba, cima mu nga ta valelwa ha nchumu.

²⁹ Mosi aku ka yena: Laha nzi ta nga huma laha mutini, nzi ta tlakusa a mandla ya mina ka Jehova; a kudzinza ku ta miyela, ni vula ya maralala yi taca, kasi wena wa fela ku zi tiva lezaku a misava nja Jehova.

³⁰ Kanilezi wena ni malanza ya wena nza zi tiva lezaku a mu se nga mu chava Jehova Nungungulu.

³¹ A wukene ni sevada zi lo onheka, hakuva a sevada yi wa rumbukile, ni wukene gi wa pfepfile zitsangi.

³² Kanilezi a tirigo ni mavele a zi onhekangi, hakuva za hlwela ku kula zi mila.

³³ Zonake Mosi i lo suka ka Faro a huma lomu mutini; i lo tlakusa a mandla yakwe ka Jehova, a kudzinza ni maralala Zi lo mbhela, ni vula yica misaveni.

³⁴ Kanilezi laha Faro a nga wona lezaku a vula ni maralala ni kudzinza zi miyele, i lo engeta a onha hi ku ti nonohisa a mbilu yakwe, zinwe ni malanza yakwe.

³⁵ A mbilu ya Faro yi lo nonoha; cima a nga vumelangi ku tlhatlha a vanana va ka Israeli va famba, khwatsi hi lezi Jehova a wulileko hi nomu wa Mosi.