Amosi 7 - Tshwa Bible

A muwoniso wa humbi.

¹ Hosi Jehova i nzi kombisile lezi: Langutani i lo maha humbi kusanguleni ka mela wa wumbiri wa byanyi, anzhako na gi kayilwe hi hosi.

² Laha na yi mhhetile a kuga a byanyi gontlhe ga tiko, nzite: Hosi Jehova, hi nga zwela wuxinji! Jakobe i ta yimisa kuyini, lezi a nga tsongwani?

³ Jehova i lo zi tsika. Zi nga ta maheka, ku wula Jehova.

A muwoniso wa nzilo.

⁴ Hosi Jehova i nzi kombisile lezi: Nzi lo wona Hosi Jehova na a vitana a nzilo kasi ku ta tsayisa ha wona. Wu lo hisa a mati ya kueta, wu sangula ku hisa a tiko ga xiavelo.

⁵ Zonake mina nziku: Hosi Jehova maha wuxinji u zi tsika. Jakobe i ta yimisa kuyini, lezi a nga tsongwani?

⁶ Jehova i lo zi tsika. Ni lezi zi nga ta maheka, ku wula Hosi Jehova.

A lingoti la ziringaniso.

⁷ I lo nzi kombisa lezi: Nzi lo wona Hosi na yi yimile hehla ka khurisi gi akilweko giku pswhe, na yi hi ni lingoti la xiringaniso canjeni gakwe.

⁸ Jehova aku ka mina: Amosi, xini u xi wonako? Mina nziku: Lingoti la xiringaniso. Zonake a Hosi yiku: Languta, nzi ta hayeka a lingoti la xiringaniso xikari ka vanhu va mina va ka Israeli; nzi nga ta ha va tsetselela kambe.

⁹ A matshamu ma tlakukileko ya Isaka ma ta hahlulwa, ni matshamu ma basileko ya ka Israeli ma ta hangalasiwa; nzi ta vukela a yindlu ya ka Jeroboamu hi supado. 2 Tih. 17:20

Amazia a vukela Amosi.

¹⁰ Zonake Amazia a mupristi wa le Beteli i lo rumela a ka Jeroboamu a hosi ya ka Israeli, aku: Amosi i ku hlevile xikari ka yindlu ya ka Israeli; a tiko a gi zi koti ku timisela timhaka takwe.

¹¹ Hakuva Amosi i ngalo: Jeroboamu i ta dawa hi supado, na Israeli i ta humeswa tikweni gakwe aya wukhumbini.

¹² Kambe Amazia aku ka Amosi: Wena muvumbi, ti fambele u chavela tikweni ga ka Juda, lomo u ta nga ya kuma kona zakuga, ni ku profetela kona, 1 Sam. 9:9; Am. 2:12

¹³ Kanilezi u nga ha profeteli kambe lomu Beteli, hakuva wutshamu gi basileko ga hosi, hi tempeli ya tiko.

¹⁴ Amosi i lo hlamula aku ka Amazia: A nzi muprofeti mina, ge hambu a kuva nʼwana wa muprofeti; kanilezi nzi murisi ni muhlayisi wa tisinya ta mikuwu.

¹⁵ Jehova i lo nzi susa wurisini ga mitlhambi, aku ka mina: Famba u ya profeta ka vanhu va ka Israeli.

¹⁶ Makunu zwanake a mhaka ya Jehova, wena u nge: U nga profeteli Israeli, hambu ku wulawulela a yindlu ya ka Isaka.

¹⁷ Hikwalaho Jehova i ngalo: A sati wa wena i tava xibhayi lomu mutini, a vafana va wena ni vanhanyana va wena va ta dawa hi supado; a masimu ya wena ma ta panzelelwa mimbhingano. Wena wutsumbu u ta fela tikweni gi nga hlazekangiko, na Israeli futsi i ta humeswa tikweni gakwe a yiswa wukhumbini. 2 Tih. 17:6, 18, 24