Eksodusi 33 - Tshwa Bible

¹ Zonake Jehova aku ka Mosi: Suka u famba, wena ni vanhu lava u va humesileko le Gipite, uya ka tiko legi nzi hlambanyileko lezaku nzi ta gi nyika ka Abrahama, na Isaka, na Jakobe, na nzi te ngalo: Nzi ta gi nyika ka pswalo wa wena.

² Nzi ta ruma a ngelosi leyi yi ta nga ku rangela, zonake nzi ta hlongola vaKanani, ni vaAmori, ni vaHiti, ni vaPerezi, ni vaHivi, ni vajebusi.

³ Nzi ta mu enghenisa ka tiko gi khulungako a masi ni wulombe, kanilezi nzi nga ta famba xikari ka nwina na mu hi vanhu va ku nonoha tinhamu, nzi nga dzuka nzi mu lovisa lomu ndleleni.

⁴ Laha a vanhu va nga wa zwile a timhaka leti ti chavekako, va lo rila, ku wa nga hi kona ni wo ti bombisa.

⁵ Kanilezi Jehova i lo byela Mosi, aku: Byela a vanana va ka Israeli, uku: Mu vanhu va tinhamu to nonoha; loku nzi famba na nwina xikhatanyana, nzi ta mu lovisa. Hikwalaho susani lezi mu ti bombisako ha zona, kasi nza zi tiva lezi nzi ta nga maha.

⁶ Zinghaho a vanana va ka Israeli va lo susa lezi va hembako ha zona ku suka le xitsungeni xa Horebe.

⁷ Mosi i wa simula a tenda aya gi aka hi le handle ka wugovelo, gi tshama kule ni mixaxa, zonake i lo chula ku ngalo i tenda ga mutlhangano. Vontlhe lava va nga wa hlota Jehova, va waya le tendeni ga mutlhangano legi gi nga le handle ka wugovelo.

⁸ Makunu ku waku loku Mosi a huma kuya le Tendeni, a vanhu vontlhe va yima, munwe ni munwani laha nyangweni ya tenda gakwe, va cuwukela Mosi kala a ya enghena lomu Tendeni.

⁹ Laha Mosi na enghenile lomu Tendeni, a mhinga ya refu yi lo relela, yi ta yima laha nyangweni ka Tenda, zonake Jehova a wulawula na Mosi.

¹⁰ A vanhu vontlhe laha na va wona a mhinga ya refu laha nyangweni ya Tenda, va lo khizama, munwe ni munwani laha nyangweni ya tenda gakwe.

¹¹ Jehova i lo tshama a wulawula na Mosi, na va cuwukene, khwatsi hi loku a munhu a wulawula ni xaka gakwe. Zonake Mosi i lo tlhelela wugovelweni; kanilezi Joxua a nʼwana wa Nuni, a nanza gakwe ga jaha, cima i wa nga suki lomu Tendeni.

¹² Zonake Mosi aku ka Jehova: Languta, wena u ngalo ka mina: Humesa lava vanhu, kanilezi a ku nzi byelangi loyi u ta nga mu ruma a famba na mina! Kambe u wulawulile, Uku; Nza ku tiva wena hi vito, u kumile thomo mahlweni ka mina.

¹³ Makunu, loku hakunene nzi kumile thomo mahlweni ka wena, nzi kombise tindlela ta wena, nzi ta ku tiva; nzi wona lezaku nzi kumile thomo mahlweni ka wena. Kambe alakanya lezaku lava vanhu mbanhu va wena.

¹⁴ Jehova aku: Mina wutsumbu nzi ta ku pangalata, nzi ku humuta.

¹⁵ Zonake Mosi aku: Loku wena wutsumbu u nga hi pangalati, ngha hi nga suki laha.

¹⁶ Zi ta tibyiswa kuyini lezaku mina ni vanhu va wena hi kumile thomo mahlweni ka wena? Xana a hi loku u famba zinwe na hina ke? Zi nga lezo mina ni vanhu va wena hi ta nga woneka na hi hambene ni vontlhe vanhu lava va nga laha misaveni.

¹⁷ Zonake Jehova aku ka Mosi: Nzi ta maha zontlhe lezi u zi wulako, hakuva u kumile thomo mahlweni ka mina, ni kambe nzi ku tivile hi vito ga wena.

¹⁸ Zonake Mosi aku: Hi nga nzi komba a kungangamela ka wena.

¹⁹ Jehova aku: Nzi ta hunzisa a wunene gontlhe ga mina mahlweni ka wena; na nzi kari nzi huwelela a vito ga Jehova mahlweni ka wena. Nzi ta mu mahela tipswalo loye nzi ta nga mu mahela tipswalo, nzi ta mu mahela wuxinji loye nzi ta nga mu mahela wuxinji. Rom. 9:15

²⁰ I lo engeta kambe aku: Cima u nga ta wona a nghohe ya mina; hakuva a ku na munhu loyi a nzi wonako a hanya. Vala. 13:22

²¹ Jehova i lo engeta kambe aku: Languta, gi kona wutshamu kusuhani na mina; u ta yima laha ribyeni;

²² ku taku loku a kungangamela ka mina ku hunza, nzi ku enghenisa lomu lifeni la ribye, nzi ku fenengeta hi canja ga mina, nzi kala nzi hunza;

²³ hi kona nzi to susa a canja ga mina, zonake u ta wona a hlana wa mina, kanilezi a nghohe ya mina yi nga ta woneka.