Amosi 9 - Tshwa Bible

A kulobyiswa ka mufumo wo biha.

¹ Nzi lo wona Hosi na yi yimile kusuhani ni alati, yiku ngalo: Bana tihloko ta timhanze, kasi a zipimbitsi za tinyangwa zi tsekatseka, u zi fayela hehla ka tihloko ta lava va nga kona lomo; lava va ta nga sala nzi ta va daya hi supado, ku nga ta tsutsuma ni munwe hambu ku pona.

² Hambu loku va hoxa va enghena Xeole, lomo na konawu nzi ta va humesa; hambu loku va nga kanziha vaya tilweni, kwaleyo kambe nzi ta va releta lahasi.

³ Hambu loku va nga ya fihlala le hehla ka Karmeli, nzi ta va lava kala nzi va humesa lomo; hambu loku va nga nzi fihlalela kueteni ka bimbi, nzi ta va rumela a nyoka yi ya va luma kwaleyo.

⁴ Hambu loku va yiswa wukhumbini hi valala vabye, kwaleyo nzi ta va rumela supado yi ya va daya. Nzi ta va langutela hi kubiha, na ku nga hi kusaseka.

⁵ Hakuva a Hosi, a Jehova wa tiyimpi, loyi a khumbako misava yi nyeka, kasi vontlhe va tshamako ka yona vaba nkosi, yi kukumuka ku fanana ni congo wa Nilo, yi tlhela yi bohla kukotisa congo wa le Gipite; Vala. 5:4; Nab. 1:5

⁶ hi yena loyi a akako a tiyindlu takwe le tilweni, a tshambuluta a tilo gi maha a langwa hehla ka misava; a vitanako a mati ya bimbi a ma chulula hehla ka misava. A vito gakwe hi Jehova.

⁷ Ka mina a mu fanani ni vana va maEtiopia ke, nwina vana va ka Israeli? ku wula Jehova. A nzi humesangi Israeli tikweni ga Gipite, ni maFilistia tikweni ga Kaftori, ni maSiria tikweni ga Kire ke? Gen. 10:14; Deut. 2:23; Am. 1:5

A misalela.

⁸ Langutani, a mahlo ya Hosi Jehova ma honokela a mufumo lowu wa kuonha, nzi ta wu lovisa nghoheni ya misava; ntsena lezaku a yindlu ya ka Jakobe nzi nga ta yi lovisela magumo, ku wula Jehova.

⁹ Hakuva nzi ta leletela lezaku a yindlu ya ka Israeli yi heheriwa xikari ka matiko wontlhe, kukotisa a mavele ma heheriwako hi lihlelo, ku ngawi ni nzhoho yinwe lahasi.

¹⁰ Vontlhe vaonhi va tiko ga mina va ta dawa hi supado, lava vange: A khombo gi nga ta hi tshinelela, ge hambu ku hi wela.

A kutlheliselwa ka Israeli.

¹¹ Hi siku lego nzi ta vuxa a tenda ga Davida legi gi wileko, nzi lema a tifa ta gona; nzi ta vuxa marumbi yakwe, nzi ta gi aketa khwatsi hi lezi gi nga hi zona kale;

¹² kasi va fela ku fumela a misalela ya Edome, ni matiko wontlhe lawa ma vitanwako hi vito ga mina, ku wula Jehova yaloye a ta nga maha lezo.

¹³ Jehova i ngalo: A masiku mata lawa a murimi a ta nga lanza a mabata ya mutshoveli, ni mukameli wa mauva a ta nga lanza a mubyali wa mbewu; a zitsunga zi ta donela vinya go tsombela, ni miganga yontlhe yi ta nyeka.

¹⁴ Nzi ta tlhelisela a vabohiwa va vanhu va mina va Israeli, va ta aketa a miti leyi yi nga hi marumbi va tshama ka yona; va ta byala zivina, vanwa a vinya ga zona; va rima masimu, vaga a mihanzu ya wona. Deut. 28:30, 39; Am. 5:11

¹⁵ Nzi ta va byala tikweni gabye, cima va nga ta ha tsuwulwa kambe a tikweni legi nzi va nyikileko gona, ku wula Jehova a Nungungulu wa wena.