Efeso 1 - Testamenta Áre 1983 (Toaripi PNG)

¹ Paulo, Keriso Iesu ve aposetolo, Ualare sa araro haikaea ovōpe lea vei, arave karoro meha; Ualare ve karu Efeso voa, Keriso Iesu la sukaererea roroaita lea karu veia:

² Ualare ereitave Oa aea Papuvita Iesu Keriso ita sa haiforoe leita meru aea tairu ita la ero miarai peava.

Ero lei makuri leita otiharo

³ Ualare, ereitave Papuvita Iesu Keriso ve Oa la maeatia. Are Keriso voa Arahoha ve kauri voa siseita etau lareva foromai la maravi, ereitaro lei lareva lei la roroa.

⁴ Mearovaeka la pisosi auke leipe soa ve omopa voa, Ualare sa Keriso voa ereitaro haikaea maravōpe, ereita areve soso voa safu karu aeata kaiae auke karu lei roroai vei. Areve haikakare vei,

⁵ Ualare areve haiiri evera kekese leipe, ereitaro lei Iesu Keriso voa areve atutemori leiti vei, areve haikaeaita haiiri kofa ve eite lōfeare.

⁶ Ereita Ualare la maeatia ipi areve maeaforoe ve sosorusosoru leita meru, are areve haikakare Atute voa ereitaro au miaraita lea meru veia.

⁷ Ipi Keriso ve sisapōpe ovo sa ereitaro paraea, ereitave kaiae la felaukea mutapaita reha, Ualare ve maeaforoe ve meru rovaeka kofa vei.

⁸ Are haiore ita aea haisukafori leita mai foromai ita lea meru la soa seseōvai auke ita ereitaro miarōpe.

⁹ Are areve murufa haikaeaita haiiri la ereitaro lei ore leipe, are evera haikaeōpe lea haiiri la Keriso voa lei kekese leiti vei.

¹⁰ Lea haiiri meha, soa kofa foreraita lea mea etau foromai, kauri etau aea mearovaeka etau ita la Keriso harofave Vita farakeka ve ora voa kokoruka aiperovai veia.

¹¹ Etau foromai la Ualare sa lei vovea usoso areve haikaeaita lea haiiri feare; aea are ereitaro haikaea ovōpe ereita Keriso voa Ualare ve karu kofa leiti vei, usoso are sa oarehōva soa voa kekese leipe lea haiiri feare.

¹² Lea vei ela Keriso la everori sukaererea tai roroaiape karu, Ualare ve sosorusosoru la maeati roi.

¹³ E ta Ualare ve karu leipe, e okofa ve o, ero lei makuri leita lea Ovoro Lareva la mapi sukaerereōpe lea mea, Ualare areve otoare ve peise, areve Safu Arahoha ero miarōpe reha.

¹⁴ Lea Arahoha are Ualare sa areve karu la miarai vei otoare ōpe etau ve toare firu. Arero miarōpe ipi areve karu foromai la paparaea ata totamaravai vei, ere areve sosorusosoru la maeatita karu leiti vei.

Paulo ve loki o

¹⁵ Lea vei e sa Papuvita Iesu la sukaerereaita, aea e sa Ualare ve karu foromai la haikakare araita lea fari la mapōpe soa itiiti faitora,

¹⁶ ara e vei Ualare la maeati poitapai sore. Ara Ualare la loki leita soasoa voa eve rare la ō vovea,

¹⁷ ereitave Papuvita Iesu Keriso ve Ualare, sosorusosoru ita Oa sa ero lei haiovoro leita aea Ualare la muiaita Arahoha la ero miōri, e arero malasa kofa leiti veia.

¹⁸ Arave loki o ta meha, eve haiiri ve ofae ovava lei, are ero haikaea lei forerai vei isaita lea soa la taita ore lei, aea are areve karu la otoare arita lea pisoso ve sosorusosoru leafeare, lea ta ore leiti vei.

¹⁹ E mea ta ore leitia, areve siahu rovaeka aeata rofo rovaekapo ita leafeare sa ereita arero sukaerereaita karu voa tivi toara vovea.

²⁰ Lea siahu are Keriso voa muiōpe, are arero opai voa moravi, arero areve mai toare itai kauri voa lei avōpe lea soa voa.

²¹ Keriso lōvoa lei harofave Vita kofa lei, kauri ve harofave karu aea siahu karu aea papukoru aea lohio karu foromai ve arori kofa voa lei laipea; areve rare ta rare foromai ve arori kofa voa, mea makuri ve soa voa aea aite makuri ve soa voa ta reha.

²² Ualare etau foromai la Keriso ve mora posa ora voa vipi roroka lei, aea arero lei are etau foromai ve harofave Vita ekalesia vei leiti veia.

²³ Ekalesia Keriso ve maea, otioti foromai voa etau foromai la lei kekese lei meita lea Vita, aea lea ekalesia foromai ta arero lei kekese leititore.