1 Timote 6 - Tshwa Bible

¹ Vontlhe lava va nga tikhumbi lahasi ka gota a va dzunze a venyi vabye, kasi a vito ga Nungungulu ni gonzo yakwe zi nga soliwi. Isa. 52:5; Tit. 2:9

² Lava va nga ni venyi va kholwako, ngha va nga va kanyisi, hilezi va nga vamakabye; kanilezi ngha va va tirela nguvunguvu, kota lezi va nga makholwa ni varanzekako, vona lava va vuniwako hi vona. Gonzisa timhaka leti, u luleka ha tona. Kol. 4:1

Gonzo ya mawunwa.

³ Loku ku hi ni munhu a gonzisako a gonzo yinwani, a nga namareli timhakeni ti nene, tona timhaka ta Hosi ya hina Jesu Kristu, ni gonzo leyi yi lulamileko,

⁴ yena i kukumukile na a nga tivi nchumu, i na ni wubabyi ga ku wutisa ziwutiso ni ku kanetisana hi timhaka, laha ku humako kona a makangwa, ni kuholova, ni tihlamba, ni kualakanyela kubiha, 1 Kor. 8:2

⁵ ni kukanetisana ka vanhu lava va bihisilweko kupimeni kabye, lava va lahlekelweko hi zinene, na va alakanya lezaku a xikholwa i ndlela ya bhinzu. Rom. 16:17; 2 Tim. 3:8; Tit. 1:11

⁶ Kunene a kukhozela Nungungulu hi kutsaka i bhinzu ga hombe. Mav. 15:16

⁷ A hi tangi na nchumu laha misaveni, zi te dlunya lezaku a hi zi koti ku teka nchumu loku hi suka ka yona. Joba 1:21; Mutsa. 5:15

⁸ Loku hi hi ni zakuga ni kuambala, ngha hi eneliswa ha zona. Gen. 28:20; Maheb. 13:5

⁹ Kanilezi lava va ranzako a ku ngha va fuma, va wela kuringweni ni maphanyeni, ni kumbilukeleni kunyingi ka wupumbu ku bayisako, lezi zi nyupetako vanhu kulobyisweni ni kulahlekeni. Mat. 13:22

¹⁰ Hakuva a ku ranza mali hi mutsu wa tixaka tontlhe ta kubiha; a vanwani hi ku yi navela va pengile kukholweni, va ti phoroketile hi kuxaniseka kunyingi. Ekso. 23:8

A kulwa ko saseka ka kukholwa.

¹¹ Kanilezi wena munhu wa Nungungulu, potsoloka lezi zilo, u hlota kululama, a kukhozela Nungungulu, a kukholwa, a liranzo, a kutimisela, ni kurula. Deut. 33:1

¹² Lwana a kulwa ko saseka ka kukholwa, u khomisisa a wutomi ga pinzukelwa, legi u vitanelweko gona, laha u nga vumela a kuvumela ko saseka mahlweni ka vakustumunyu vanyingi. Fil. 3:12; 2 Tim. 4:7; Maheb. 13:23

¹³ Mina nza ku laya mahlweni ka Nungungulu, loyi a nyikako kuhanya ka zontlhe, ni mahlweni ka Kristu Jesu, loyi a nga kustumunya mahlweni ka Pontiu Pilatu hi kuvumela kunene, Joh. 5:21; Kuv. 1:5

¹⁴ lezaku u gonga a kulaya loku, na u nga hi na bala ni kusoleka, yi kala yi wonekeliswa a Hosi ya hina Jesu Kristu, 1 Tes. 3:13

¹⁵ loku ku ta nga maheka hi xikhati xa yena, loyi a nga yece a Hosi ya ntamu yi bongekako, a Hosi ya tihosi, ni Mufumeli wa vafumeli; Xip. 1:11; Kuv. 17:14

¹⁶ a nga yena yece loyi a nga hiko na kufa, loyi a tshamileko kuwonekeleni loku ku nga hiko na kutshinelelwa; loyi a nga woniwangiko hi munhu, hambu ku zi kota ku mu wona; a ka yena a kuve kudzunziwa ni ntamu wa pinzukelwa. Amen! Ekso. 33:20; Deut. 4:12; Joh. 6:46; Fil. 4:20

¹⁷ Laya vona lava va fumileko laha misaveni, lezaku va nga ti kukumukisi, va nga tsumbi kufumeni ku nga tiyangiko, kanilezi va tsumba Nungungulu, loyi a hi nyikako zilo zontlhe hi matsenya lezaku hi tsaka ha zona.

¹⁸ Va laye lezaku va maha zo saseka, va fuma hi mitiro yi nene, va ranza ku avela vanwani a zilo zabye, va hana;

¹⁹ lezaku va ti veketela a tshomba leyi yi ta ngava a xiseketelo xi nene a xikhatini xa ha tako, lezaku va fela ku kuma wutomi legi gi nga wutomi hizinene.

²⁰ O Timote, gonga lezi zi vekilweko ka wena, u ala a kubyabyatsa ka hava ni kukanetana loku ku vitanwako aku wutlhari na gi nga hi gona;

²¹ Vanwani hi ku gi vumela va tsanzekile kukholweni. A tipswalo a tive na wena!