1 Pedro 5 - Tshwa Bible

A ntlhambi wa Nungungulu.

¹ Hikwalaho nza khongotela a masingalakati lawa ma nga xikari ka nwina, na nzi hi singalakati-kulobye, ni kustumunyu wa kuxaniseka ka Kristu, hi xihlengeli xa kungangamela loku ku ta nga vululwa, nziku ngalo: Lu. 24:48; Rom. 8:17; File. 9

² Risani a ntlhambi wa Nungungulu lowu mu nga nawo, mu nga wu hlayisi hi kukurumetwa kanilezi hi ku zi ranza; na ku nga hi ku tirela bhinzu, kanilezi hi matsenya; Joh. 21:15-17; 1 Kor. 9:17

³ na ku nga hi ku khwatsi mu tihosi hehla ka zipanze lezi mu avelweko zona, kanilezi mu maha zikombiso ka ntlhambi. Mat. 20:25; Fil. 3:17

⁴ Kasi laha a Murisi wa hombe a ta nga wonekeliswa, mu ta kuma a xidlodlo xa kungangamela lexi xi nga guhaliko. 2 Tim. 4:8; Maheb. 13:20; Jak. 1:12

⁵ Hizalezo na nwinawu vaswa, ingisani a masingalakati. Ina, nwentlhe ti boheni hi kutikoramisa, mu tirelana; hakuva Nungungulu wa ala a vamatshanza, kanilezi i nyika tipswalo ka lava va ti koramisako.

⁶ Hikwalaho ti koramiseni lahasi ka canja ga ntamu wa Nungungulu, kasi yena wa fela ku mu kulisa hi xikhati xi faneleko. Jak. 4:10

⁷ Vekani hehla ka yena kontlhe a kukarateka ka nwina, hakuva wa mu khatalela. Tis. 37:5

⁸ Ti khomeni, mu rinzela; hakuva a nala wa nwina Satani wa fambafamba kota nghala leyi yi dzumako, a hlota loyi a ta nga mu khadamula. Joba 1:7; Lu. 21:34

⁹ Mu kaneteni hi kutiya kukholweni ka nwina, na mu tiva lezaku a kuxaniseka ka kunghahi ku humelela a vamakabye va nwina vontlhe va nga lomu misaveni. Miti. 14:22; Jak. 4:7

¹⁰ A Nungungulu wa tipswalo tontlhe, loyi a nga mu vitanela a kungangameleni kakwe ka pinzukelwa ka Kristu, i ta mu mbhelelisa a mu tiyisa, ni ku mu nyika ntamu, anzhako ka kuva mu xanisekile a xikhatanyana. 1 Kor. 1:9; 2 Kor. 4:17; Maheb. 13:21

¹¹ A ntamu a wuve ka yena kala kupinzuka ni kupinzuka. Amen.

¹² Mina nzi tsalile a timhaka leti ti tsongwani ha yena Silvanusi, a nakulori a tsumbekileko hi kuwona ka mina, kasi ku mu khongotela ni ku maha wukustumunyu lezaku a tipswalo ti nene ta Nungungulu hi leti. Yimani muku nde ka tona. 1 Kor. 15:1; 2 Kor. 1:19

¹³ A bandla ga le Babuloni, legi gi hlawulilweko zinwe na nwina, ga mu rungula; na Marku nwananga. Miti. 12:12

¹⁴ Losanani hi kupswopswa ka Liranzo. A kurula a kuve na nwina nwentlhe lava mu nga ka Kristu.