Danieli 11 - Tshwa Bible

¹ Kasi mina nzi lo mu yimela nzi mu tiyiseta hi lembe go sangula ga kufuma ka Dariusi a muMedi.

² Makunu nzi ta ku byela a zinene. Ka ha ta huma tihosi tinharu le Persia; a ya wumune yi tava ni kufuma ku hunza tona tontlhe. Loku a titshomba takwe ti mu nyikile a ntamu, i ta vuxa vontlhe a ku yalwa ni tiko ga maGreki.

³ Zonake ku ta huma a hosi ya wunhenha, yi ta nga fuma hi ntamu wa hombe, yi maha kuranza ka yona.

⁴ Loku a wumbelwe wuhosi, a mufumo wakwe wu ta tshobyiwa, wu avanyiselwa a mune wa matlhelo ya tilo; kanilezi wu nga nyikwi ka pswalo wakwe, ni ntamu wabye wu nga ta fana ni lowu a nga hi nawo yena; hakuva a mufumo wakwe wu ta tsuwulwa, wu avelwa vanwani va nga hiko va ka kabye.

⁵ A hosi ya le Dzongeni yi tava ni ntamu, kanilezi yinwe ya tinduna ta yona yi tava ni ntamu ku hunza yona; yi ta fumela, ni mufumo wa yona wu tava wa hombe.

⁶ Anzhako ka malembe va ta akelana wuxaka, a nhanyana wa hosi ya le Dzongeni i tata ka hosi ya le Nwalungu a ku vuxa kuzwanana. Kanilezi a woko gakwe gi nga ta tiya, na yenawu a nga ta tiya, ge hambu ni woko gakwe; kanilezi a nhanyana loyi i ta nyikelwa, yena ni lava a tileko navo, ni loyi a mu belekileko ni loyi a nga mu seketela zikhatini lezo.

⁷ Kanilezi a ginwe ga mahluke ya mitsu yakwe, i ta teka xikhundla xakwe, loyi a ta ngata ni yimpi a ta enghenela makhokholeni ya hosi ya le Nwalungu, alwa navo a va hlula.

⁸ A vanungungulu vabye, ni zifananiso zabye zi chululweko, ni zibya zabye za siliva ni nzalama, i ta zi wutla a zi yisa Gipite. Zonake hi malembe yo kari a nga ta ha Vukela a hosi ya le Nwalungu.

⁹ Kanilezi inaloyi i ta hloma yimpi a ku yalwa ni hosi ya le Dzongeni, kanilezi i ta tlhelela tikweni gakwe;

¹⁰ A vana Vakwe va talwa, va ha tsombanyisa a mabutho yo tala; a munwe wabye i ta gobhoza a fenengeta a hunza, a tlhela a wuya a ta vimbezela a khokhola ga hosi ya le Dzonga.

¹¹ A hosi ya le Dzongeni yi ta zangara, yi huma ku yalwa naye loyi a nga hosi ya le Nwalungu. I ta tsombanyisa a xidlemo xa hombe, kanilezi a xidlemo lexi xi ta nyikelwa mandleni ya hosi ya le Dzongeni.

¹² A xidlemo xi ta hlaselwa ku dawa mazana ya mazana; a mbilu ya hosi yi ta ti kukumukisa, kanilezi yena a nga ta hlula.

¹³ A hosi ya le Nwalungu yi ta tlhela, yi ta tsombanyisa a xidlemo xa hombe xo hunza leʼxo ranga; anzhako ka malembe yo kari i tata ni yimpi ya hombe ni nhunzu yo tala.

¹⁴ Zikhatini lezo vanyingi va ta vukela a hosi ya le Dzongeni; ni vana va tihanyi va tiko ga wena va ta vuka, vaku va ta tatisa a muwoniso, kanilezi va ta dawa.

¹⁵ A hosi ya le Nwalungu yi ta ta aka a libhingo lo tlakuka, yi teka a muti wu bhiyelweko khwatsi. A tiyimpi ta le Dzongeni ti nga ta yima, ge hambu a tinhenha ta vanhu vakwe va nga tava ni ntamu wo yimelana nayo.

¹⁶ Loyi a ta ngata ku talwa naye, i ta maha kota kuranza kakwe, a nga kona a to yima mahlweni kakwe. I ta yima lomu tikweni go saseka, i ta lovisa hi canja gakwe.

¹⁷ I ta phikelela ku yalwa hi ntamu wa mufumo wakwe wontihe, kanilezi i ta maha kurula ni hosi ya le Dzongeni. I ta mu nyika a nhanyana wakwe akuva sati wakwe kasi ku mu lovisa ha yena, kanilezi a mano lawo ma nga ta maheka, zi nga ta mu vuna nchumu.

¹⁸ Anzhako ka lezo i ta hunzulukela zihlaleni, a teka zinyingi za zona. Kanilezi a hosana yinwani yi ta mbheta a tinzhukano takwe, yi ta ti tlhelisela hehla kakwe.

¹⁹ Zonake i ta tlhelela makhokholeni ya tiko gakwe; kanilezi i ta khunguvanyeka awa, a nga ha kumiwi kambe.

²⁰ Wutshanwini gakwe ku ta huma munwani loyi, a ta nga ruma mukhupisi a tsemakanya a tlhelo go saseka nguvu ga mufumo wakwe, kanilezi i ta lobyiswa na ku nga taku masiku mangani, na ku nga hi zanga hambu a yimpi.

²¹ Wutshanwini gakwe ku ta huma a munhu wo soleka, loyi a nga hiko na fanelo akuva hosi; i tata laha va nga mu languteliko, a ta teka wuhosi hi mano.

²² A tiyimpi leʼtinyingi ti ta kukuletwa mahlweni kakwe, ti hangalaswa, zinwe ni hosana ya xivumelwano.

²³ Loku munhu a maha xivumelwano naye, i ta mu khohlisa; i ta suka a ya hlula na hi ni yimpi yi tsongwani ntsena.

²⁴ Zikhatini za kurula i tata lomu matshanwini yo nona ya tiko, a ta maha lezi a vararu vakwe ni vakoko vakwe va nga zi mahangiko: i ta avanyisela vanhu vakwe a muphango ni chuma ni nhunzu. I ta maha xikungo xo vukela makhokhola kala xikhatini xi yimisilweko,

²⁵ I ta ti tiyiseta a tiyisa mbilu yakwe a ku yalwa ni hosi ya le Dzongeni hi yimpi ya hombe. A hosi ya le Dzongeni na yonawu yi ta hloma yimpi ya hombe nguvu yi talwa nayo; kanilezi yi nga ta humelela hakuva va ta mu mahela gujeguje.

²⁶ Ina, lava va gako mezeni yakwe va ta mu lovisa, a yimpi yakwe yi ta hangalaka, vanyingi va tawa va dawa.

²⁷ A tihosi leti ta timbiri ti ta ehleketa kubiha timbilwini ta tona, ti wulawula mawunwa mezeni yinwe; kanilezi zi nga ta tiya, hakuva a magumo ma tata hi xikhati xi yimisilweko.

²⁸ I ta tlhelela tikweni gakwe ni nhunzu yo tala; lomu mbilwini yakwe i ta boha xikungo xo vukela a xivumelwano xi basileko, ni loku a xi tatisile i ta tlhelela tikweni gakwe.

²⁹ Hi xikhati xi yimisilweko i ta tlhela a wuya Dzongeni; kanilezi legi khati gi nga ta fanana ni leʼgo ranga.

³⁰ Hakuva a mataru ya le Kittimu ma tata ma talwa naye; hikwalaho i ta mbhela ntamu, a tlhelela nzhako. I ta engeta a zangarela a xivumelwano xi basileko a maha kuranza kakwe, a tlhela a zwanana ni lava va tsikileko a xivumelwano xi basileko.

³¹ A mabutho ma rumilweko hi yena ma ta nyenyezisa a wutshamu ga kubasa ni khokhola, va ta fuvisa a minyikelo ya kuhiswa ya simasima, va yimisa a manyalataniso ya mbangalakasa. Mitse. 28:4; Mat. 24:15

³² Hi mano yakwe i ta ti kokela lava va vukelako a xivumelwano; kanilezi lava va tivako Nungungulu wabye va tava ni ntamu va tira zihlamaliso.

³³ Lava va tlharihileko xikari ka tiko va ta gonzisa vanyingi; kanilezi va ta dawa hi supado, ni nzilo, ni wukhumbi ni kuphangiwa a masiku yo kari.

³⁴ Makunu laha na va xanisiwa va ta kuma xivuno xi tsongwani; kanilezi vanyingi va ta ti tlhanganyisa navo hi kukhohlisa.

³⁵ A vanwani lava va tlharihileko va ta dawa, kasi vanhu va fela ku ringiwa ni ku hlaziwa, va basiswa kala xikhatini xa kugumesa, hakuva magumo ma nga ta chikela kala xikhatini xi yimisilweko.

³⁶ A hosi yi ta maha kuranza ka yona; yi ta ti kukumukisa yi ti kulisa hehla ka vanungungulu vontlhe; yi ta wulawula tinzhukano ti hlamalisako hi Nungungulu wa vanungungulu. Yi ta humelela kala kugumeseni ka xikhati xa zanga, hakuva lexi xi yimisilweko xi ta maheka. 2 Tes. 2:4; Kuv. 13:5

³⁷ A nga ta khatalela a vanungungulu va vararu vakwe, hambu ni loyi a tsakelwako hi vavasati, ge hambu ku khatalela ni wihi nungungulu, hakuva i ta ti tlakusa hehla ka vona vontlhe.

³⁸ Kanilezi i ta khozela a nungungulu wa makhokhola; i ta dzunza a nungungulu loyi a nga tibyiwangiko hi vadadani vakwe, hi nzalama ni siliva ni maribye ya tsengo ni zilo za lisima.

³⁹ I ta hlula a makhokhola ma tiyileko nguvu hi xivuno xa nungungulu a nga tibyiwiko; ni wihi a ta nga mu tirela i ta mu dzunza; i tava maha vafumeli hehla ka vo tala, a va avela a tiko hi ku rengelelwa.

⁴⁰ A xikhatini xa magumo a hosi ya le Dzongeni yi talwa naye; a hosi ya le Nwalungu yi ta mu hlongolisa kota a xipupuri hi tikareta ta yimpi ni vakhileli va mahaxi ni mataru yo tala. I ta enghena lomu matikweni a kukuleta khwatsi i ntalo, a hunza.

⁴¹ I ta enghena kambe tikweni go saseka, ni matiko manyingi ma ta hlaselwa; kanilezi Edome na Moabi ni vahombe va vana va ka Amoni va ta pona canjeni gakwe.

⁴² I ta nawuluta a canja gakwe ka matiko manwani, ni tiko ga Gipite gi nga ta pona.

⁴³ I ta phanga a titshomba ta nzalama ni siliva, ni zontlhe zilo za lisima za le Gipite; a vaLibia ni maEtiopia va ta mu lanza.

⁴⁴ Zonake a mahungu lawa ma ta nga huma hi le Mutsuwuka-gambo ni le Nwalungu ma ta mu karata. I ta huma hi zanga ya hombe nguvu a ku ya hlasela ni ku hihirita vo tala.

⁴⁵ I ta gwimba matenda yakwe ya wuhosi xikari ka bimbi ni xitsunga xa kubasa leʼxo saseka nguvu. Kanilezi i taya gumelwa, a nga kona a to mu vunetela.