2 Samueli 3 - Tshwa Bible

¹ Makunu ku wa hi kona a yimpi a xikhati xo leha xikari ka yindlu ya Saule ni yindlu ya Davida, kanilezi Davida i lo simama a anza hi ntamu, kasike a yindlu ya Saule yi lo simama yi tlhelela nzhako.

² Davida i lo pswalelwa vafana le Hebroni: a matewula yakwe hi Amnoni wo pswalwa hi Ahinoame a muJezreeli.

³ A wa wumbiri hi Kileabe wo pswalwa hi Abigaili a sati wa Nabali a muKarmeli; a wa wunharu hi Absalome a nisanyana wa Maaka nʼwana Talmai, a hosi ya le Gexura.

⁴ A wa wumune hi Adonija nʼwana Haggite; a wa wuntlhanu hi Xefatia nʼwana wa Abitali;

⁵ a wuntlhanu ni munwe hi Itreama nʼwana Egla a sati wa Davida. Lava hi vona va pswalelweko Davida le Hebroni.

⁶ Loku a yimpi yilwa xikari ka yindlu ya Saule ni yindlu ya Davida, Abneri i wa yimela a yindlu ya Saule.

⁷ Makunu ku wa hi kona a mundlukulu wa Saule, a vito gakwe hi Rizpa nʼwana Aia. Ixboxete aku ka Abneri: Hi kuyini u enghena ka mundlukulu wa dadani?

⁸ Zonake Abneri i lo zangara nguvu hi kota ya timhaka leto ta Ixboxete, aku: Nzi hloko ya mbyana ya ka Juda ke? Inyamutlha mina nzi kombisile wunene ka yindlu ya raru wa wena Saule, ni vanakulobye, ni ka maxaka yakwe, kambe a nzi ku nyikelangi mandleni ya Davida; inyamutlha u nzi nyika nanzu hi kota ya loyi wasati!

⁹ Nungungulu a tsayise Abneri loku nzi nga maheli Davida kota lezi Jehova a hlambanyileko kakwe.

¹⁰ Nzi ta susa mufumo lowu lomu ndlwini ya Saule, nzi tiyisa a xitshamu xa wukosi xa Davida hehla ka Israeli ni hehla ka Juda, kusukela le Dani kala le Berexeba. Vala. 20:1; 1 Sam. 3:20

¹¹ Ixboxete a nga hlamulangi hambu ni mhaka yinwe ka Abneri, hakuva i wa mu chava.

¹² Zonake Abneri i lo rumela mitsumi ka Davida, aku: A tiko ga mani ke? A engeta aku: Maha xivumelwano na mina, kasi a canja ga mina gi fela kuva zinwe na wena a ku hunzulusa va ka Israeli va wuya ka wena.

¹³ Davida i lo hlamula, aku: Hi zona, nzi ta maha xivumelwano na wena. Kanilezi nzi kombela a xilo xinwe basi ka wena; nzi ngalo: U nga ta wona a nghohe ya mina, loku u nga tangi hi ku neha Mikali wa Saule, a siku lego u tako ku ta nzi wona.

¹⁴ Davida i lo rumela mitsumi ka Ixboxete nʼwana Saule, aku kakwe: Nzi nyike sati wa mina Mikali loyi nzi nga mu lowota hi 100 wa wukhuna ga vaFilistia.

¹⁵ Zonake Ixboxete i lo ruma vanhu va ya mu teka ka nuna wakwe Paltieli nʼwana Laixa.

¹⁶ A nuna wakwe i lo sukawo a mu lanzela na a rila, kala le Bahurima. Laho Abneri i te ngalo kakwe: Tlhela u famba! Zonake i lo tlhela a famba.

¹⁷ Abneri i lo wulawula ni masingalakati ya ka Israeli, aku: A masiku ma hunzileko mu wa lava Davida lezaku a maha hosi ya nwina.

¹⁸ Mu maheni makunu, hakuva Jehova i wulawulile ha Davida, aku: Hi canja ga nanza ga mina Davida nzi ta ponisa a vanhu va mina va ka Israeli mandleni ya vaFilistia ni mandleni ya vontlhe valala vakwe.

¹⁹ Abneri i lo wulawula lomu tindleveni ta va ka Benjamini, zonake i lo ya wulawula tindleveni ta Davida le Hebroni tontlhe timhaka leti ta kusasa mahlweni ka Israeli ni mahlweni ka yontlhe yindlu ya ka Benjamini.

²⁰ Zinghaho Abneri i lota ka Davida le Hebroni na hi ni 20 wa vavanuna. Davida i lo maha mubuzo, a mahela Abneri ni vanhu lava a nga hi navo.

²¹ Zonake Abneri i te ngalo ka Davida: Nzi ta famba nzi ya tsombanyisa vontlhe va ka Israeli ka hosi ya mina, kasi va fela ku maha xivumelwano na wena, kasi wena wa fela ku fumela kontlhe lomu u ku xuvako. Davida i lo salisana na Abneri, a mu fambisa hi kurula.

²² Languta a malanza ya Davida na Joabe va wa wuya hi le yimpini, na va neha muphango wa hombe. Kanilezi i wa nga hi na Davida le Hebroni, hakuva i wa salisene naye, a mu fambisa hi kurula.

²³ Laha Joabe a nga chikela hi mabutho wontihe lawa a nga hi nawo, va lo byela Joabe vaku: Abneri nʼwana Neri i wa tile le hosini. I lo onekana naye khwatsi, a famba hi kurula.

²⁴ Zonake Joabe i lota le hosini, a taku: Zini u mahileko? Languta Abneri i wa tile ka wena, hi kuyini u nga mu tsika a famba hi kurula?

²⁵ Wena wa mu tiva Abneri nʼwana Neri; i tele ku ta ku khohlisa a fela ku tiva kuhuma ka wena ni kuenghena ka wena, ni ku tiva khwatsi zontlhe lezi u mahako.

²⁶ Zonake Joabe i lo huma ka Davida, a ya ruma vanhu ku lanza Abneri. Va lo ya mu kuma le hlobyeni ya le Sira; kanilezi Davida i wa nga zi tivi lezo.

²⁷ Laha Abneri a nga wa tlhelele le Hebroni, Joabe i lo mu vitana le tlhelweni a xikari ka nyangwa, a ya wulawula naye khwatsanyana; zalezo i lo mu tlhava rumbu afa, hakuva i khulo ga nkhata wa nakulobye Asaheli.

²⁸ Anzhako ka lezo Davida i lo zizwa, aku ngalo: Mina a nzi na nanzu hi nkhata wa Abneri nʼwana Neri; mina ni mufumo wa mina hi hava nanzu mahlweni ka Jehova kala kupinzuka.

²⁹ Ngha wuva le hlokweni ya Joabe ni le ndlwini yontlhe ya raru wakwe. Ngha a nga hi kona munhu a ponako lomu ndlwini ya Joabe a kuva ni ntungu, wa ku humesa nkhata, kutani hlokonho, kutani loyi a chetengelako hi nhonga, kutani wa ku wela matlharini, hambu wa kuvumala zibaba. Levi 15:2; 1 Tih. 2:5

³⁰ Zinghaho Joabe ni nakulobye Abixai va lo daya Abneri, hi kota ya lezi a nga daya nakulobye Asaheli le Gibeoni lomu yimpini.

³¹ Davida i te ngalo ka Joabe ni ka vontlhe vanhu lava va nga wa hi zinwe naye: Hanzulani tinguwo ta nwina, mu ambala tinguwo ta xirilo mu hlaluka Abneri. Hosi Davida i lo lanzela lihlaka.

³² Va lo lahla Abneri le Hebroni. A hosi yi lo tlakusa a gezu ga yona yi rila laha nkeleni wa Abneri; ni vontlhe vanhu va lo rila.

³³ A hosi yi lo maha a lisimu la xirilo hi kota ya Abneri, yiku: Xana Abneri i fela muni, Wa ku fisa ku khwatsi u phuphulu?

³⁴ A mawoko ya wena ma wa nga bohiwangi, Ni milenge ya wena yi wa nga bohiwangi hi makhotso. Wa so fisa ku khwatsi hi munhu a wako mahlweni ka vanana va vaonhi. A vanhu vontlhe va lo mu hlaluka.

³⁵ A vanhu vontlhe va lo ta khongotela Davida lezaku aga zakuga na ka hi hlikanhi; kanilezi Davida i lo hlambanya, aku: Nungungulu a mahe hi ntatau, ni ku engeta ka mina, loku mina nziga zibaba, hambu ni xihi xilo, na gi nga se ku pela gambo!

³⁶ A vanhu vontlhe va lo xiyisisa a mhaka leyo, zonake xi lova xilo xo saseka mahlweni ka vona, ni ka zontlhe lezi zi nga wa mahiwa hi hosi, zi wa xalalisa mahlweni ka vanhu vontlhe.

³⁷ Zonake a vanhu vontlhe, ni vontlhe va ka Israeli, va lo zi tiva lezaku Abneri nʼwana Neri a nga dawangi hi kuruma ka hosi.

³⁸ A hosi yi te ngalo ka malanza ya yona: A mu zi tivi nwina lezaku a hosi leyi yi nga nhenha ya hombe, yi wile inyamutlha lomu ka Israeli.

³⁹ Mina nzi mbhelile ntamu nyamutlha, hambu loku nzi wumbelwe kuva hosi leyi yi nga nhenha ya hombe, yi va Zeruia, va nzi hunza a ntamu. Jehova ngha a chachazela mumahi wa kubiha kukotisa kubiha kakwe.