Eksodusi 5 - Tshwa Bible

Faro a kaneta Mosi.

¹ Anzhako ka lezo Mosi na Aroni va loya ka Faro, va yaku ngalo: Jehova, Nungungulu wa ka Israeli, i ngalo: Tsika a vanhu va ya nzi mahela a nkhozo le xiwuleni.

² Zonake Faro aku ka vona: Himani Jehova, wo kala nzi ingisa a gezu gakwe, nzi tsika va ka Israeli va famba ke? Jehova a nzi mu tivi, va ka Israeli cima nzi nga ta va tsika va famba.

³ Vaku kakwe: Nungungulu wa maHeberu i wonekile ka hina. Hi vumele hi teka pfhumba ga masiku manharu hiya xiwuleni, hi ya khozela Jehova, a Nungungulu wa hina, hi miphahlo; a nga hi daya hi ntungu kutani hi supado.

⁴ Zonake a hosi ya vaGipite yiku ka vona: Wena Mosi na Aroni, hikuyini mu hungatela vanhu ku tira mitiro yabye ke? Tlhelani mu famba mitirweni ya nwina.

⁵ Faro a engeta aku: A vanhu va tele tikweni legi, nwina ma va hungatela mitirweni yabye.

⁶ A siku lego Faro i lo leletela a tinduna ta tiko ni varangeli va gona aku:

⁷ Mu nga ha va nyiki a byanyi go maha ha gona zitini, kota lezi mu nga wa maha kusanguleni kala nyamutlha; a va ti lavele byanyi ha voce.

⁸ Hambu zi hi tano, va nyikeni wona tsengo lowo va nga wa maha kale, mu nga hunguli nchumu, hakuva va loloha; hi kota ya kurila kabye vaku: Ngha hina hi famba hi ya phahlela ka Nungungulu wa hina.

⁹ Ngha vanhu va tshikelelwa hi mitiro, yi va binza, kasi va nga ingiseli mawunwa.

¹⁰ Zonake a tinduna ta vanhu ni varangeli va kona va lo wulawula ka vanhu vaku; Faro i ngalo: Cima nzi nga ta ha mu nyika byanyi:

¹¹ Fambani mu ya ti lavela ha nwece ni ka gihi wutshamu mu ta nga gi kuma ka gona, hakuva a mitiro ya nwina cima yi nga ta hungulwa.

¹² Zinghaho a vanhu va lo hangalaka ni tiko gontlhe ga Gipite va famba va lava byanyi.

¹³ A tinduna ti lo va hatlisisa tiku: Mbhetisani mitiro ya nwina; siku ni siku mbhetani a ntiro wa gona kota mu nga wa maha kale na ma ha nyikwa byanyi.

¹⁴ A varangeli va vanana va ka Israeli lava va yimisilweko hi tinduna ta Faro va biwa, vaku ka vona: Hikuyini mu nga kala ku mbheta mitiro ya nwina, a tolo ni nyamutlha ku kotisa kusanguleni?

¹⁵ Zonake a varangeli va vanana va ka Israeli va lo ya rila ka Faro, vaku: Hikuyini u maha lezi ka malanza ya wena ke?

¹⁶ A va nyiki byanyi ka malanza ya wena, kanilezi ve ngalo ka hina: Mahani zitini! Kambe malanza ya wena ma biwa, kanilezi a nanzu ngwa vanhu va wena.

¹⁷ Kanilezi yena aku: Ma loloha, ma loloha! Hi kota ya lezo mu ngalo; A hi fambeni hi ya phahlela ka Jehova.

¹⁸ Fambani muya tira; cima mu nga ta nyikiwa byanyi. Hambu zi hi tano mu ta maha a tsengo wa zitini lowu wu yimisilweko.

¹⁹ A varangeli va vanana va ka Israeli va lo wona lezaku va le kuxanisekeni, loku ku wuliwa ku ngalo: Mu nga hunguli a tsengo wa zitini za nwina za siku ginwe ni ginwani.

²⁰ Zonake va lo huma ka Faro va ya tlhangana na Mosi na Aroni, lava va nga kari vata ku va khinga. Vaku ka vona:

²¹ Ngha Jehova a cuwuka ka nwina, a mu lamula, hakuva mu hi mahele a xixowo mahlweni ka Faro, ni mahlweni ka malanza yakwe; mu vekile a supado canjeni gabye kasi va fela ku hi daya.

²² Zonake Mosi i lo tlhelela ka Jehova, a yaku: Hosi, u xanisela yini a vanhu lava? U nzi rumele yini ke?

²³ Hakuva cima nza ngaya ka Faro, nziya wulawula hi vito ga wena, yena o engetela ku xanisa lava vanhu, kanilezi wena a ku tlhatlhisangi a vanhu va wena.