Eksodusi 19 - Tshwa Bible

A xitsunga xa Sinai.

¹ Makunu anzhako ka tihweti tinharu, kusukela kuhumeni ka vaIsraeli hi le Gipite, va lo chikela xiwuleni xa Sinai hi siku lego.

² Laha na va sukile Refidime, va lo chikela xiwuleni xa Sinai, va zimeka matenda yabye lomo xiwuleni; Israeli i lo gova ko cuwukana ni xitsunga.

³ Mosi i lo kanziha kuya ka Nungungulu; Jehova a mu vitana na hi lomu xitsungeni, aku: Wulawula ka yindlu ya Jakobe, u byela a vanana va ka Israeli, uku: Miti. 7:38

⁴ Mu zi wonile lezi nzi zi mahileko ka vaGipite ni lezi nzi mu tlakukileko zona hi tipapa ta gama nzi mu tisa ka mina.

⁵ Makunu lezi, loku mu ingisa a gezu ga mina, mu hlayisa a xivumelwano xa mina, mu tava tshomba ya mina nwinyi ku hunza manwani matiko hakuva a misava yontlhe nja mina. Deut. 5:2; 1 Kor. 10:28; Tit. 2:14

⁶ Mu tava tiko ga vapristi, a tiko gi basileko. Leti hi timhaka leti u ta nga byela a vanana va ka Israeli. Deut. 7:6; 1 Ped. 2:9; Kuv. 1:6; 5:10

⁷ Zonake Mosi i lo vitana a masingalakati ya vanhu, a va tlhamusela tontlhe leti timhaka Jehova a mu leleteleko tona.

⁸ Vontlhe vanhu va lo hlamula khatiginwe, vaku; Zontlhe lezi Jehova a zi wulileko hi ta zi maha. Mosi i lo yisa timhaka ta vanhu ka Jehova.

⁹ Zinghaho Jehova aku ka Mosi: Nzi tata ka wena hi refu ga ntima, kasi a vanhu va fela ku zizwa loku nzi wulawula na wena, va ta fela ku ku tsumba wontihe masiku. Zonake Mosi i lo tshama a hlawutela Jehova a timhaka ta vanhu.

¹⁰ Jehova i te ngalo ka Mosi: Famba ka vanhu u ya va basisa nyamutlha na manziko, va hlaza tinguwo tabye;

¹¹ va ti longisela a siku ga wunharu, hakuva hi siku ga wunharu Jehova i ta relela le xitsungeni xa Sinai mahlweni ka vanhu vontlhe.

¹² Kambe u ta kombisa vanhu a mbhingano lowu wu renzetekelako xitsunga, uku: Ti woneleni, mu nga kanzihi le xitsungeni, hambu ni ku henya matlhelo ya xona, a munhu loye a ta nga khumba xitsunga i ta dawa.

¹³ A nga kona a to mu khumba, kanilezi i ta gandliwa hi maribye, kutani ku gwaziwa hi tlhari; hambu xi hi xifuyo kutani munhu, a nga ta hanya. Laha na ku biwa punzu, va ta kanziha te xitsungeni. Maheb. 12:20

¹⁴ Mosi i lo relela hi le xitsungeni, aya ka vanhu a ya va basisa, va hlaza tinguwo tabye.

¹⁵ Mosi aku ka vanhu: Ti longiseleni siku ga wunharu; mu nga dzuki mu gamakana ni vavasati.

¹⁶ Hi siku ga wunharu laha na gi cile, ku wa hi kona kudzinza ni kuhatima, ni refu legi ga ntima na gi hi hehla ka xitsunga; ni kuvuma loku ka hombe ka punzu ku lo tinga. Zonake a vanhu vontlhe lava va nga hi lomu wugovelweni va lo rurumela.

¹⁷ Zonake Mosi i lo humesa vanhu lomu wugovelweni va famba ku ya tlhangana ni Nungungulu. Va loya yima lahasi ka xitsunga.

¹⁸ Zonake a xitsunga xa Sinai xi lo tuvika musi matlhelo wontihe, hakuva Jehova i wa relele ka xona na hi lomu nzilweni. A musi wa kona wu lo tuvikela hehla kotisa musi wa phingo ga nzilo. Zonake a xitsunga xontlhe xi lo tsekatseka nguvu. Deut. 4:11; Maheb. 12:18

¹⁹ A kuvuma ka punzu ku lo simamisa ku tinga ku hunza mpimo. Mosi i wa kari a wulawula, Nungungulu a mu hlamula hi gezu ga hombe.

²⁰ Zalezo Jehova i lo relela xitsungeni xa Sinai hi le hehla ka xitsunga; zonake Jehova a vitana Mosi kwa le hehla ka xitsunga. Mosi a kanziha aya kona.

²¹ Jehova aku ka Mosi; Relela u ya byela vanhu lezaku va nga dzuki va tshinela ku ta wona Jehova, ku ngafa vanhu vo tala xikari ka vona.

²² Hambu a vapristi lava va tshinelako ka Jehova, vonawu va fela ku ti basisa kasi Jehova a nga va dayi,

²³ Mosi aku ka Jehova: A vanhu cima va nga ta kanziha xitsungeni xa Sinai, hakuva u hi byelile lezaku; Renzelekela xitsunga hi mbhingano, u xi basisa.

²⁴ Zonake Jehova aku ka yena: Tlhela, u ta kanziha na Aroni; kanilezi a vapristi ni vanhu va nga kanzihi vaya ka Jehova, kasi va ngati va ta dawa.

²⁵ Mosi i lo relela a ya byela vanhu leti timhaka.