Amosi 1 - Tshwa Bible

A zihambunyeto za valala va Israeli.

¹ A timhaka ta Amosi, a munwe wa varisi va le Tekoa, leti a ti wonileko xungetano na Israeli masikwini ya Uzzia hosi ya ka Juda, ni masikwini ya Jerobpamu a nʼwana wa Joaxi a hosi ya ka Israeli, hi mahlweni ka xitsekatseka xa misava lexi xi humeleko anzhako ka malembe mambiri.

² Aku: Jehova i ta dzuma hi le Zioni, a zwata a gezu gakwe hi le Jerusalema; a wuriselo ga varisi gi ta rila, ni xixungwe xa Karmeli xi ta wuna. Jer. 25:30; Hos. 11:10; Joeli 3:18

³ Jehova i ngalo: Hi kota ya zionho zinharu za Damasku, kutani mune wa zona, nzi nga ta susa a xitsayiso, hakuva va hulile Gileade hi zihulo za tisimbi.

⁴ Nzi ta rumela a nzilo lomu ndlwini ya Hazaeli, Wu ta hisa a ziluvelo za Ben-hadade. 2 Tih. 13:3; Jer. 49:27

⁵ Nzi ta tshova a zikwinyaro za Damasku, nzi lovisa a vaaki va lomu livaleni la le Aveni, ni loyi a khomako a nhonga ya wuhosi le Bet-edeni. Zonake a vanhu va le Siria va ta yiswa wukhumbini le Kira, ku wula Jehova.

⁶ Jehova i ngalo: Hi kota ya zionho zinharu za Gaza, kutani mune wa zona, nzi nga ta susa a xitsayiso; hakuva va tekile tihloko to tala, va ya ti yisa le Edome. 2 Kro. 21:18; Jer. 47:5

⁷ Kanilezi nzi ta rumela a nzilo khurisini ga Gaza, wu hisa a ziluvelo za kona.

⁸ Nzi ta lovisa a vaaki va le Axdode, ni loyi a khomileko a nhonga ya wuhosi le Axkeloni. Nzi ta nawuluta a canja ga mina ka Ekroni ni misalela ya maFilistia yi ta lova, ku wula Hosi Jehova.

⁹ Jehova i ngalo: Hi kota ya zionho zinharu za Tire, kutani mune wa zona, nzi nga ta susa a xitsayiso, hakuva va nyikele vontlhe a vanhu ka Edome, va nga alakanyi a xivumelwano xa wumakabye.

¹⁰ Kanilezi nzi ta rumela a nzilo khurinisi ga Tire, wu ta hisa a ziluvelo za kona. Jer. 47:4; Ezek. 26:3

¹¹ Jehova i ngalo: Hi kota ya zionho zinharu za Edome, kutani mune wa zona, nzi nga ta susa a xitsayiso, hakuva i hlongolisile a nakulobye hi supado, a nga mu zweli wuxinji, a simamisa ku zangara, a tshama ni khulo hi masiku. Gen. 27:40; Mitse. 20:20; Isa. 34:5

¹² Kanilezi nzi ta rumela a nzilo le Temani, wu ta hisa a ziluvelo za Bozra.

¹³ Jehova i ngalo: Hi kota ya zionho ginharu za vana va ka Amoni, kutani mune wa zona, nzi nga ta susa a xitsayiso; hakuva va hanzulela a vavasati va le Gileade lava va nga ni tinyimba, kasi ku kulisa a tiko gabye.

¹⁴ Kanilezi nzi ta dzivela a nzilo khurisini ga Rabba, wu hisa a ziluvelo za kona, na ku biwa tihuwa sikwini ga kulwa, ni mheho a sikwini ga bhubhutsa.

¹⁵ Zonake a hosi yabye yi taya wukhumbini, yona ni tinduna ta yona, ku wula Jehova.