Amosi 8 - Tshwa Bible

A muwoniso wa mihanzu ya ximumu.

¹ Hosi Jehova i nzi kombisile lezi: Nzi lo wona a xirunzu na xi tele hi mihanzu yi buvileko.

² Yena aku ka mina: Amosi, xini u xi wonako? Mina nziku: Xirunzu xo tala hi mihanzu yi buvileko. Zonake Jehova aku ka mina: A kugumelwa ka vanhu va mina va Israeli ku chikele. Nzi nga ta ha va tsetselela kambe. Am. 7:8

³ A tisimu ta tempeli ti ta hunzuka ti maha mikosi sikwini lego, ku wula Hosi Jehova. Ku tava ni zirumbi zinyingi; zi ta hoxetelwa matshamu wontlhe na ku miyelwe.

A kulamulwa ka vamahungani va nga kholekangiko.

⁴ Zwanani lezi mu ti yimiseleko ku mita vavumali, mu lovisako a vatsongwani va tiko, mu nge ngalo:

⁵ A siku ga hweti yiswa gi ta mbhela rini, kasi hi fela ku xavisa mavele? A sabado gona gi ta hunza rini, kasi hi fela ku vulula magomba ya hina, hi hungula a efa, hi kulisa a tsengo, hi kalavela laha xikalweni? Deut. 25:13

⁶ Hi ta xava a zisiwana hi siliva, ni vavumali hi patswa wa zilato, hi xavisa ni makaha ya mavele.

⁷ Jehova i hlambanyile hi matshanza ya Jakobe, aku: Hizinene cima nzi nga ta rivala ni wunwe wa mitiro yabye.

⁸ A misava yi nga ta tsekatseka hi kota ya lezo ke, ni vontlhe a vaaki va yona va nga ta maha hlomulo ke? Ina, a misava yontlhe yi ta kukumuka ku fanana ni congo wa Nilo; yi ta vindluka yi tlhela yi bohla kukotisa congo wa le Gipite.

⁹ Hosi Jehova i ngalo: Hi siku lego nzi ta pelisa gambo laha munwini, nzi vanga munyama laha misaveni xikhatini xa hlikanhi. Mik. 3:6

¹⁰ Nzi ta hunzula a mibuzo ya nwina yi maha xirilo, ni tisimu ta nwina ti maha mikosi; a ziwunu zontlhe nzi ta zi ambexa tinguwo ta tisakwa, a tihloko tontlhe ti ta halulwa. A xirilo xa kona xi ta fanana ni xo khwatsi ko riliwa a nʼwana loyi a belekelweko yece, a kugumelwa ka xona ku ta fanana ni siku ga hlomulo. Jer. 6:26; 48:37; Zak. 12:10

A ndlala ya timhaka ta Hosi.

¹¹ Hosi Jehova i ngalo: Ma hata masiku lawa nzi ta nga rumela a ndlala misaveni, na ku nga hi ndlala ya zakuga, kutani a tora go lava mati, kanilezi a ndlala yo lava timhaka ta Jehova.

¹² Va ta nzula mabimbini wontlhe, kusukela Nwalungu kala wuceni; va ta tsenzeleka va hlota a mhaka ya Jehova, va nga yi kumi.

¹³ Hi siku lego a vanhwana va timbhuri ni majaha va ta karala hi tora.

¹⁴ Lava va hlambanyako hi xionho xa Samaria, vaku: Hi wutomi ga nungungulu wa wena Dani! niku, Hi wutomi ga ndlela ya le Berexeba! Na vonawu va tawa, va nga ha vuki kambe. 1 Tih. 12:28; Hos. 10:8