Eksodusi 34 - Tshwa Bible

A xivumelwano xa Nungungulu ni vanana va ka Israeli.

¹ Zonake Jehova aku ka Mosi: Vatla timbila timbiri ta maribye yo fanana ni laya yo ranga, kasi nza fela ku tsala ka wona a timhaka leti ti nga wa hi ka maribye yo sangula, laya u nga ma faya.

² U ti longiselwa manziko ni mixo, zonake u ta kanziha le xitsungeni xa Sinai, u ta yima kona mahlweni ka mina le hehla ka xitsunga.

³ A munhu a nga dzuki a kanziha zinwe na wena; ni munhu a nga woneki le xitsungeni, hambu tiyivu ni tihomu ti nga nga dzuki tiga kusuhani ni xitsunga lexi.

⁴ Mosi i lo vatla timbila timbiri ta maribye to fanana ni leti to ranga, a vinzuka ni mixo, a kanziha xitsungeni xa Sinai, khwatsi hilezi Jehova a mu leleteleko, i lo teka timbila timbiri ta maribye mandleni yakwe.

⁵ Zonake Jehova i lo relela hi refu; Mosi i lo yima kusuhani na yena, a huwelela a vito ga Jehova.

⁶ Zonake Jehova i lo hunza mahlweni kakwe, na aku: Jehova, Jehova, Nungungulu wa wuxinji ni tipswalo, loyi a nonokako ku zangara, loyi a teleko hi wuxinji ni kutsumbeka; Mitse. 14:18; Neh. 9:17; Joeli 2:13; Jona 4:2

⁷ loyi a nga ni wuxinji ka khume ga mazana, loyi a tsetselelako munhu wa kubiha, ni wa kuhambuka ni kuonha; kanilezi lava va nga ti soliko hi milanzu leyi va nga nayo a nga va rivaleli; kanilezi i tsayisa a vanana ni vazukulu kala ku chikela ka xizukulwana xa wunharu ni xa wumune, hi kota ya kuonha ka vapswali vabye. Joba 9:2; Jer. 32:18; Nah. 1:3

⁸ Zonake Mosi i lo hatlisa a khizama lahasi, aku:

⁹ Hosi, loku mina nzi kumile thomo mahlweni ka wena, ngha a Hosi yi famba na hina; hakuva hakunene mbanhu va tinhamu to nonoha, kanilezi hi tsetselele kuonha ka hina ni zihambuko za hina; zonake u ta hi fuya hiva tshomba ya wena.

¹⁰ Jehova i lo hlamula, aku: Languta, nza maha xivumelwano. Nzi ta maha zihlamaliso mahlweni ka vanhu va wena vontlhe, lezi zaku cima a zi se nga mahiwa laha misaveni yontlhe, hambu ni ka gihi tiko. Zonake a vanhu vontlhe lava u nga xikari kabye, va ta wona a ntiro wa Jehova; hakuva lezi nzi ta nga zi maha ha wena zi tava zilo zi riwukisako.

¹¹ Hlayisa lezi nzi ku leletelako zona nyamutlha. Nzi ta hlongola mahlweni ka wena a vaAmori, ni vaKanani, ni vaHiti, ni vaPerezi, ni vaHivi, ni vajebusi.

¹² Ti wonele, u nga mahi xivumelwano ni lavo vanhu va akileko tikweni legi u yako ka gona va nga dzuka va hunzuka va maha ziyo xikari ka nwina.

¹³ Kanilezi mu ta khungumula maalati yabye, mu fayetela zifananiso zabye, mu tsema ni zifananiso za Axtarte.

¹⁴ Hakuva wena u nga ta khizamela munwani nungungulu, hakuva Jehova loyi a vito gakwe a nga Mupinyami, i Nungungulu wo pinyama.

¹⁵ U nga dzuki u maha xivumelwano ni vanhu va tiko lego, laha kaku loku va bhaya ni vanungungulu vabye, ni loku va phahlela vanungungulu vabye, va ku vitana ku yaga a zakuga za miphahlo yabye;

¹⁶ hambu ku wuta a vanhanyana vabye u lowota a vana va wena, kutani a kuva a vanhanyana vabye va hambukisa a vana va wena, hi ku lanzela vanungungulu vabye. Vala. 3:6; 1 Tih. 11:2

¹⁷ U nga ti maheli nungungulu loyi a nyekisilweko.

¹⁸ U ta hlayisa mubuzo wa zibaba zi nga comelwangiko. U taga zibaba zi nga comelwangiko lomu ka ntlhanu wa masiku ni mambiri, hi zikhati za kona kota lezi nzi ku leletelako lomu ka hweti ya Abiba, hakuva u humile Gipite hi hweti ya Abiba.

¹⁹ A matiwula wontihe nja mina; hambu matiwula ya tontlhe tihomu ta vamatsune, ni matiwula ya tiyivu ta mitlhambi yontlhe ya wena. Lu. 2:23

²⁰ A matiwula ya mbongola u ta ma tirula hi yivana; loku u nga ma tiruli, u ta ma tshova nhamu. U ta tirula matiwula wontihe ya vafana va wena. Ku nga dzuki ku woneka munhu mahlweni ka mina na a nga khomangi nchumu.

²¹ U ta tira ntlhanu wa masiku ni ginwe, zonake u humula hi siku ga wuntlhanu ni mambiri; u ta humula hambu loku ku hi xikhati xa xirimo ni loku ku hi xikhati xa kutshovela. Lu. 13:14

²² U ta maha a mubuzo wa maviki, wu nga wona wa mavele yo ranga, ni mubuzo wa kutsutsela kumbheleni ka lembe.

²³ A vavanuna vontlhe xikari ka nwina va ta ti wonekelisa kanharu hi lembe mahlweni ka Hosi Jehova, Nungungulu wa Israeli.

²⁴ Hakuva nzi ta hlongola matiko mahlweni ka wena, nzi kulisa a tiko ga wena: ku nga tava kona a munhu a ta nga mbilukela a tiko ga nwina, loku mu ya ti wonekelisa kanharu hi lembe mahlweni ka Jehova, Nungungulu wa wena.

²⁵ U nga phahleli laha maganzelweni ya mina hi nkhata ni zibaba zi nga ni comelo. A muphahlo wa mubuzo wa Pasika wu nga sali wu tshama wusiku gontlhe kala gica.

²⁶ A mihanzu yo ranga ya masimu ya wena, u ta yi neha lomu ndlwini ya Jehova, Nungungulu wa wena. U nga dzuki u bhika a ximhutana hi mafi ya nyine wa xona.

²⁷ Kambe Jehova aku ngalo ka Mosi; Tsala leti timhaka, hakuva nzi mahile a xivumelwano na wena zinwe na Israeli hi tona.

²⁸ Mosi i lo tshama na Jehova, 40 wa masiku ni 40 wa wusiku, na a ngagi zibaba ge hambu kunwa mati. Yena i lo tsala lomu ka maribye a timhaka ta xivumelwano, yi nga milayo ya khume.

²⁹ Zonake laha Mosi a nga relela hi le xitsungeni xa Sinai zinwe ni timbila timbiri ta milayo mandleni yakwe, i wa nga zi tivi lezaku a nghohe yakwe ya ngangamela hilezi a nga wa wulawula na Jehova. 2 Kor. 3:7

³⁰ Zonake Aroni ni vontlhe vanana va ka Israeli, loku va wona Mosi, va lo wona a hlonge ya nghohe yakwe na yi ngangamela, va chava ku tshinela kusuhani kakwe.

³¹ Kanilezi Mosi i lo vitana Aroni ni tihosana tontlhe ta mutlhangano vata kakwe. Mosi i lo wulawula navo.

³² Arizhako ka lezo, vontlhe a vanana va ka Israeli va lo tshinela kusuhani, zonake i lo va hlawutela milayo leyi Jehova a nga mu byelile le xitsungeni xa Sinai.

³³ Laha Mosi a nga mbhetile ku wulawula kabye, i lo ti fenengeta a nghohe yakwe hi nguwo. 2 Kor. 3:13

³⁴ Kanilezi loku Mosi a enghena mahlweni ka Jehova ku wulawula naye, i wo susa a nguwo kala a huma. Zonake na humile, i lo ta hlawutela ka vanana va ka Israeli lezi a leletelweko.

³⁵ A vanana va ka Israeli va lo wona lezaku a nghohe ya Mosi ya hatima, zonake Mosi a engeta a ti fenengeta a nghohe yakwe hi nguwo, kala aya enghena kambe a, kuya wulawula na Jehova.