1 Samueli 2 - Tshwa Bible

¹ Hana i lo khongela, aku: A mbilu ya mina yi tsakela Jehova. A limhonzo la mina li tlakusilwe hi Jehova, A nomu wa mina wu ahlamele a valala va mina; Hakuva nza bhuma lomu kuhanyiseni ka wena.

² Ku hava a basileko khwatsi hi Jehova; Hakuva a nga kona munwani ahandle ka wena; Ge hambu kuva kona ginwani ribye go fana ni Nungungulu wa hina.

³ Mu nga ha engeti mu wulawula hi matshanza, Ni wuxezi gi nga ha humi nonwini wa nwina; Hakuva Jehova i Nungungulu loyi a tivako zontlhe. Hi yena loyi a ringanyisako zimaho za vanhu.

⁴ A mawura ya tinhenha ma tshobyilwe; Kanilezi lava va nga khunguvanyeka va ti boha hi ntamu.

⁵ Lava va nga wa xurile va tirela zibaba, Lava va nga hi ni ndlala va humule. Ina, a ngonwa yi pswele ntlhanu ni kumbiri, Kanilezi loyi a nga ni vanana vo tala wa hloka.

⁶ Jehova wa daya, wa hanyisa, Wa releta vanhu le Xeole, wa va humesa.

⁷ Jehova wa vanga wusiwana, wa fumisa; Jehova wa tsongahata, ni kambe wa tlakusa.

⁸ Wa humesa xisiwana lomu tshurini, Wa tsawula muvumali lomu maropeni, A va tshamisa zinwe ni tihosi, Ni ku va nyika a tshomba ya xitshamu xa wukosi. Hakuva a ziseketelo za misava za Jehova, I yimisile misava hehla ka zona.

⁹ Wa hlayisa a mikonzo ya lava va kubasa vakwe, Kanilezi a vakubiha va ta lova lomu munyameni; Hakuva a munhu a nga ta humelela hi ntamu wakwe.

¹⁰ A valala va Jehova va ta pswandlaswa, I ta va dzinzela na hi tilweni. Jehova i ta lamula a magumeso ya misava; I ta nyika ntamu ka hosi yakwe, A tlakusa a limhonzo la a totilweko wakwe.

¹¹ Elkana i lo tlhelela kaya kakwe le Rama. A nwanana a sala a vunetela ntirweni wa Jehova mahlweni ka mupristi Eli.

A zigoho za Eli ni nuna vakwe.

¹² A vana va Eli va wa hi vavanuna vo biha. Va wa nga mu tivi Jehova.

¹³ A tolovelo ya vapristi xikari ka vanhu, yi wa hi leyi: Loku a munhu a nyikela muphahlelo, a nanza ga mupristi gi wota ni foloko ga mizwa minharu a xikhati a nyama yi vilako; Levi 7:34; 10:14

¹⁴ zonake gi ta tlhava a nyama lomu mbiteni, kutani lomu ka galango, kutani lomu ka guwana, kutani lomu ka bhota, zontlhe lezi a foloko gi zi kotako ku humesa, a mupristi i wa teka. Va wa maha lezo ka vontlhe va ka Israeli lava va nga wata le Xilo.

¹⁵ Ina, hambu mafura ma nga se hiswa, a nanza ga mupristi gi wata ka munhu loye a nyikelako muphahlelo, gi taku: Nzi nyike nyama nzi ta ya katingela mupristi, hakuva a nga lavi u mu nyika hi leʼyo bhikiwa, saseka ya yimbisi.

¹⁶ Ku waku loku munhu a hlamula, aku: Va ha ta hisa mafura, zonake u ta teka leyi u ta nga yi lava, gona giku: Hatlisa u nzi nyika! Loku u nga nzi nyiki, nzi ta wutla.

¹⁷ A kubiha ka majaha lawo ku wa hi ka hombe nguvu mahlweni ka Jehova, hakuva va wa kanyisa munyikelo wa Jehova.

¹⁸ Kanilezi Samueli i wa khozela mahlweni ka Jehova na a ha hi nwanana, a ambala a efode ya wukene. Ekso. 28:4, 6

¹⁹ A nyine wakwe kambe i wa mu rungela a nghanjwana lembe ni lembe, a ta mu nyika xikhati lexo a tako ni nuna wakwe ku ta nyikela miphahlelo ya lembe ni lembe.

²⁰ Eli i lo katekisa Elkana ni sati wakwe, aku: Jehova a ku nyike vana hi ka loyi wasati vo valeta loyi a nga mu kombela ka Jehova; zonake va lo tlhela kaya.

²¹ Jehova i lo enzela Hana, a xura tinyimba a pswala vafana vanharu ni vanhanyana vambiri. Kanilezi mufana Samueli i lo kulela mahlweni ka Jehova.

²² Makunu Eli i wa khosahele nguvu. I lozwa zontlhe lezi a vana vakwe va nga wa zi maha ka vontlhe vaIsraeli, ni lezaku va etlela ni vavasati lava va tirako laha nyangweni ya tenda ga mutlhangano.

²³ Yena aku ka vona: Hi yini mu mahako za ku nghaho ke? Hakuva a vanhu vontlhe va wulawula hi zimaho za nwina zo biha.

²⁴ A hi zinene vana vanga; lezi nzi zi zwako a zi lulamangi, hakuva ma gohisa a vanhu va Jehova.

²⁵ Loku a munhu a gohela munhukulobye, Nungungulu i ta mu lamula. Kanilezi loku a gohela Jehova, himani a ta nga mu khongelela ke? Ahembaloko, a va ingisangi a gezu ga raru wabye, hakuva Jehova i wa xuvile ku va lovisa.

²⁶ Mufana Samueli yena i wa kula na a xalalisa Jehova ni vanhu kambe. Lu. 2:40, 52

²⁷ Zonake ku lota a munhu wa Nungungulu ka Eli, a taku: Jehova i ngalo: Xana a nzi ti wonekelisangi ka yindlu ya raru wa wena laha va nga hi le Gipite lomu ndlwini ya Faro ke?

²⁸ Nzi wuya nzi mu hlawula xikari ka tontlhe tixaka ta ka Israeli lezaku a maha mupristi wa mina ni kuva a phahlela le alatini ga mina, ni ku hisa tibani to nuhela, ni ku ambala a efode mahlweni ka mina. Xana a nzi nyikangi ka yindlu ya raru wa wena yontlhe miphahlelo leyi yi hiswako hi va ka Israeli ke?

²⁹ Hi kuyini mu kanzihelako a miphahlelo ya mina ni minyikelo ya mina, lezi nzi leleteleko a kuva zi nyikelwa lomu ndlwini ya mina ke? U dzunzile a vana va wena ku hunza mina, mu ti kulukisa hi milangelwa ya minyikelo yontlhe ya vanhu va mina va ka Israeli.

³⁰ Hikwalaho Jehova Nungungulu wa ka Israeli i ngalo: Mina nzi wulile lezaku a yindlu ya wena ni yindlu ya raru wa wena yi ta famba mahlweni ka mina kala kupinzuka. Kanilezi makunu Jehova i ngalo: Lezo a zive kule na mina! Hakuva nzi ta dzunza lava va nzi dzunzako; kanilezi lava va nzi kanyisako va ta wiswa tingana.

³¹ A masiku mata, lawa nzi ta nga tsema ha wona a woko ga wena ni woko ga yindlu ya raru wa wena, kasi ku ngavi kona a munhu wo khosahala lomu ndlwini ya wena.

³² Wena u ta wona kuxaniseka ka yindlu ya mina xikhatini lexo Israeli a ta nga nyikiwa makatekwa. Cima ku nga ha tava kona a xikhosana lomu ndlwini ya wena kala kupinzuka.

³³ A munwe wa vanhu va wena, loyi nzi to kala nzi nga mu susi alatini ga mina, i ta hisa a mahlo ya wena ni ku gisa mbhukutsa muhefemulo wa wena. Kanilezi a vanhu vontlhe va yindlu ya wena va tafa na va nga se ku khosahala.

³⁴ A xikombiso xa kona, u ta wona ni vana va wena, Hofeni na Fineasi, hi wumbiri gabye va tafa siku ginwe.

³⁵ Mina nzi ta ti yimisela a mupristi a tsumbekileko, loyi a ta nga maha zontlhe za kuranza ka mbilu ya mina ni muhefemulo wa mina; nzi ta mu akela a yindlu yi tiyileko, zonake i ta famba mahlweni ka a totilweko wa mina kala kupinzuka.

³⁶ Kanilezi lava va ta nga sala lomu ndlwini ya wena, a munwe ni munwani i ta ta korama mahlweni kakwe, kasi va fela ku kuma malanyana ni kowo wa xibaba. Va tata, va taku: Nzi nghenise ka wunwani ntiro wa wupristi, kasi nzi fela ku kuma xibabanyana nziga.