Amosi 3 - Tshwa Bible

A kutsayiswa ka Israeli.

¹ Zwanani a mhaka leyi Jehova a yi wulawulileko ka nwina vanana va ka Israeli, ni ka ngango wontlhe lowu nzi wu humesileko tikweni ga Gipite, i ngalo:

² Hi nwina nwece nzi mu hlawulileko xikari ka yontlhe mingango yi nga laha misaveni; hikwalaho nzi ta mu tsayisa hi kota ya zigoho zontlhe za nwina. Ekso. 19:5; Deut. 4:20

³ A vanhu vambiri va nga famba zinwe, ahandle ka kuva va kari va zwanana ke?

⁴ A nghala yi nga dzuma lomu khwatini, ahandle ka kuva yi hi ni pfimba ke? A zinghalana xi nga ngurangura nzawini wa xona, ahandle ka kuva xi khomile nchumu ke?

⁵ A xinyanyani xi nga phasiwa lahasi laha ku nga dembiwangiko a tlhamu ke? A tlhamu wu dembilweko wu nga wachuka wu nga phasi nchumu ke?

⁶ Ku nga biwa mpunzu lomu mutini a vanhu va nga dzuki ke?. A muti wu nga welwa hi khombo na gi ngati hi le ka Jehova ke? Isa. 45:7; Jer. 11:11

⁷ Futsi Hosi Jehova a nga zi koti ku maha nchumu na a nga se ku tivisa a malanza yakwe, va nga vaprofeti.

⁸ Loku a nghala ya dzumadzuma, himani a to kala a nga chavi? Loku Hosi Jehova a wulawula, himani a to kala a nga profeti?

A kulamulwa ka Samaria.

⁹ Banani nyiwo lomu ziluvelweni za le Axdode, ni lomu ziluvelweni za tiko ga Gipite, muku: Tsombanani le xitsungeni za Samaria, mu ta wona a pfilupfilu ya hombe yi nga kona lomo, ni hlokiseielo yi nga xikari ka gona.

¹⁰ A ku maha kululama a va zi tivi, ku wula Jehova, va hlengeletela ziluvelweni zabye a zilo lezi va zi phangileko hi kanu ni mubango.

¹¹ Hikwalaho Hosi Jehova i ngalo: Ku tata valala va ta ranzela tiko, va ta khungumula a khokhola ga wena, va phanga a ziluvelo za wena.

¹² Jehova i ngalo: Khwatsi hilezi a murisi a wutlako nonwini wa nghala a milenge mimbiri ntsena, kutani a xipanze xa ndleve, hizalezo va ta nga ponisiswa zona a vanana va ka Israeli lava va nga le Samaria, va tshamileko magunweni ya zitulu ni hehla ka mibhedi yi vekelweko mafofa ya seda.

¹³ Zwanani, mu kustumunya mu vukela a yindlu ya ka Jakobe, ku wula Hosi Jehova, a Nungungulu wa tiyimpi.

¹⁴ Hakuva a siku legi nzi ta nga tsayisa Israeli hi kota ya zihambunyeto zakwe, nzi ta tsayisa kambe ni maalati ya le Beteli, kasi a timhonzo ta maalati ti tsenwa tiwa lahasi. 1 Tih. 12:33; 2 Tih. 23:15

¹⁵ Nzi ta khungumula a yindlu ya wuxika ni yindlu ya ximumu, a tiyindlu leti ti bombisilweko hi timhonzo ta tindlovu ti ta fuva, ku ta fuviswa tiyindlu tinyingi, ku wula Jehova. 1 Tih. 22:39; Jer. 36:22