Eksodusi 2 - Tshwa Bible

A kubelekwa ka Mosi.

¹ Ku lo suka a munhu wa yindlu ya ka Levi, a ya teka a nhanyana wa lixaka la ka Levi. Mitse. 26:59

² Loyi wasati i lo xura nyimba, a beleka nisanyana; makunu laha a nga wona lezaku a xihlangana xi sasekile, i lo xi fihla tihweti tinharu. Miti. 7:20; Maheb. 11:23

³ Laha a nga ngha a nga zi koti ku mu fihla, i lo teka xitataro xa tihlanga, a xi tota a katarao ni hlakati, zonake a veka xihlangana lomo; i lo teka xitataro aya xi veka xikari ka hlanga hi le mbhirini ya congo.

⁴ Kanilezi a nhanyana, a makabye wa xihlangana, i lo ya yima hi le kulanyana kasi ku wona lezo zi ta nga xi humela.

⁵ Zonake a nhanyana wa Faro i lo relela congweni ku ya hlamba; a vanhanyana vakwe va wa fambafamba lomu mbhirini ya congo. Laha a nga wona xitataro xikari ka hlanga, i lo ruma a nanza gakwe ku ya xi teka.

⁶ Laha a nga xi funungula, i lo wona a xihlangana xa wanuna na xi kari xi rila. I lo xi zwela wusiwana, aku: Lexi xihlangana xa muHeberu.

⁷ Zonake a makabye wa xihlangana aku ka nwaFaro: Nzi ya ku vitanela a muanwisi xikari ka vavasati va maHeberu a ta ku anwisela xihlangana ke?

⁸ NwaFaro aku ka yena: Famba. A nhanyana i lo suka a ya vitana a nyine wa xihlangana.

⁹ NwaFaro aku ka yena: Teka a xihlangana lexi u ya nzi anwisela, nzi ta ku hakhisa. Zonake a wasati i lo teka a xihlangana a ya xi anwisa.

¹⁰ Laha a xihlangana xi nga wa kulile, yena i lo xi heleketa ka nwaFaro; yena i lo mu maha nʼwana wakwe, a mu chula vito ga Mosi, aku: Nzi mu humesile matini. Mosi a tsutsuma le Gipite.

¹¹ Hi lexo xikhati, laha Mosi a nga kulile, i lo enzela vamakabye vakwe, leyo i lo ya wona a mikhinyavezo yabye yo tika. Laho i lo wona a muGipite na aba wanuna wa ka kabye, wa muHeberu.

¹² Yena i lo, cuwuka seno ni seno, a wona lezaku ku hava munhu, a si daya muGipite a mu tumbeta vunyeni.

¹³ I lo huma kambe hi siku gi gamelako; i lo ya wona a vavanuna vambiri va maHeberu na valwa. Aku ka loyi a nga hoxisile: U mu bela yini nakuloni?

¹⁴ Yena aku: Himani, a ku vekileko akuva hosi ni mulamuli xikari ka hina? U lava ku nzi daya kota lezi u nga daya a muGipite ke? Mosi i lo chava, aku: Hizinene, a mhaka leyi yi tibyilwe!

¹⁵ Zonake laha Faro a nga zwile a mhaka leyi, i lo hlota Mosi kasi ku mu daya. Kanilezi Mosi i lo tsutsuma Faro aya tikweni ga Midiani, a ya tshama le hlobyeni.

¹⁶ A mupristi wa le Midiani i wa hi ni vanhanyana va ntlhanu ni vambiri. Va lo takha mati, va khelela lomu ka xigowolo kasi va nwisa mitlhambi ya raru wabye.

¹⁷ Kanilezi a varisi va lo ta chikela va va hlongola; Mosi i lo suka a va yimela, a nwisa mitlhambi yabye.

¹⁸ Makunu, na va yile kaya ka raru wabye Reueli, ite ka vona: Inyamutlha mu lo hatlisa ku wuya hiyini ke?

¹⁹ Vaku: MuGipite a nga hi yimela ka varisi, a hi khelela mati, a nwisa mitlhambi ya hina.

²⁰ Yena aku ka vona: Makunu i kwihi munhu loye? Mu mu siyele yini? Mu vitaneni a taga zinwe na hina.

²¹ Mosi i lo vumela ku tshama ni munhu loye; zonake i lo teka Zipora a nʼwana wakwe.

²² Zipora i lo beleka nisanyana; Mosi i lo mu chula vito ga Gerxomi, hakuva i te ngalo: Nzi wa hi muluveli tikweni ga vamatiko.

²³ Makunu anzhako ka malembe yo tala, a hosi ya le Gipite yi lofa. A vanana va ka Israeli va wa hi hlomulweni hi kota ya wukhumbi gabye. Va lo rila hi kota ya wukhumbi; a kurila kabye ku lo tlakukela ka Nungungulu. Mitse. 20:16

²⁴ Nungungulu i lozwa kurila kabye, a alakanya a xivumelwano xakwe na Abrahama, na Isaka, na Jakobe.

²⁵ Nungungulu i lo cuwuka ka vanana va ka Israeli, a va hawukela.