1 Samueli 4 - Tshwa Bible

Israeli alwa ni vaFilistia.

¹ Makunu a va ka Israeli va lo huma ku yalwa ni vaFilistia, va ya gova hi le Ebenezeri. A vaFilistia va lo gova hi le Afeka.

² A vaFilistia va lo ti longisela kulwa ni va ka Israeli. Laha va nga tlhangana, a va ka Israeli va lo hluliwa hi vaFilistia, ku dawa kusuhani ka 4,000 wa vanhu.

³ Laha vanhu va nga wa tlhelele wugovelweni, a masingalakati ya ka Israeli ma te ngalo: Hi kuyini Jehova a hi tsikileko nyamutlha hi hluliwa hi vaFilistia? A hi yeni le Xilo hi ya teka a arke ga xivumelwano xa Jehova hi ta gi veka xikari ka hina, kasi ga hi hlanguta mandleni ya valala va hina.

⁴ Zinghaho va lo rumela vanhu le Xilo va ya teka a arke ga xivumelwano xa Jehova wa tiyimpi, loyi a tshamako xikari ka makerubima. A vana va Eli va vambiri, Hofeni na Fineasi, va lo lanza a arke ga xivumelwano xa Nungungulu. Ekso. 25:17

⁵ Laha a arke ga xivumelwano xa Jehova gi nga wa chikele lomu wugovelweni, a vontlhe vaIsraeli va lo hlalela hi guwa ga hombe ga kutsaka laha kaku ni misava yi tsekatseka.

⁶ Laha a vaFilistia va ngazwa a guwa ga kuhlalela, va te ngalo: I guwa ga yini lego gi zwalako le wugovelweni ga vaHeberu? Va lo byeliwa lezaku i arke ga Jehova gi nga chikela lomu wugovelweni gabye.

⁷ Zonake a vaFilistia va lo chava, hakuva va waku: Nungungulu i tile lomu wugovelweni gabye. Niku ngalo: Khombo ka hina! Hakuva a ku na nga maheka zo kota lezi ka masiku ma hunzileko.

⁸ Khombo ka hina! Himani a ta nga hi hlanguta canjeni ga Nungungulu loye wa ntamu? Hi yena Nungungulu loye a nga hlasela vaGipite hi makhombo ya tixakaxaka le xiwuleni.

⁹ Tiyani vaFilistia, muva vavanuna, kasi mu nga fumelwi hi vaHeberu khwatsi hi lezi nwinawu mu va fumelako. Hikwalaho tiyani muiwa.

¹⁰ A vaFilistia va lolwa ni va ka Israeli; a va ka Israeli va lo hluliwa, va panzanyeka, loyi ni loyi a tsutsumela tendeni gakwe. Ku wa hi kuhlaselwa ka ntamu, hakuva ku lo dawa 30,000 wa vavanuna va hlomileko va ka Israeli.

¹¹ A arke ga Nungungulu gi lo tekiwa, ku dawa ni vafana va Eli va vambiri, Hofeni na Fineasi.

¹² Ku lo tsutsuma a munhu wa ka Benjamini na sukela laha yimpini, a ya le Xilo gwalego siku, a tinguwo takwe na ti hanzulelwe, na hi ni misava hlokweni yakwe. Jox. 7:6; 2 Sam. 1:2

¹³ Na a ha chikela, i lo wona Eli na tshamile xitshanwini xakwe a cuwuka ndleleni, hakuva a mbilu yakwe yi wa karateka hi kota ya arke ga Nungungulu. Loku munhu loye a chikele mutini, i lo va byela timhaka leto; a muti wontihe wu lo rila.

¹⁴ Laha Eli a ngazwa a mikosini te ngalo: A guwa lego ga pfilupfilu, xini xi nga maheka? Ku lo hatlisa munhu a ya byela Eli a timhaka tontlhe.

¹⁵ Eli i wa hi ni 98 wa malembe, ni mahlo yakwe ma wa file, a nga ha woni.

¹⁶ A munhu loye aku ka Eli: Hi mina loyi nzi tako hi le yimpini; nzi tsutsumile nyamutlha lezi hi kwale yimpini. Eli aku: Mahungu muni u nga nawo, nwananga?

¹⁷ A ntsumi wu hlamula, Wuku: Israeli i panzanyekile mahlweni ka vaFilistia; ku file vanhu vanyingi, ku patsa ni vana va wena va vambiri, Hofeni na Fineasi. Ni arke ga Nungungulu gi tekilwe.

¹⁸ Laha a nga kumbuka a arke ga Nungungulu, Eli a su gangatsala ha xinzhakwani, na awa hi laha ka xitshamu xakwe kusuhani ni nyangwa; i lo tshoveka nhamu yakwe afa, hakuva i wa khosahele, na hi wo tika. I lo lamula Israeli 40 wa malembe.

¹⁹ A katamwane wakwe, a sati wa Fineasi, i wa sikile, na hi kusuhani ni ku hefemula. Makunu laha a ngazwa mahungu yaku a arke ga Nungungulu gi tekilwe, ni lezaku a nwingi wakwe ni nuna wakwe va file, i lo korama lahasi a hefemula, hakuva zalezo i lo sangula hi kulunwa.

²⁰ Laha a nga hi kusuhani ni kufa, a vavasati lava va nga wa hi laho va te ngalo kakwe: U nga chavi, hakuva u pswele mufana. Kanilezi yena a nga hlamulangi nchumu, ge hambu ku zi khatalela. Gen. 35:17

²¹ I lo chula nwanana a vito ga Ikabode, hakuva i te ngalo: A wudumo gi sukile ka Israeli, hi lezi a arke ga Nungungulu gi tekilwe, ni nwingi wakwe ni nuna wakwe.

²² I te ngalo: A wudumo ga Israeli gi sukile, hakuva a arke ga Nungungulu gi tekilwe.