1 Pedro 2 - Tshwa Bible

A ribye gi hanyako.

¹ Hikwalaho tsikani a kubiha kontlhe, ni kukanganyisa kontlhe ni kuxengetela, ni kunavela, ni mahlevo wontihe.

² Lavani a masi ma nene ya moya, khwatsi hi zihlangana za ha belekiwako, kasi ma fela ku kula ha wona mu hanyiswa, Mat. 18:3; 1 Kor. 3:2

³ loku mu ringile mu tiva a kusaseka ka Hosi.

⁴ Tanani ka yena loyi a nga ribye gi hanyako, legi gi alilweko hi vanhu, kanilezi ka Nungungulu gi hlawuleka, gi dzunzeka, Tis. 118:22

⁵ mu akiwa na nwina kota maribye ma hanyako, muva yindlu ya ka moya, kasi muva vapristi va kubasa, a ku nyikela a miphahlelo ya ka moya, yi amukelekako ka Nungungulu hi kota ya Jesu Kristu. Isa. 61:6; Rom. 12:1; Efe. 2:21, 22

⁶ Hakuva a mutsalo wu ngalo: Langutani, nza veka le Zioni a ribye ga magumo, legi gi hlawulilweko, gi dzunzekako; Loyi a kholwako ka gona a nga ta wiswa tingana, Isa. 28:16

⁷ Hikwalaho ga dzunzeka ka nwina lava mu kholwako, kanilezi ka vona lava va nga kholwiko, A ribye legi gi nga aliwa hi vaaki, Gi mahile a: hloko ya magumo. Tis. 118:22; Mat. 21:42; Miti. 4:11

⁸ Kambe: A ribye ga xikhunguvanyiso, ni ribye legi gi ta nga va wisa. Va khunguvanyeka ha gona hakuva a mhaka a va yi ingisi; hakuva va wa yimiselwe lezo. Isa. 8:14; Rom. 9:22

⁹ Kanilezi nwina mu lixaka li hlawulilweko, a vapristi va wuhosi, a tiko gi basileko, a vanhu va lumbako Nungungulu, kasi mu fela a kuba hungu hi mitiro yi rewukisako ya yena loyi a nga mu vitana mu huma munyameni, muta kuwonekeleni kakwe ku hlamalisako; Deut. 10:15; Joh. 17:19; Miti. 26:18

¹⁰ nwina lava a kale mu nga kala mu nga hi tiko, kanilezi makunu mu tiko ga Nungungulu; nwina lava mu nga kala mu nga mahelwangi wuxinji, kanilezi makunu mu mahelwe wuxinji. Hos. 2:23; Rom. 9:25

Tirani kota malanza ya Nungungulu.

¹¹ Varanzekako, nza mu khongotela kota lezi mu nga valuveli ni vaenzi, lezaku mu tsika a kumbilukela ka nyama, loku ku lwako ni muhefemulo;

¹² mu hi ni mahanyela ma nene xikari ka vamatiko, lezaku lezi va mu hlevako ha zona, aku khwatsi mu vamahi va kubiha, va fela ku dumisa Nungungulu ha zona hi siku legi a ta nga va enzela, hi kota ya mitiro ya nwina yo saseka leyi va yi wonileko. Mat. 5:16; Fil. 2:15

¹³ Ingisani milayo yontlhe ya vanhu hi kota ya Hosi; hambu ku hi Kesari, loyi a nga hosi ya hombe, Mat. 22:21; Rom. 13:1

¹⁴ kutani vamwamangulu lava va rumilweko hi yena, kasi ku tsayisa lava va mahako kubiha, ni ku dzunza lava va mahako zinene. Rom. 13:3, 4

¹⁵ Hakuva hi kona a kuranza ka Nungungulu, lezaku hi ku maha leʼzi nene mu miyeta a kuwulawula ka hava ka lava va nga tiviko nchumu.

¹⁶ Nwina mu tlhatlhekile, kanilezi ngha kutlhatlheka ka nwina ku nga mahi a xifenengelo xa mitiro ya kubiha, kanilezi mahani malanza ya Nungungulu.

¹⁷ Dzunzani vanhu vontlhe, mu ranza vamakabye; chavani Nungungulu, mu dzunza hosi ya tiko.

¹⁸ Zitiri, ingisani venyi va nwina hi xichawo xontlhe; na mu nga ingisi lava vo saseka ni va va nene ntsena, kanilezi ni lava vo biha.

¹⁹ Hakuva zi nene loku munhu hi kota yo mu tiva Nungungulu a timisela zixaniso hambu loku a xaniswa mahala.

²⁰ Hakuva wudzunzo muni loku mu timisela laha mu biwako hi kota ya kugoha ke? Kanilezi loku mu mahile kusaseka, zonake mu xaniseka hi kutimisela, lezi za dzunzeka ka Nungungulu.

²¹ Hakuva hizalezo mu nga vitanelwa zona; hakuva na Kristu i lo xaniseka hi kota ya nwina, a mu siyela a xikombiso, kasi mu fela ku lanzela a nkonzo wakwe. Mat. 16:24; Joh. 13:11

²² Yena a nga onhangi, ni kukanganyisa a ku kumiwangi nonwini wakwe; Isa. 53:9; Lu. 23:41

²³ laha a nga rukatelwa a nga rukatelangiwo; laha a nga xaniseka a nga dzuxangi, kanilezi i lo yisa mhaka yakwe ka loyi a lamulako hi nongameto. Mat. 27:39; Lu. 23:46; Joh. 8:48

²⁴ Hi yena a nga rwala zionho za hina mirini wakwe laha xihambanweni, lezaku hina na hi file hi tlhelo ga zionho, hi fela ku hanya kululameni. Nwina mu hanyisilwe hi tirimbiri takwe. Isa. 53:4-6, 11; Rom. 6:11

²⁵ Hakuva mu wa pengile khwatsi hi tiyivu ti lahlekileko; kanilezi makunu mu tlhelele ka Murisi ni Muhlayisi wa mihefemulo ya nwina. Ezek. 34:6; Joh. 10:11, 14, 16