Amosi 5 - Tshwa Bible

Vanhu va vitanwa kuhunzulukeni.

¹ Zwanani a mhaka leyi nzi mu belako ha yona a nkosi, nwina va yindlu ya ka Israeli.

² A nhwana wa ka Israeli i wile, a nga ta ha tlhela a yima kambe; i tlatlalatilwe lahasi a tikweni gakwe, i hava a to mu vuxa.

³ Hakuva Hosi Jehova i ngalo: A muti wa ka Israeli lowu wu nga humesa a 1,000 wa valwi, wu ta salelwa hi 100, ni lowu wu nga humesa a 100 wu ta salelwa hi 10,

⁴ Hakuva Jehova i ngalo ka yindlu ya ka Israeli: Nzi hloteni, mu ta hanya. Mav. 4:4

⁵ Kanilezi mu nga hloteni Beteli, ge hambu a kuya Gilgale; kambe mu nga hunzi muya Berexeba. Hakuva Gilgale i ta yiswa wukhumbini; na Beteli a nga ta ha nyawula.

⁶ Hlotani Jehova, mu ta hanya; kasi a nga weli a yindlu ya Josefa khwatsi i nzilo, na a nga hi kona le Beteli loyi a nga wu timako.

⁷ Nwina lava mu hunzulako a nongameto wu maha manonwe, a kululama mu chulula lahasi;

⁸ hlotani loyi a mahileko Xirimela ni Mahlahle; loyi a hunzulako munyama wu maha mixo, a hlikanhi wu hunzuka wu maha wusiku; loyi a vitanako a mati ya bimbi a ma chulula le hehla ka misava; a vito gakwe hi Jehova. Joba 9:9; 38:31; Am. 4:13

⁹ Wa lovisa a wantamu hi xitshuketi, a khungumula makhokhola.

¹⁰ Va venga loyi a va kawukako le hubyeni, va swireka hi loyi a wulawulako kululama.

¹¹ Lezi nwina mu kanzihelako loyi a vumalako, mu mu khupisa hi mavele; hambu loku mu akile a tiyindlu hi maribye yo vatliwa, mu nga ta tshama ka tona,, ni loku mu phayile a zivina za nwina zo saseka, mu nga tanwa a vinya ka zona. Deut. 28:30, 38; Zef. 1:13

¹² Hakuva nza gi tiva a wunyingi ga zihambunyeto za nwina, ni wukulu ga zionho za nwina. Mu hlokisa a valulamileko, mu vumela ku xavelelwa, mu vukela a vavumali lomu hubyeni.

¹³ Hikwalaho loyi a tlharihileko i ta ti miyelela a xikhatini lexi, hakuva xikhati xo biha.

¹⁴ Hlotani leʼzinene, na ku nga hi kubiha, kasi ma fela ku hanya. Zinghaho Jehova a Nungungulu wa tiyimpi i tava na nwina, kota kuwula ka nwina.

¹⁵ Vengani kubiha, mu ranza zinene; mu tiyisa nongameto le hubyeni; kutani Jehova a Nungungulu wa tiyimpi i tava ni wuxinji hi misalela ya ka Josefa. Rom. 12:9

¹⁶ Hikwalaho Jehova a Nungungulu wa tiyimpi, yena Hosi, i ngalo: Va taba nkosi maphangweni wontlhe, tindleleni tontlhe va taku: Wowe, wowe! Va ta vitana murimi a ku ta rila, ni lava va nga zitlhatlha tisinwini ta xirilo.

¹⁷ Lomu masinwini wontlhe ya zivina ku tava ni mikosi, hakuva nzi ta hunza hi xikari ka wena, ku wula Jehova.

A siku ga Hosi.

¹⁸ I khombo ka nwina mu navelako a siku ga Jehova! Mu gi navelela yini a siku ga Jehova? Gi tava ga munyama, gi nga tava ga kuwonekela.

¹⁹ Mu ta kota munhu a tsutsumako a nghala, a ya tlhangana ni urso; a enghena lomu ndlwini a ti hiketela khurisini hi canja gakwe, a nyoka yi mu luma.

²⁰ Kasi a siku ga Jehova gi nga tava ga munyama, gi ngava ga kuwonekela ke? Ga munyama wo phuma, gi nga wonekelisa kuyini?

²¹ Nza venga ni ku nyenya a mibuzo ya nwina, a nzi xalaliswi hi tihlengeletano ta nwina ta ximuse. Levi 26:31; Isa. 1:11; Jer. 6:20

²² Ina, hambu loku mu nzi mahela a minyikelo ya nwina ya kuhiswa ni ya tinzhoho nzi nga ta yi amukela; ge hambu a minyikelo ya nwina ya kurula ya zihari zi nonileko.

²³ Tsikani a guwa ga tisimu ta nwina, hakuva a nzi lavi kuzwa a kuketsela ka mihambi ya nwina.

²⁴ Kanilezi nongameto a wu khulunge khwatsi i mati, ni kululama kukotisa congo wu nga pswhiko.

²⁵ Nwina va ka Israeli, laha mu nga hi lomu xiwuleni a 40 wa malembe mu wa nzi mahela miphahlelo ni minyikelo ya zakuga ke? Miti. 7:42

²⁶ Ina, mu ta rwala a tenda ga hosi ya nwina, a zifananiso ni nyeleti ya nungungulu wa nwina, lezi mu nga ti mahela nwina wutsumbu. Deut. 32:17

²⁷ Hikwalaho nzi ta mu yisa wukhumbini le tlhatuko wa le Damasku, ku wula Jehova, loyi a vito gakwe a nga Nungungulu wa tiyimpi.