1 Samueli 12 - Tshwa Bible

¹ Samueli i te ngalo ka vontlhe va ka Israeli: Mina nzi ingisile a gezu ga nwina ka tontlhe timhaka leti mu nga nzi byela; nzi yimisile a hosi hehla ka nwina.

² Makunu a hosi leyi yi ta nga mu rangela hi leyi; kasike mina nzi khosahele, nzi na ni wuvu, kanilezi a vana va mina va kona xikari ka nwina. Mina nzi mu rangele kusukela wujaheni ga mina, kala legi siku.

³ Hi mina loyi; nzi kustumunyeleni mahlweni ka Jehova ni mahlweni ka a totilweko wakwe. I nkavi ya mani nzi tekileko? I mbongola ya mani nzi tekileko? Himani nzi mu phangileko? Himani nzi mu xanisileko? Kutani ku ngava mani nzi amukeleko hi kakwe a nchumu wo nzi rengelela ke? Nzi ta mu tlhelisela. Miti. 20:33

⁴ Vona va te ngalo: A ku gangi nchumu xa hina, a ku hi tsimbeketangi ni kambe a ku tekangi nchumu hambu ka munhu munwe.

⁵ Yena aku kabye: Jehova hi mboni ya ku mu vukela, zinwe ni a totilweko wa yena r mboni legi siku ya lezaku a mu kumangi nchumu lomu canjeni ga mina. Vona vaku ngalo: A zive tano.

⁶ Samueli i lo engeta aku ngalo ka vanhu: Hi Jehova loyi a nga yimisa Mosi na Aroni a ku humesa vararu va nwina tikweni ga le Gipite.

⁷ Makunu sukani mu yima, kasi nza fela ku wulawula na nwina mahlweni ka Jehova hi zilo zontlhe zo lulama za Jehova, lezi a mu maheleko nwina ni vararu va nwina.

⁸ Laha Jakobe a nga enghenile le Gipite, ni laha vararu va nwina va nga wa rilile ka Jehova, zonake Jehova i lo rumela Mosi na Aroni, lava va nga vona va humesileko vararu va nwina le Gipite, va va neha ka legi wutshamu. Gen. 46:6; Ekso. 2:23; Jox. 24:5

⁹ Kanilezi laha va nga rivala Jehova, Nungungulu wabye, i lo va xavisa ka Sisera, a nduna ya yimpi ya Hazora ni ka vaFilistia, ni ka hosi ya vaMoabi, lava va va hlaseleko.

¹⁰ Zonake va lo rila ka Jehova, vaku: Hi onhile, hakuva hi tsikile Jehova hi khozela maBaali ni maAxtarte. Kanilezi makunu hi tlhatlhise mandleni ya valala va hina, na hina hi ta ku khozela.

¹¹ Zonake Jehova i lo ruma Jerubaali, na Bedani, na Jefta, na Samueli, va mu ponisa mandleni ya valala va nwina lava va mu ranzeleko ka wontihe matlhelo, zonake mu tshama hi kurula,

¹² Laha mu nga wa wonile Nahaxi a hosi ya va ka Amoni, na ata ku ta mu vukela, mu te ngalo ka mina: Za hava, kanilezi a hosi yi ta hi fumela, laha Jehova Nungungulu wa nwina a nga wa hi hosi ya nwina.

¹³ Makunu a hosi leyi mu nga yi hlawula, leyi mu yi kombelileko, hi leyi; Jehova i yi yimisile hehla ka nwina.

¹⁴ Loku nwina mu chava Jehova, ni loku mu mu khozela, mu ingisa a gezu gakwe, mu nga ali zileletelo za Jehova, nwina ni hosi ya nwina leyi yi mu fumelako, mu ta maha valanzeli va Jehova Nungungulu wa nwina.

¹⁵ Kanilezi loku mu nga ingisi a gezu ga Jehova, ni loku mu ala zileletelo zakwe, zonake a canja gakwe gi ta mu vukela, khwatsi hi lezi gi nga wa vukela vararu va nwina.

¹⁶ Makunu yimani laha, mu ta wona a xihlamaliso xa hombe, lexi Jehova a ta nga xi maha mahlweni ka nwina.

¹⁷ A hi gona siku ga ku hula mavele nyamutlha ke? Mina nzi ta kanyuluka ka Jehova lezaku yena a rumela a kudzinza, ni ku nisa a vula, kasi nwina mu ta zi tiva ni ku wona a wukulu ga xionho xa nwina mahlweni ka Jehova, hi lezi mu nga kombela hosi.

¹⁸ Zonake Samueli i lo kanyuluka ka Jehova, na Jehova i lo rumela kudzinza, a nisa vula lego siku; a vanhu vontlhe va lo mu chava nguvu Jehova na Samueli.

¹⁹ Makunu vontlhe vanhu va te ngalo ka Samueli: Kombelela malanza ya wena ka Jehova Nungungulu wa wena, kasi hi ngafi, hakuva hi engetele kuonha ka hina hi lezi hi nga ti kombelela hosi.

²⁰ Samueli i te ngalo ka vanhu: Mu nga chavi. Hakunene mu mahile kubiha, ntsena lezaku mu nga tsiki ku lanzela Jehova, kanilezi khozelani Jehova hi timbilu ta nwina tontlhe.

²¹ Mu nga dzuki mu hambuka, mu lanzela a zilo zi nga nyawuliko, lezi zi nga vuniko nchumu, ni lezi zi nga ponisiko, hakuva zilo zi nga nyawuliko.

²² Hakuva Jehova a nga ta tsika a vanhu vakwe, hi kota ya vito gakwe ga hombe, hakuva Jehova zi mu xalalisile a ku mu maha a vanhu vakwe.

²³ Kasike loku ku hi mina, a zive kule na mina ku gohela Jehova, hi ku tsika ku mu khongelela, kanilezi nzi ta mu gonzisa a ndlela yi nene ni ya nongameto.

²⁴ Ntsena lezaku chavani Jehova, mu mu khozela hizinene hi timbilu ta nwina tontlhe; hakuva cuwukani mitiro ya hombe leyi a yi mahileko xikari ka nwina.

²⁵ Kanilezi loku nwina mu simamisa ku maha kubiha, nwina ni hosi ya nwina mu ta lobyiswa.