ཡོ་ཨེལ 1 - Tibetan Old Testament 2011

¹ པེ་ཐུ་ཨེལ་གྱི་བུ་ཡོ་ཨེལ་བརྒྱུད་ནས་ཕེབས་པའི་གཙོ་བོ་དཀོན་མཆོག་གི་གསུང་འཕྲིན།

མི་དམངས་རྣམས་སྟོན་ཐོག་མེད་པར་འགྲོ་བའི་སྐོར་ལ་མྱ་ངན་བྱེད་པ།

² ཀྱེ་རྒན་པོ་རྣམས་དང་ཡ་ཧུ་དཱའི་ཡུལ་མི་ཐམས་ཅད་ཚུར་ཉོན་དང་། ཁྱོད་ཚོའི་དུས་སམ་ཁྱོད་ཚོའི་མེས་པོ་རྣམས་ཀྱི་དུས་སུ་གནས་ཚུལ་འདི་འདྲ་བྱུང་ཡོད་པ་ཡིན་ནམ།

³ ཁྱོད་ཚོའི་རང་གི་ཕྲུ་གུ་རྣམས་དང་། དེ་ཚོའི་རང་གི་ཕྲུ་གུ་རྣམས་དང་། དེ་བཞིན་ཕྲུ་གུ་དེ་ཚོའི་རང་གི་ཕྲུ་གུ་རྣམས་ལ་རིམ་བཞིན་བརྒྱུད་དེ་ལྟར་ཤོད་ཅིག

⁴ སྟོན་ཐོག་གི་སྒང་ལ་ཆ་ག་འབུའི་ཚོགས་ཤིག་འབབ་སྟེ། ཆ་ག་འབུའི་ཚོགས་གཅིག་པུ་དེས་ཟ་འཕྲོ་ལུས་པ་དེ། ཚོགས་གཞན་གྱིས་ཟས་ནས་རྫོགས་པར་བྱེད་དོ།

⁵ ཀྱེ། ར་བཟི་མཁན་རྣམས་གཉིད་ནས་སད་དེ་ངུ་ཤིག། ཀྱེ་རྒུན་ཆང་འཐུང་མཁན་རྣམས་སྨྲེ་སྔགས་འདོན་ཞིག གང་ལ་ཟེར་ན། རྒུན་ཆང་གསར་པ་བཟོ་བའི་རྒུན་འབྲུམ་ཚང་མ་འཇིག་པར་བྱེད་དོ།

⁶ དཔུང་སྟོབས་ཆེ་ལ་གྲངས་ལས་འདས་པའི་ཆ་ག་འབུའི་ཚོགས་ཆེན་པོ་ཞིག་ངའི་ཡུལ་ལ་དཔུང་རྒོལ་བྱེད་ཕྱིར་འོངས་ཤིང་། དེ་ཚོའི་སོ་ནི་སེང་གེའི་མཆེ་བ་ལྟར་དང་། སེང་གེ་མོའི་འགྲམ་སོ་དང་མཚུངས་ཏེ།

⁷ དེ་ཚོས་ངའི་རྒུན་ཚལ་རྣམས་སྟོངས་སུ་བཅུག་པ་མ་ཟད་ངའི་སེ་ཡབ་ཀྱི་ཤིང་རྣམས་བཅག་སྟེ། ཤིང་གི་པགས་པ་ཚང་མ་བཤུས་ཤིང་། ཡལ་ག་རྣམས་དཀར་པོ་བཟོས་སོ།

⁸ ཇི་ལྟར་བུ་མོ་ན་ཆུང་མས་རང་ལ་ཆང་ས་རྒྱབ་མཁན་མི་ཤི་ནས་རྩ་རས་གྱོན་ཞིང་མྱ་ངན་བྱེད་པ་བཞིན། ཁྱོད་ཚོས་ཀྱང་དེ་བཞིན་ངུ་ཞིག།

⁹ གཙོ་བོ་དཀོན་མཆོག་གི་མཆོད་ཁང་དུ་འབུལ་ཕྱིར་འབྲུ་དང་རྒུན་ཆང་སོགས་མེད་པས། གཙོ་བོ་དཀོན་མཆོག་གི་དྲུང་དུ་ཞབས་ཏོག་ཞུ་མཁན་བླ་མ་རྣམས་མྱ་ངན་བྱེད་དོ།

¹⁰ སྟོན་ཐོག་འཇིག་ཅིང་། རྒུན་ཆང་གསར་པ་དང་འབྲུ་དང་སྐྱུར་སྣུམ་ཚང་མ་རྫོགས་ཆར་བ་དང་། ས་ཞིང་ཡོངས་སུ་སྟོངས་ཤིང་སྨྲེ་སྔགས་འདོན་པར་བྱེད་དོ།

¹¹ ཀྱེ་སོ་ནམ་པ་རྣམས། ཁྱོད་ཚོ་མྱ་ངན་བྱོས་ཤིག། ཀྱེ་རྒུན་ཚལ་མཁན་རྣམས་གྲོ་དང་ནས་ཀྱི་ཕྱིར་ངུ་ཞིག གང་ལ་ཟེར་ན། སྟོན་ཐོག་ཚང་མ་འཇིག་པས་ཕྱིར་རོ།

¹² རྒུན་ཤིང་སྐམས་ཤིང་སེ་ཡབ་ཤིང་ནི་རྙིད་པ་དང་། དེ་བཞིན་སེ་འབྲུ་དང་ཁ་ཟུར་དང་། ཀུ་ཤུའི་ཤིང་ལ་སོགས་པའི་ཐང་གི་སྐྱེ་ཤིང་ཚང་མ་ཡང་རྙིད་དེ་སྐམས་པས། མིའི་དགའ་སྤྲོ་ཡོངས་སུ་རླག་པར་བྱེད་དོ།

¹³ དེ་བས་ན་ཀྱེ་བླ་མ་རྣམས། རྩ་རས་གྱོན་ནས་མྱ་ངན་བྱོས་ཤིག། ཀྱེ་མཆོད་ཁྲིའི་ཞབས་ཏོག་པ་རྣམས། གཙོ་བོ་དཀོན་མཆོག་གི་མཆོད་ཁང་དུ་སྟོན་ཐོག་དང་རྒུན་ཆང་གི་མཆོད་འབུལ་ཆད་ཡོད་པས་སྨྲེ་སྔགས་འདོན་ཞིག ཀྱེ་དཀོན་མཆོག་གི་ཞབས་ཏོག་པ་རྣམས་མཆོད་ཁང་དུ་ཕྱིན་ནས་རྩ་རས་གྱོན་སྟེ་མཚན་གང་མྱ་ངན་བྱས་ནས་སྡོད་ཅིག གང་ལ་ཟེར་ན། ཁྱོད་ཚོའི་དཀོན་ཆོག་ལ་འབུལ་རྒྱུའི་འབྲུ་དང་རྒུན་ཆང་གི་མཆོད་པ་ཆད་ཡོད་པའི་ཕྱིར་རོ།

¹⁴ དམ་པའི་སྨྱུང་གནས་སྲུང་ཕྱིར་ཁྱབ་བསྒྲགས་བྱོས་ཤིག དམ་པའི་ཚོགས་འདུ་ཆེན་པོ་བཀོང་ནས། རྒན་པོ་རྣམས་དང་ཡུལ་མི་ཐམས་ཅད་ཁྱོད་ཚོའི་དཀོན་མཆོག་གཙོ་བོ་དཀོན་མཆོག་གི་མཆོད་ཁང་དུ་བསྡུས་ནས། ཁོང་ལ་སྐད་འབོད་བྱོས་ཤིག།

¹⁵ གཙོ་བོ་དཀོན་མཆོག་གི་ཉིན་མོ་དེ་ནི་ཉེ་བར་སླེབས་པས། ཉིན་མོ་དེའི་དོན་དུ་ཀྱེ་མ་ཧུད། གང་ལ་ཟེར་ན། ཉིན་མོ་དེ་ནི་ཀུན་དབང་གི་ཕྱོགས་ནས་འཇིག་པའི་ཉེན་ཁ་ཆེན་པོའི་ཚུལ་དུ་འོངས་བར་ངེས་སོ།

¹⁶ ང་ཚོའི་མིག་གི་མཐོང་སར་ཁ་ཟས་རྣམས་འཕྲོ་རླག་ཕྱིན་པ་མ་ཡིན་ནམ། དཀོན་མཆོག་གི་མཆོད་ཁང་ནས་བདེ་སྐྱིད་དང་དགའ་སྤྲོ་མེད་པར་ཕྱིན་པ་མ་ཡིན་ནམ།

¹⁷ ས་གཞིའི་ས་སྐམ་པོའི་འོག་ཏུ་ས་བོན་རྣམས་སྐམ་པས། འབྲུའི་བང་མཛོད་རྣམས་ཡོངས་སུ་སྟོངས་སོ། གང་ལ་ཟེར་ན། འབྲུ་རྣམས་མ་སྐྱེས་སོ།

¹⁸ དུད་འགྲོ་རྣམས་ལྟོགས་ནས་སྐད་འབོད་ཇི་ལྟར་འདོན། རྩ་ཁ་མེད་པའི་རྐྱེན་གྱིས་གླང་དང་ར་ལུག་ལ་སོགས་པའི་སྒོ་ཕྱུགས་ཚང་མ་དཀའ་ངལ་ནང་དུ་ཚུད་དོ།

¹⁹ ཀྱེ་གཙོ་བོ་དཀོན་མཆོག། ངས་ཁྱེད་ཀྱི་སྤྱན་སྔར་ཞུ་བ་འབུལ་གྱི་ཡོད། གང་ལ་ཟེར་ན། འབྲོག་སྟོང་གི་རྩ་ཁ་ཚང་མ་མེས་ཡོངས་སུ་འཚིག་སྟེ། རྩི་ཤིང་ཐམས་ཅད་མེ་ལྕེས་འབར་བར་བྱས་སོ།

²⁰ ནགས་ཀྱི་གཅན་གཟན་རྣམས་ཀྱིས་ཀྱང་ཁྱེད་ལ་ཞུ་བ་འབུལ་ལོ། གང་ལ་ཟེར་ན། གྲོག་ཆུ་རྣམས་སྐམས་ཤིང་། འབྲོག་སྟོང་ཀྱི་རྩ་ཁ་ཐམས་ཅད་མེས་ཡོངས་སུ་འཚིག་པར་བྱས་པས་སོ༎