1 Samueli 9 - Tshwa Bible

Saule a hlawuliwa ku maha hosi.

¹ Ku wa hi kona wanuna wo fuma wa ka Benjamini, a vito a nga hi Kixi, a nʼwana Abieli wa Zerora, wa Bekorate, wa Afia, a muBenjamini.

² I wa hi ni mufana, a vito a nga hi Saule, a nga hi jaha ga lirotlola lo hunza vontlhe va ka Israeli, a va hunza kambe ni kuleha; vontlhe va wa gumesela makatleni yakwe.

³ A mapswele ya timbongola ta raru wakwe Kixi ma wa lahlekile. Zonake Kixi aku ka nʼwana wakwe: Teka munwe wa malanza mu ya lava timbongola.

⁴ I suka a hunza zitsunga za ka Efraime, a tsemakanya a tiko ga ka Xalixa, kanilezi a va ti kumangi. Va lo hunza hi lomu tikweni ka ka Xaalima, kanilezi lomo kambe ti wa hi hava; va lo engeta va lava lomu tikweni ga ka Benjamini, va nga ti kumi.

⁵ Laha va nga wa hi le tikweni ga le Zufa, Saule i te ngalo ka nanza gakwe legi a nga wa famba nago: A hi tlhele hiya kaya, dadani a nga vilela hina wutshanwini ga timbongola.

⁶ Kanilezi a nanza gi te ngalo kakwe: Ku na ni munhu wa Nungungulu laha ka muti lowu, a munhu wo dzunzeka; zontlhe lezi a zi wulako za maheka. A hiye kakwe kutani i ta hi byela za pfhumba ga hina, lezaku i ndlela muni hi faneleko ku famba ha yona.

⁷ Saule i te ngalo ka nanza gakwe: Hi zona; kanilezi loku hiya ka munhu wa kona, hi ta famba na yini ke? Hakuva a hi na zibaba lomu mikwameni ya hina, ni kambe a hi na munyikelo wa ku ya nyikela ka munhu loye wa Nungungulu. Xini hi nga naxo? 1 Tih. 14:3; 2 Tih. 4:42

⁸ A nanza gi lo mu hlamula, giku: Nzi na ni xipanze xa wumune xa xekeli ga siliva; nzi ta ya nyika a munhu wa Nungungulu, kasi a hi tivisa za ndlela ya hina.

⁹ (A kale ka va ka Israeli, loku va ya wutisa ka Nungungulu, va waku: Ngone hi famba ka Muvumbi; hakuva loyi inyamutlha hi nge ngalo Muprofeti, a kale va waku, Muvumbi.) Mitse. 12:6

¹⁰ Zonake Saule aku ka nanza gakwe: U wula zona; a hi fambe. Va loya ka muti lowu ku nga wa hi ni munhu wa Nungungulu.

¹¹ Na va ha kanziha a kuya mutini, va lo kumana ni vanhwana na vaya goveni, vaku kabye: I kona Muvumbi ke?

¹² Va lo hlamula, vaku: I kona, hi gaya. Hatlisani zalezi, hakuva i tile nyamutlha laha mutini, a vanhu va mahako muphahlo le wutshanwini gi tlakukileko.

¹³ Loku mu hatla ku chikela laha mutini, mu ta ya mu kuma na a nga se ku kanziha wutshanwini hi tlakukileko ku yaga, hakuva a vanhu a va na kuga na a nga se ku chikela yena, hi lezi hi yena a katekisako miphahlelo; anzhako ka lezo lava va rambilweko vaga. Hikwalaho kanzihani lokuloku, kasi mu fela ku mu kuma.

¹⁴ Va lo kanziha kuya mutini. Laha va nga wa enghena mutini, Samueli i lo tlhangana navo, na a huma lahandle, kasi ku kanziha wutshanwini gi tlakukileko.

¹⁵ Kasike hi tolo wa kona, na Saule a nga se ku chikela, Jehova i wa tivisile Samueli, aku:

¹⁶ Manziko hi xwalexi xikhati nzi ta ku rumela a munhu wa le tikweni ga ka Benjamini u ta mu tota kasi a fela ku maha murangeli wa vanhu va mina va ka Israeli; i ta tlhatlhisa a vanhu va mina mandleni ya vaFilistia. Hakuva nzi zwile kurila ka vanhu va mina. Ekso. 3:9

¹⁷ Hikwalaho a xikhati lexi Samueli a nga wona Saule, Jehova i te ngalo: A munhu loyi nzi nga ku byela ha yena, hi yaloyi; hi yena a ta nga fumela a vanhu va mina.

¹⁸ Zonake Saule i loya laha kusuhani ka Samueli laha nyangweni, a yaku: Hi nga nzi komba a yindlu ya Muvumbi!

¹⁹ Samueli i lo hlamula, aku: Hi mina Muvumbi; ranga mahlweni hi kanziha hiya wutshanwini gi tlakukileko, mu ta yaga na mina nyamutlha. Zonake manziko nzi ta mu tlhatlha mu famba, na nzi ku byelile zontlhe lezi zi nga lomu mbilwini ya wena.

²⁰ Kasike loku ti hi timbongola leto ti lahlekileko masiku manharu hi legi ga nyamutlha, u nga karateki ha tona, hakuva ti kumilwe. Ni kambe zontlhe lezi zi xubyiwako hi va ka Israeli za mani ke? A hi za wena ni yindlu ya raru wa wena ke?

²¹ Saule i lo hlamula, aku: Kasi a nzi wa ka Benjamini, loyi a nga nzisana ka tixaka ta ka Israeli ke? A ngango wa dadani a hi wona wu nga xisiva marumbu xa mingango yontlhe ya lixaka la ka Benjamini ke? Makunu hikuyini u wulako timhaka leto ka mina?

²² Zonake Samueli i lo rurela Saule ni nanza gakwe lomu ndlwini, a va tshamisa zitshanwini za hombe xikari ka lava va rambilweko, va nga hi Xipimo xa 30 wa vanhu.

²³ Samueli aku ka mubhiki: Phamela xipanze lexi nzi nga wa ku byelile a kuva u xi veka tlhelweni.

²⁴ Zonake a mubhiki i lo ya teka a nenge ni lezi zi nga hi ka wona, a zi veka mahlweni ka Saule. Samueli aku: Lezi hi lezi zi vekelweko wena; zi veke mahlweni ka wena, uga, hakuva zi hlayiselwe wena kala xikhati lexi, kota nzi rambileko vanhu. Zinghaho Saule i loga na Samueli lego siku.

²⁵ Laha va nga wa relele hi le wutshanwini gi tlakukileko vaya mutini, Samueli i lo wulawula na Saule na va hi le hehla ka yindlu.

²⁶ Va lo vuka ni mixo. Kutsuwukeni ka gambo, Samueli i lo vitana Saule le hehla ka yindlu, aku: Vuka, kasi nza fela ku ku heleketa! Saule i lo vuka, va huma vontlhe na Samueli. Deut. 22:8

²⁷ Laha va nga wa relela kuya magumo ka muti, Samueli i te ngalo ka Saule: Byela a nanza ga wena gi ranga mahlweni (a nanza gi lo ranga), kanilezi wena yima laha, kasi nza ku byela a mhaka ya Nungungulu.