སྐྱོ་གླུ 1 - Tibetan Old Testament 2011

ཡེ་རུ་ཤ་ལེམ་གྱི་ཆེད་དུ་སྨྲེ་ངག་འདོན་པ།

¹ དེ་སྔ་མི་ཚོགས་ལྡན་པའི་ཡེ་རུ་ཤ་ལེམ་དེ། ད་ནི་ཡོངས་སུ་སྟོངས་པར་འགྱུར། དེ་སྔ་འཛམ་གླིང་ཀུན་གྱི་བཀུར་བའི་གྲོང་ཁྱེར་དེ། ད་ནི་བཟའ་མི་ཤི་བའི་མོ་ཧྲིང་མ་དང་མཚུངས། དེ་སྔ་གྲོང་ཁྱེར་ཀུན་ལས་མངའ་ཐང་ཆེ་བ་དེ། ད་ལྟ་གཞན་གྱི་མངའ་འོག་བྲན་འཁོལ་གནས་སུ་འགྱུར།

² མོ་ནི་མཚན་གང་ངུ་ཞིང་མིག་ཆུ་འགྲམ་པར་འཛག་བཞིན་འདུག། མོ་ལ་སེམས་གསོ་གཏོང་མཁན་མཛའ་གྲོགས་གཅིག་ཀྱང་མེད། མཛའ་གྲོགས་ཀུན་གྱིས་མོ་ལ་སླུས་ཏེ་ངོ་རྒོལ་གྱིས།

³ ཡ་ཧུ་དཱ་ཡི་མི་རྣམས་ཐམས་ཅད་བྲན་དུ་འཁོད། དེ་ཚོ་རང་གི་ཡུལ་ནས་བཙན་འཁྲིད་ཀྱིས། གཞན་གྱི་ཡུལ་དུ་གནས་སྡོད་བྱེད་དགོས་ཏེ། རང་བདག་ཡིན་པའི་ཡུལ་ཞིག་དེ་ཚོར་མེད། དེ་ཚོ་དགྲ་བོས་ཡོངས་སུ་མཐའ་བསྐོར་ཏེ། བྲོས་ནས་ཐར་བའི་ལམ་ཞིག་ཅིག་ཀྱང་མེད།

⁴ དམ་པའི་དུས་ཆེན་ཁག་གི་ཉིན་མོ་རྣམས་ལ། མཆོད་ཁང་ནང་དུ་མཆོད་འབུལ་བྱེད་པར་ཡོང་མཁན་མེད། ཡེ་རུ་ཤ་ལེམ་འགྲོ་བའི་ལམ་དུ་མྱ་ངན་འདུག། སྔར་གྱི་ན་ཆུང་མགུར་མ་ལེན་མཁན་རྣམས། ད་ལྟ་དཀའ་སྡུག་འཚོ་བ་དྲག་པོར་ཚུད། བླ་མ་རྣམས་ཀྱང་ཤུགས་ནར་འདོན་པ་དང་། གྲོང་གི་གཞུང་སྒོ་རྣམས་ཡོངས་སུ་སྟོངས། ཛི་ཡོན་དཀའ་འཚེ་བཟོད་མེད་ནང་དུ་ཚུད།

⁵ མོ་ཡི་དགྲ་བོའི་བསམ་དོན་འགྲུབ་པས་ན། མོ་ནི་དེ་ཚོའི་དབང་དུ་སྒྱུར་པ་ཡིན། མོ་ཡིས་བྱས་པའི་ཉེས་སྡིག་མང་པོའི་རྐྱེན། གཙོ་བོ་དཀོན་མཆོག་གིས་མོ་ལ་དཀའ་འཚེ་མྱོང་དུ་གཅུག། མོ་ཡི་བུ་ཕྲུག་རྣམས་འཛིན་བཟུང་བྱས་ཏེ་འཁྲིད་པར་བྱས།

⁶ ཡེ་རུ་ཤ་ལེམ་གྱི་ནི་གཟི་བརྗིད་དེ། སྔར་གྱི་ལོ་རྒྱུས་རྙིང་པ་ཞིག་ཏུ་འགྱུར། མོ་ཡི་འགོ་དཔོན་རྣམས་ལྟོགས་ནས་ལུས་སྟོབས་ཉམས་པའི་ཤ་བ་དང་འདྲ། རྔོན་པའི་མདུན་ནས་བྲོས་པའི་རི་དྭགས་བཞིན། ལུས་སྟོབས་ཉམས་པའི་སེམས་ཅན་ཞིག་དང་མཚུངས།

⁷ སྟོངས་ཤིང་འཇིགས་པའི་ཡེ་རུ་ཤ་ལེམ་གྱིས། སྔར་གྱི་གཟི་བརྗིད་རྙིང་པར་དྲན་གསོ་བྱས། རང་ཉིད་དགྲ་བོའི་ལག་ཏུ་འཐེབ་པའི་དུས། མོ་ལ་སྐྱབས་གྲོགས་བྱེད་མཁན་སུའང་མེད། མོ་ལ་དབང་སྒྱུར་བྱེད་མཁན་དགྲ་བོ་ཚོས། མོ་རང་ཉམ་རྒུད་ཕྱིན་པར་འཕྱ་སྨད་བྱས།

⁸ མོ་ཡི་མིང་དང་སྙན་གྲགས་ཀུན་ཡལ་ཏེ། གཅེར་བུར་ཆགས་ཤིང་ངོ་ཚའི་གནས་སུ་འགྱུར། མོས་ཤུགས་ནར་འདོན་པ་དང་། རང་གི་ངོ་གདོང་ངོ་ཚའི་རྐྱེན་གྱིས་བཀབ་པར་བྱས། སྡིག་པ་ཉེན་འཚབ་ཆེ་བའི་རྐྱེན་གྱིས་ནི། ཡེ་རུ་ཤ་ལེམ་གྲིབ་བཙོག་ལྡན་པར་འགྱུར།

⁹ མོ་ཡི་གྲིབ་བཙོག་ཡོངས་སུ་མངོན་ནའང་། མོ་ཡིས་རང་གི་སྐྱལ་བར་རྩིས་མེད་སྣང་ཆུང་བྱས། མོ་ལ་ཉམ་རྒུད་ཆེན་པོ་བྱུང་ནའང་། སུས་ཀྱང་མོ་ལ་སེམས་གསོ་བྱེད་མི་ཐུབ། མོ་ཡི་དགྲ་བོས་རྒྱལ་ཁ་ཐོབ་པས་ན། མོས་ནི་ངུ་ཞིང་གཙོ་བོ་དཀོན་མཆོག་ལ་ཐུགས་རྗེ་ཞུས།

¹⁰ དགྲ་བོས་མོ་ཡི་རྒྱུ་ནོར་ཡོངས་སུ་བཅོམ། དགྲ་རྣམས་དེ་ཚོ་དམ་པའི་མཆོད་ཁང་ནང་། འཛུལ་སྐྱོད་བྱེད་པ་མོ་ཡི་མིག་གིས་མཐོང་། གཙོ་བོ་དཀོན་མཆོག་གིས་ནི་དེར་འཛུལ་བར་ཕྱི་པ་རྣམས་ལ་བཀག་བྱ་གནང་ཡོད་དོ།

¹¹ མོ་ཡི་མི་རྣམས་འཁུན་སྐད་ཤོར་ཞིང་ཁ་ཟས་འཚོལ་བ་དང་། རང་ཉིད་གསོན་པོར་གནས་ཤིང་འཚོ་བའི་ཕྱིར། རྒྱུ་དངོས་རྣམས་དང་ཁ་ཟས་བརྗེ་ལེན་བྱས། གྲོང་ཁྱེར་གྱིས་གཙོ་བོ་དཀོན་མཆོག་ལ། ང་ཚོར་དཀའ་ངལ་དུས་སུ་གཟིགས་པར་མཛོད། ཅེས་པའི་ཞུ་བ་འབུལ་ཞིང་ངུ་འབོད་བྱས།

¹² མོས་ནི་ལམ་དུ་འགྲུལ་མཁན་ཐམས་ཅད་ལ། ང་ལ་ལྟོས་ཤིག། ང་ཡི་དཀའ་འཚེ་བཞིན་དུ་སུ་ལའང་མེད། དཀའ་འཚེ་དེ་ནི་གཙོ་བོ་དཀོན་མཆོག་གིས། ཉིད་ཀྱི་ཐུགས་ཁྲོའི་ནང་དུ་ང་ལ་གནང་ཞེས་ངུ་འབོད་བྱས།

¹³ ཁོང་གིས་མཐོ་རིས་གནས་ནས་མེ་ཕབ་སྟེ། ང་ཡི་ལུས་གཟུགས་ནང་དུ་སྲེགས་པར་བྱས། ཁོང་གིས་ང་ལ་རྙིད་ནང་ཚུད་པར་མཛད། ས་ཁར་ང་ལ་ཁོང་གིས་སྐྱུར་བར་མཛད། ཁོང་གིས་ང་ལ་ཡོངས་སུ་སྤངས་མཛད་དེ། མུ་མཐུད་དཀའ་ངལ་ནང་དུ་ཚུད་པར་མཛད།

¹⁴ ང་ཡི་སྡིག་པར་ཁོང་གིས་དྲན་གསོས་ཀྱིས། དེ་དག་ས་ཕྱོགས་གཅིག་ཏུ་བསྡམས་མཛད་དེ། ང་ཡི་མཇིང་པར་གཉའ་ཤིང་བཞིན་དུ་བཀལ། དེ་ཡི་འཁལ་ལྗིད་ཆེན་པོས་རང་སྟོབས་ཉམས། གཙོ་བོས་ང་ལ་དགྲ་བོའི་ལག་ཏུ་གནང་། ཕར་རྒོལ་བྱེད་ཕྱིར་ང་ནི་ཐབས་བྲལ་ལོ།

¹⁵ གཙོ་བོས་ང་ཡི་དཔའ་བོར་འཕྱ་སྨད་མཛད། ང་ཡི་དམག་མི་གཞོན་པ་བསད་པའི་ཕྱིར། ཁོང་གིས་དམག་མིའི་སྤུང་ཚོགས་བཏང་བར་མཛད། བཙིར་གཞོང་ནང་དུ་གུན་འབྲུམ་བཙིར་བ་ལྟར། ང་ཡི་འབངས་ལ་ཁོང་གིས་དེ་བཞིན་བཙིར།

¹⁶ དེ་ཡི་རྐྱེན་གྱིས་ང་ཡི་མིག་ནི་མཆི་མས་གང་། སུས་ཀྱང་ང་ལ་སེམས་གསོ་བྱེད་མི་ཐུབ། སུས་ཀྱང་ང་ལ་སེམས་ཤུགས་འབྱིན་མི་ཐུབ། དགྲ་བོས་ང་ལ་ཕམ་པར་བྱས་བཅུག་པས། ང་ཡི་མི་འབངས་དབུལ་ཞིང་འཕོང་པར་བྱས།

¹⁷ མགོན་སྐྱབས་ཞུ་ཕྱིར་ང་ཡིས་ལག་གཉིས་བརྐྱངས། ང་ལ་སྐྱབས་གྲོགས་བྱེད་མཁན་སུའང་མེད། གཙོ་བོ་དཀོན་མཆོག་གིས་ས་ཕྱོགས་ཀུན་ནས་དགྲ་རྣམས་བཀོང་། དེ་ཚོས་ང་ལ་གྲིབ་བཅོག་ངན་པ་བཞིན་དུ་བྱས།

¹⁸ འོན་ཀྱང་གཙོ་བོ་དཀོན་མཆོག་ཉིད་ནི་ཐུགས་དྲང་ལགས། ངས་ནི་ཁོང་ལ་རྩིས་མེད་ཞུས་ཡོད། ས་གཞིའི་མི་རིགས་ཚང་མ་ཚུར་ཉོན་དང་། ང་ཡི་དཀའ་ངལ་ནང་ང་ལ་ལྟོས་ཤིག་དང་། ཡུལ་ནས་ང་ཡི་གཞོན་ནུ་ཕོ་མོ་རྣམས། བཙོན་བཟུང་བྱས་ནས་གཞན་གྱི་ཡུལ་དུ་འཁྲིད།

¹⁹ ང་ཡིས་མཐུན་གྲོགས་རྣམས་ལ་སྐྱབས་ཞུས་ཀྱང་། དེ་ཚོས་ང་ལ་སྐྱབས་གྲོགས་མ་བྱས་སོ། བླ་མ་རྣམས་དང་ཡུལ་གྱི་འགོ་དཔོན་རྣམས། གསོན་པོར་གནས་ཕྱིར་ཁ་ཟས་འཚོལ་བའི་དུས། གྲོང་གི་གཞུང་ལམ་ཁག་ཏུ་ཤི་བར་བྱས།

²⁰ གཙོ་བོ་དཀོན་མཆོག་ང་ལ་གཟིགས་པར་མཛོད། ང་ཡི་སེམས་ཀྱི་ནད་ཟུག་དེ་ལ་གཟིགས། སྡིག་པའི་རྐྱེན་གྱིས་ང་ནི་འགྱོད་སེམས་སྐྱེས། སྲང་ལམ་ཁག་ཏུ་སྲོག་གཅོད་འབྱུང་བ་དང་། ཁང་ཁྱིམ་ནང་དུ་འཆི་བའི་འཇིག་ཉེན་གང་།

²¹ ང་ཡིས་ཤུགས་ནར་འདོན་པའི་སྒྲ་ལ་གསན། ང་ལ་སེམས་གསོ་བྱེད་མཁན་སུའང་མེད། ཁྱེད་ཀྱིས་ངའི་ཁར་དཀའ་འཚེ་བཏང་བས་རྐྱེན། ང་ཡི་དགྲ་བོ་རྣམས་ནི་དགའ་སྣང་ཆེན་པོ་བྱས། ཞལ་བཞེས་གནང་བའི་ཉིན་ཞག་དེ་བསྣམས་ཕེབས་རོགས་གནང། ང་ཡིས་དཀའ་སྡུག་མྱོང་བ་བཞིན། ང་ཡི་དགྲ་བོས་དེ་བཞིན་མྱོང་བར་ཤོག།

²² དེ་ཚོས་བྱས་པའི་ལས་ངན་དག་གི་ཕྱིར། ཁྱེད་ཀྱིས་དེ་ཚོར་སྐྱོན་བརྗོད་གནང་བར་མཛོད། ང་ལ་སྡིག་པའི་ཉེས་ཆད་གནང་བ་བཞིན། དེ་ཚོར་དེ་བཞིན་ཆད་པ་གནང་བར་མཛོད། ང་ནི་དཀའ་སྡུག་རྐྱེན་གྱིས་ཤུགས་ནར་འདོན། ང་ནི་བློ་སེམས་སྐྱོ་བའི་ནང་ཚུད་དོ༎