Eksodusi 35 - Tshwa Bible

¹ Zonake Mosi i lo tsombanyisa wontihe hlengeletano wa vanana va ka Israeli aku ka vona: A timhaka leti Jehova a mu leleteleko ku ti maha hi leti:

² ku ta tiriwa ntlhanu wa masiku ni ginwe, kanilezi a siku ga wuntlhanu ni mambiri gi tava ga kubasa; i sabado legi gi basiselweko Jehova. Kani hi wihi a tirako hi siku lego, i ta dawa.

³ Mu nga dziveli nzilo lomu tindlwini ta nwina hi siku ka sabado.

A kuakiwa ka Tabernakeli.

⁴ Zonake Mosi i lo byela wontihe a hlengeletano wa vanana va ka Israeli, aku: A mhaka leyi yi leletelweko hi Jehova hi leyi:

⁵ Humesani xikari ka nwina a hlengo ka Jehova. Munhu ni munhu loyi a ranzako hi mbilu yakwe, a neha ka Jehova a hlengo wakwe: a nzalama ni siliva ni suku;

⁶ tinguwo ta wukuxe, ni xiwunguwungu, ni zo pswhuka, ni wukene go saseka, ni woya ga timbuti,

⁷ ni mabhebhe ya tihamba laya ma totilweko a tinta yo pswhuka, ni mabhebhe ya macalo, ni tisinya ta munga,

⁸ ni mafura ya tikandiya, ni mipepo ya malongo yo maha mafura yo tola, ni libani lo saseka lo hiswa;

⁹ ni maribye ya onikisi, ni maribye ya ku vekelwa laha ka efode, ni ya nguwo ya laha xifuveni.

¹⁰ Zonake vontlhe vavanuna vo tlhariha xikari ka nwina, va tata va ta tira zontlhe lezi zi leletelweko hi Jehova:

¹¹ a tabernakeli, ni tenda ga kona, ni zifulelo za gona, ni zihareketo za gona, ni tibakwa ta gona, ni mikwenga ya gona, ni timhanze ta gona ni zikhato za gona;

¹² ni nghaxa ni mipingo ya gona, ni xitshamu xa wuxinji, ni nguwo yo lukiwa ya xisirelo;

¹³ ni meza ni mipingo ya yona, ni yontlhe mitiro ya yona, ni zibaba za xikombiso;

¹⁴ ni meza ya tikandiya ni zibya za yona, ni tikandiya ta yona, ni mafura ya kona;

¹⁵ ni alati ga libani ni mipingo ya gona, ni mafura yo tota, ni libani lo nuhela lo hiswa, ni nguwo yi lukilweko ya laha nyangweni ya tabernakeli;

¹⁶ ni alati ga miphahlelo yo hiswa, ni xitlhata xa suku, ni mipingo ya gona, ni zibya za gona, ni xinamelo ni xikhatelo xa xona;

¹⁷ ni tinguwo ta xipetso, ni timhanze ta kona, ni zikhato za kona, ni veli ya laha nyangweni ya hubye;

¹⁸ ni zikhongwani za tabernakeli, ni zikhongwani za xipetso ni tingoti ta kona;

¹⁹ ni tinguwo ta ntiro wo khozela wutshanwini go basa, ti nga tinguwo ti basileko ta mupristi Aroni, ni tinguwo ta vana vakwe ta ntiro wa wupristi.

²⁰ Wontihe a hlengeletano wa vananava ka Israeli wu lo suka mahlweni ka Mosi.

²¹ Zonake munhu ni munhu, lava va vuxilweko timbilwini tabye, ni vontlhe lava va zi ranzako, i lo neha minyikelo yakwe ka Jehova, kasi yi ta tira a ntiro wa tenda ga mutlhangano, ni zontlhe za ntiro wa gona, ni tinguwo ti basileko.

²² Ku lota vavanuna ni vavasati; vontlhe lava va zi ranzako hi timbilu tabye va neha zingwavila, ni masinza, ni tiphera, ni tixakaxaka ta mitiro ya nzalama; loyi ni loyi i lo nyikela a munyikelo wakwe wa nzalama lowu a wu longiseleko Jehova.

²³ Wihi ni wihi loyi a nga hi ni tinguwo ta mivala ya wukuxe, kuzirila, ni kupswhuka, ni wukene go saseka, ni woya ga timbuti, ni mabhebhe ya tihamba ma totilweko hi tinta yo pswhuka, ni mabhebhe ya macalo, va lo zi neha.

²⁴ Loyi ni loyi a nga zi kota, i lo nyikela munyikelo wa siliva, ni suku, va wu neha ka Jehova; ni vontlhe lava va nga hi ni tisinya ta munga to tira ha tona a ntiro wa tabernakeli, va lo ti neha.

²⁵ Ni vavasati lava va tlharihileko kulukeni va lo luka hi mandla yabye, zonake va neha lezi va lukileko, a za wukuxe, ni zo zirila, ni zo pswhuka, ni za wukene go saseka.

²⁶ Vontlhe vavasati lava va vuxilweko lomu timbilwini tabye va lo luka a woya ga timbuti.

²⁷ Ni tihosana ta tiko ti lo nyikela maribye ya onikisi ni maribye ma vekelweko lomu ka efode, ni ya laha ka nguwo ya laha xifuveni;

²⁸ ni pepo, ni mafura ya tikandiya, ni mafura yo tola, ni libani lo nuhela li hiswako.

²⁹ A vanana vontlhe va ka Israeli, vavanuna kutani vavasati, vontlhe lava a timbilu tabye ti ranzako ku nyikela nchumu, kasi ku tira lezi Jehova a layeleko ha Mosi, va lo humesa hi matsenya a munyikelo ka Jehova.

³⁰ Zonake Mosi aku ka vanana va ka Israeli; Langutani, Jehova i vitanile hi vito Bezaleli, a nʼwana Uri wa Hura, wa lixaka la ka Juda;

³¹ i mu chelile a moya wa Nungungulu, ni wutlhari, ni kupima, ni ku tiva ku maha mitiro yontlhe;

³² ni ku pola yinwani mitiro, ni ku maha mitiro hi nzalama pi siliva, ni suku;

³³ ni ku kehla maribye yo saseka ya tidayimani, ni ku vatla tisinya, ni ku tira mitiro yontlhe ya wumeseri.

³⁴ I nyikile na Oholiaba, nʼwana Ahisamaka, wa lixaka la ka Dani, a wutlhari ga ku gonzisa vanwani.

³⁵ Lava i va nyikile wutlhari kasi va fela ku tira mitiro yo kehla, ni ya wuluki ga za wukuxe, ni zo zirila, ni zo pswhuka, ni za wukene go saseka, lezaku kasi va fela ku maha mitiro yontlhe, ni ku pola yinwani.