1 Samueli 3 - Tshwa Bible

Jehova a vitana Samueli.

¹ Mufana Samueli i lo khozela Jehova mahlweni ka Eli. Kanilezi a mhaka ya Jehova yi wa kala masikwini lawo, ni ziwoniso zi wa nga tali.

² Makunu hi ginwani siku, laha Eli a nga wa etlele lomu ndlwini yakwe, a mahlo yakwe ma wa hi xilutsu, hikwalaho i wa nga woni,

³ a kandiya ya Nungungulu na yi nga se ku timeka, Samueli na yenawu i wa etlele lomu ndlwini ya Jehova, laha ku nga wa hi ni arke ga Nungungulu. Ekso. 27:20; Levi 24:2

⁴ Jehova i lo vitana Samueli. Yena i lo hlamula, aku: Nzi laha!

⁵ I lo tsutsuma aya ka Eli, a yaku: Nzi tile, kota u nzi vitanileko. Eli aku kakwe: A nzi ku vitanangi; famba u ya etlela. I loya a ya etlela.

⁶ Jehova i lo engeta kambe a vitana Samueli. Samueli! lo vuka aya ka Eli, a yaku: Nzi tile, kota u nzi vitanako. Eli aku kakwe: A nzi ku vitanangi, nwananga; famba u ya etlela.

⁷ Makunu Samueli i wa nga se ku mu tiva Jehova, ni kambe i wa nga se ku vululelwa a mhaka ya Jehova.

⁸ Jehova i lo vitana kambe khati ga wunharu. Samueli i lo vuka aya ka Eli, a yaku: Nzi tile, kota u nzi vitanako. Eli i lo zi pima lezaku hi Jehova a vitanako a mufana.

⁹ Hikwalaho Eli i te ngalo ka Samueli: Famba u ya etlela. Loku u engeta kambe u vitanwa, u taku: Wulawula Jehova, hakuva a nanza ga wena ga ingisa. Zinghaho Samueli i lo tlhela a ya etlela wutshanwini gakwe.

¹⁰ Jehova i lo ta yima, a vitana kambe kota zinwani zikhati, aku: Samueli, Samueli! Zonake Samueli, aku: Wulawula, hakuva a nanza ga wena ga ingisa.

¹¹ Jehova i te ngalo ka Samueli: Nzi ta maha a xilo ka Israeli lexi xi ta nga cwangula tindleveni ta ni wihi a xi zwako. 2 Tih. 21:12; Jer. 19:3

¹² A siku lego nzi ta maha ka Eli zontlhe lezi nzi wulileko xungetano hi yindlu yakwe; nzi ta sangula, kala nzi mbheta.

¹³ Hakuva nzi mu byelile lezaku nzi ta lamula a yindlu yakwe kala kupinzuka, hi kota ya zionho lezi yena a zi tivako. Hakuva o vana vakwe va ti lavele a nzhukano; kanilezi yena a nga va layangi.

¹⁴ Hikwalaho nzi hlambanyele a yindlu ya ka Eli, lezaku a kuonha ka yindlu yakwe ku nga ta tsetselelwa hi kota ya miphahlelo ge hambu hi minyikelo kala kupinzuka. Levi 4:3

¹⁵ Samueli i lo etlela kala laha mixweni; zonake i lo vulula a tivati ta yindlu ya ka Jehova. Samueli i wa chava ku ya hlawutela Eli a muwoniso lowo.

¹⁶ Kanilezi Eli i lo vitana Samueli, aku kakwe: Samueli, nwananga! Yena aku: Nzi laha!

¹⁷ Eli aku: Xini a nga ku byela? U nga fihli nchumu ka mina. Nungungulu a mahe lezo ka wena ni ku engeta, loku u nzi fihlela a yinwe ya timhaka leti a ku byelileko!

¹⁸ Zonake Samueli i lo hlawutela zontlhe, a nga mu fihlelangi ni xilo xinwe. Zonake Eli i te ngalo: Hi Jehova; a mahe lezi zi sasekileko kuwoneni kakwe.

¹⁹ Samueli i lo kula, Jehova na hi zinwe naye, a nga tsiki hambu ni yinwe ya timhaka ta Jehova yi wa lahasi.

²⁰ Vontlhe va ka Israeli, kusukela le Dani kala le Bere-Xeba, va lo zi tiva lezaku Samueli i yimisilwe ku maha muprofeti wa Jehova.

²¹ Jehova i lo engeta kambe a ti wonekelisa le Xilo, hakuva i wa na nga ti wonekelisa ka Samueli le Xilo hi gezu gakwe. Zonake a mhaka ya Samueli yi lo hangalaswa ka vontlhe va ka Israeli.