Eksodusi 32 - Tshwa Bible

A role ga nzalama.

¹ Makunu laha a vanhu va nga wona lezaku Mosi wa hlwela ku relela hi le xitsungeni, va lo tsombana ka Aroni, vaku kakwe: Ngone u ta hi mahela vanungungulu lava va ta nga hi rangela mahlweni, hakuva Mosi loyi a hi humesileko le tikweni ga Gipite, a hi zi tivi lezi zi mu humeleleko. Miti. 7:40

² Zonake Aroni aku ka vona: Anyulani zingwavila za nzalama lezi zi nga lomu tindleveni ta vasati va nwina, ni ta vafana va nwina, ni ta vanhanyana va nwina, mu zi neha laha ka mina.

³ Zonake a vanhu vontlhe va lo anyula a zingwavila za nzalama lezi zi nga hi tindleveni tabye, va zi neha ka Aroni.

⁴ I lo zi amukela, a zi nyekisa, a zi vatla hi nzhemo, ku huma a role ga nzalama yi nyekisilweko. Zonake vaku: Hi loyi nungungulu wa wena, Israeli, loyi a ku humesileko tikweni ga Gipite. Tis. 106:19

⁵ Makunu laha Aroni a nga wona lezo, i lo aka a alati mahlweni ka role; zonake Aroni i loba hungu, aku ngalo: Manziko ku tava mubuzo wa Jehova.

⁶ Zonake va lo vuka ni mixo va maha miphahlo yo hiswa ni miphahlo ya ku khesa. Zonake va lo tshama lahasi vaga, vanwa, va suka va hlakana.

⁷ Jehova aku ka Mosi: Suka u famba, hakuva a vanhu va wena lava u va humesileko tikweni ga Gipite, va onhile.

⁸ Va hatlisile ku hambuka ndleleni leyi nzi va leleteleko yona; va ti mahele a role gi nyekisilweko, va khizama mahlweni ka gona, va gi khozela, va gi mahele miphahlo, vaku: Hi yena nungungulu wa wena, Israeli, loyi a ku humesileko tikweni ga Gipite!

⁹ Jehova i lo wula kambe ka Mosi, aku: Nzi wonile lava vanhu, lezaku mbanhu va tinhamu to nonoha.

¹⁰ Nzi tsike makunu nzi va zangarela, nzi va mbhetisa; zonake mina nzi ta maha lixaka la hombe ha wena.

¹¹ Kanilezi Mosi i lo khongela ka Jehova, Nungungulu wakwe, aku: O Jehova! Hikuyini u zangarela a vanhu lava u va humesileko le Gipite hi mintamu ya hombe?

¹² Hikuyini a vaGipite va ta ngaku ngalo: Ehe, i va humesile kasi a fela ku ya maha kubiha ha vona, hakuva i va dele le xitsungeni, niku i va lovisile laha misaveni. Tlhelisa a zanga ya wena, u tsika a kubiha loko u lavako ku maha ka vanhu va wena.

¹³ Alakanya Abrahama, na Isaka, na Israeli, a malanza ya wena, lava u nga hlambanya ka vona uku ngalo: Nzi ta anzisa a pswalo wa nwina; wu ta kota tinyeleti ta tilo; nzi ta nyika ka pswalo wa nwina gontlhe tiko legi nzi gi wulileko, va ta gi fumela kala kupinzuka, Gen. 12:7; 15:5; Maheb. 6:13

¹⁴ Zonake Jehova i lo tsika kubiha loko a nga wa alakanyile ku ku maha ka vanhu vakwe.

¹⁵ Zonake Mosi i lo relela hi le xitsungeni, na khomile maribye mambiri ya milayo mandleni yakwe, na ma tsalilwe matlhelo mambiri, seno ni seno.

¹⁶ A maribye lawa mambiri ma wa hi ntiro wa Nungungulu, ni kutsala loku ku tsalilweko ka maribye lawo ku wa hi kutsala ka Nungungulu.

¹⁷ Makunu Joxua i lozwa a guwa ga vanhu va nga wa hlalela; zonake aku ka Mosi: Ku zwala a guwa ga kulwa lomu mixaxeni.

¹⁸ Kanilezi Mosi aku: Lawo a hi magezu ya migiyo, ne a hi magezu ya tihuwa. Nzozwa magezu ya tisimu.

¹⁹ Laha a nga wa chikele wugovelweni, i lo wona a role ni lava va nga wa kina. Zalezo Mosi i lo zangara, a hoxa maribye hi mandla yakwe, ma fayeka lahasi ka xitsunga.

²⁰ Zonake i lo teka a role legi va gi mahileko, a gi hisa hi nzilo, a gi sila gi maha mapa, a chela matini a nwisa a vanana va ka Israeli.

²¹ Zonake Mosi aku ka Aroni: A vanhu lava va ku gohele yini lezi u va enghenisileko lomu xionhweni xa kunghahi?

²² Aroni aku: Hosi yanga, ngha a zanga ya wena yi nga vindluki nguvu! Wa zi tiva lezaku lava vanhu va bihile.

²³ Va lota ka mina, va taku: Hi mahele vanungungulu lava va ta nga hi rangela, hakuva Mosi loyi a hi humesileko le tikweni ga Gipite a hi zi tivi lezi zi mu humeleleko.

²⁴ Zonake nziku ka vona: Loye a nga ni nzalama, a yi anyule. Zonake va lo nzi nyika, nzi yi hoxa nzilweni, zinghaho ku lo huma a role legi.

²⁵ Mosi i lo wona lezaku a vanhu va tsanzekile, na va tsanzekiswa hi Aroni, va soleka ka valala vabye.

²⁶ Zonake Mosi i lo yima hi laha nyangweni ya wugovelo, aku: Kani himani loye a ranzako Jehova, ate ka mina! Zonake a vanana va ka Levi va lo tsombana ka yena.

²⁷ Zonake aku ngalo kabye: Jehova, Nungungulu wa Israeli, i ngalo: Munwe ni munwani wa nwina a hlome matlhari yakwe, mu enghena lomu wugovelweni, mu tsemakanya a nyangwa yinwani ni yinwani, mu hlasela vamakabye va nwina, ni vanakuloni lava mu akileko navo.

²⁸ Zonake a vana va ka Levi va lo maha khwatsi hi kuwula ka Mosi, hi lego siku ku lofa kusuhani ka 3,000 wa vanhu.

²⁹ Zonake Mosi aku: Ti nyikelisiseni ka Jehova zalezi, hakuva munwe ni munwani i vukele nʼwana wakwe kutani makabye wakwe, a ka lezo mu ta kuma kukatekiswa inyamutlha.

³⁰ Hi manziko wa kona, Mosi aku ka vanhu: Mu onhile a xionho xa hombe. Kanilezi nzi ta kanziha ka Jehova, kutani nzi taya maha a nzhiho wa xionho xa nwina.

³¹ Hikwalaho Mosi i lo tlhela aya ka Jehova, a yaku: O, lava vanhu va onhile nguvu hi ku ti mahela nungungulu wa nzalama.

³² Kanilezi makunu tsetselela kuonha kabye! Loku zi nge ngaho, vinya a vito ga mina legi u gi tsalileko lomu bhukwini ga wena. Tis. 69:28; Rom. 9:3

³³ Jehova aku ka Mosi: Loye a nzi goheleko hi yena nzi ta nga mu susa lomu bhukwini ga mina.

³⁴ Suka makunu u rangela vanhu, u ya navo laha nzi ku leleteleko kona. Languta a ngelosi ya mina yi ta rangela mahlweni ka wena. Kanilezi a siku ga ku va tsayisa ka mina, nzi ta va tsayisa hi zionho zabye.

³⁵ Jehova i lo lamata a vanhu hi ndlela leyo, hakuva va rumile Aroni ku va mahela role.