1 Samueli 21 - Tshwa Bible

Davida, a tsutsuma Saule.

¹ Zonake Davida i loya le Nobe ka mupristi Ahimeleki. Ahimeleki i lo khinga Davida na rurumela, aku kakwe: Hi kuyini u nga wece, u nga hiko na munhu ke?

² Davida i lo hlamula aku ba mupristi Ahimeleki: A hosi yi nzi leletele mhaka, yiku: Ngha ku nga hi kona munhu a tivako a mhaka leyi nzi ku rumako yona, ni lezi nzi ku leleteleko zona. Kasike a majaha ya mina nzi ma rumile wutshanwini go kari.

³ Makunu zini u nga nazo lomu canjeni ga wena ke? Nzi nyike a ntlhanu wa zibaba, hambu ni xihi u nga naxo.

⁴ A mupristi i lo hlamula, aku ka Davida: A nzi na zibaba zi ringanako vanhu, kanilezi ku na ni zibaba za kubasantsena loku a majaha vawena ma ti hambanyisile ni vavasati. Ekso. 19:15; Levi 24:5

⁵ Davida i lo hlamula, aku ka mupristi: Hi na ni masiku manharu na hi hambene ni vavasati; ni zibya za majaha ya mina zi basile; hambu loku a ndlela yi nga basangi, yi ta basiswa nyamutlha hi zibya.

⁶ Zonake a mupristi i lo mu nyika a zibaba za kubasa, hakuva ku wa nga hi kona zinwani zibaba ahandle ka zibaba za xikombiso lezi va zi susileko mahlweni ka Jehova, kasi ku vekiwa a zibaba za ku kufumela ka siku lego va susako lezi za kale. Mat. 12:3; Lu. 6:3

⁷ Kanilezi a ginwani nanza ga Saule gi wa hi kona lego siku, na a khamekile mahlweni ka Jehova. A vito gakwe hi Doegi a muEdomi; i wa hi nduna ya varisi va Saule.

⁸ Davida i te ngalo ka Ahimeleki: Xana a ku na tlhari hambu supado ke? Hakuva a nzi tekangi a supado ya mina hambu matlhari ya mina, hakuva a mhaka ya hosi yi wa nzi hatlisisa.

⁹ A mupristi! te ngalo: Laha ku na ni supado ya Goliate a muFilistia loyi u nga mu daya le minzhelelweni ya mikanyi; hi yona yi tsonzelweko lomu ka nguwo hi le nzhako ka efode. Loku u zi ranza ku yi teka, yi teke, hakuva laha ku hava yinwani. Davida i te ngalo: A ku na yinwani yo kota yona, nzi nyike yona.

¹⁰ Zonake Davida i lo suka a tsutsuma lego siku mahlweni ka Saule, aya le ke Akixi, a hosi ya le Gati.

¹¹ A malanza ya Akixi ma te ngalo kakwe: Loyi a hi yena Davida a hosi ya tiko ke? A hi yaloyi va mu yimbelelako lomu ka tisimu, vaku: Saule i dele 1,000! Kanilezi Davida! dele 10,000!

¹² Davida i lo alakanya timhaka leti lomu mbilwini yakwe, zonake i lo chava nguvu ha Akixi a hosi ya le Gati.

¹³ Zonake i lo hunzula kupima, a ti maha wo hunguka mahlweni kabye, a tsala laha tivatini ta nyangwa, a tsika mari ma xilila lomu ka xilevu xakwe.

¹⁴ Zonake Akixi i te ngalo ka malanza yakwe: Ma wona lezaku a munhu loyi wa hlanya; hi kuyini mu mu neha laha ka mina ke?

¹⁵ Nzo vumala vanhu vo hunguka, lezi nwina mu nehako munhu loyi wo hunguka a ta hlanyela mahlweni ka mina ke? A munhu wa ku tani a nga enghena ndlwini ya mina ke?