སྔོན་རབས་གཉིས་པ། 1 - Tibetan Old Testament 2011

རྒྱལ་པོ་སོ་ལོ་མོན་གྱིས་ཤེས་རབ་ཀྱི་ཆེད་དུ་གསོལ་འདེབས་ཞུས་པ།

¹ རྒྱལ་པོ་དཱ་བིད་ཀྱི་སྲས་སོ་ལོ་མོན་གྱིས་ཨིསི་རཱཨེལ་རྒྱལ་ཁབ་ཀྱི་རྒྱལ་སྲིད་བརྟན་པོར་བཟུང་ནས། གཙོ་བོ་དཀོན་མཆོག་ཁོང་གི་དཀོན་མཆོག་གིས་ཁོང་ལ་བྱིན་རླབས་གནང་བ་དང་ཁོང་ཧ་ཅང་མཐུ་སྟོབས་ཅན་བཟོས་གནང་ངོ་།

² རྒྱལ་པོ་སོ་ལོ་མོན་གྱིས་མི་ ༡,༠༠༠ ཚོའི་དཔོན་པོ་དང་མི་ ༡༠༠ དཔོན་པོ་ཡོངས་དང་གཞུང་གི་ལས་བྱེད་པ་ཡོངས་དང་ཁྱིམ་ཚང་གི་འགོ་འཛིན་ཚང་མ་དང་གཞན་མི་མང་རྣམས་ལ་སྐད་བཏང་གནང་ངོ།

³ དེ་ཚོ་ཚང་མ་མཆོད་པ་འབུལ་སའི་གནས་གྷི་བི་ཨོན་དུ་འགྲོ་དགོས་བའི་བཀའ་གནང་བ་དང་དེ་ཚོ་དེར་སོང་ངོ། གང་ལ་ཟེར་ན། གཙོ་བོ་དཀོན་མཆོག་གནས་པའི་དབུ་གུར་དམ་པ་དེར་ཡོད་དོ། དེ་ནི་གཙོ་བོ་དཀོན་མཆོག་གི་ཞབས་ཕྱི་མོ་ཤེས་མི་མེད་ལུང་སྟོང་དུ་བཟོས་པ་ཡིན་ནོ།

⁴ (དམ་བཅའི་སྒྲོམ་དེ་རྒྱལ་པོ་དཱ་བིད་ཀྱིས་ཐོག་མར་ཀིར་ཡད་ཡ་རིམ་ནས་གདན་དྲངས་སྐབས་ཡེ་རུ་ཤ་ལེམ་དུ་ཕུབ་ཡོད་པའི་གུར་ནང་བཞག་ཡོད་དོ།)

⁵ ཧུར་གྱི་ཚ་བོ་ཨུ་རིའི་བུ་བྷེ་ཛ་ལེལ་གྱི་བཟོས་པའི་ལིིའི་མཆོད་ཁྲི་དེ་གྷི་བི་ཨོན་དུ་གཙོ་བོ་དཀོན་མཆོག་གནས་པའི་དབུ་གུར་དམ་པ་དེའི་མདུན་དུ་ཡོད་དོ། རྒྱལ་པོ་སོ་ལོ་མོན་དང་མི་མང་ཡོངས་ནས་གཙོ་བོ་དཀོན་མཆོག་ལ་དེར་མཆོད་དོ།

⁶ དབུ་གུར་དམ་པའི་མདུན་དུ་རྒྱལ་པོས་ལིའི་མཆོད་ཁྲིའི་སྟེང་དམར་མཆོད་རྣམས་ཕུལ་ནས་གཙོ་བོ་དཀོན་མཆོག་ལ་མཆོད་འབུལ་བྱས་སོ། ཁོང་གིས་སེམས་ཅན་ ༡,༠༠༠ བསད་ནས་མཆོད་ཁྲིད་སྟེང་དུ་སྦྱིན་སྲེག་གི་དམར་མཆོད་རྣམས་འཕུལ་ལོ།

⁷ མཚན་མོ་དེར་སོ་ལོ་མོན་ལ་དཀོན་མཆོག་གི་ཞལ་གཟིགས་བྱུང་ནས། ཁྱོད་ལ་ཅི་དགོས་ཤེས་བཀའ་འདྲི་གནང་བས།

⁸ སོ་ལོ་མོན་གྱིས། ཁྱེད་ཀྱིས་རྟག་ཏུ་ངའི་ཡབ་དཱ་བིད་ལ་ཐུགས་བརྩེ་ཆེན་པོ་གནང་བ་དང་། ང་ཁོང་གི་ཤུལ་འཛིན་དུ་རྒྱལ་པོར་བསྐོས་གནང་ངོ་།

⁹ ཀྱེ་དཀོན་མཆོག་གཙོ་བོ་དཀོན་མཆོག་ཁྱེད་ཀྱིས་ངའི་ཡབ་ལ་གནང་བ་ཞལ་བཞེས་རྣམས་སྒྲུབ་པར་མཛོད་ཅིག ཁྱེད་ཀྱིས་ང་ལ་མི་མང་ཁྱོན་ཆེ་གྲངས་འབོར་རྩིས་མི་ཐུབ་པའི་ཆེད་དུ་རྒྱལ་པོར་བསྐོས་གནང་ཡོད།

¹⁰ དེ་འདྲ་སོང་ཙང་དེ་ཚོའི་ཐོག་རྒྱལ་སྲིད་སྐྱོངས་ཐུབ་པའི་ཤེས་རབ་དང་བློ་གྲོས་གནང་རོགས། དེ་མིན་ངས་ཁྱེད་ཀྱི་མི་མང་རྩ་ཆེ་དེ་ཚོའི་སྟེང་རྒྱལ་སྲིད་ཇི་ལྟར་སྐྱོངས་ཐུབ་བམ་ཞེས་ཞུས་པས།

¹¹ གཙོ་བོ་དཀོན་མཆོག་གིས་སོ་ལོ་མོན་ལ། ཁྱོད་ཀྱིས་ལེགས་པར་འདམས་ཡོད། ཁྱོད་ཀྱིས་རྒྱུ་ནོར་དང་ས་ཞིང་དང་སྙན་གྲགས་དང་ཁྱོད་ཀྱི་དགྲ་བོའི་འཆི་བ་དང་ཁྱོད་རང་གི་ཚེ་རིང་པོ་སློང་བའི་ཚབ་ཏུ་ངས་ཁྱོད་ལ་རྒྱལ་པོར་བསྐོས་པའི་ངའི་མི་མང་ཚོའི་ཐོག་རྒྱལ་སྲིད་སྐྱོངས་བའི་ཆེད་དུ་ཤེས་རབ་དང་བློ་གྲོས་ཞུས་ཡོད་དོ།

¹² ངས་ཁྱོད་ལ་ཤེས་རབ་དང་བློ་གྲོས་སྤྲོད་རྒྱུ་ཡིན། དེའི་ཐོག་ངས་སྔོན་བྱོན་རྒྱལ་པོ་དང་རྗེས་སུ་ཡོང་རྒྱུའི་རྒྱལ་པོ་སུ་ལ་ཡང་མེད་པའི་རྒྱུ་ནོར་དང་གཏེར་དང་སྙན་གྲགས་བཅས་ཁྱོད་ལ་སྤྲོད་རྒྱུ་ཡིན་ཞེས་བཀའ་གནང་ངོ་༎

རྒྱལ་པོ་སོ་ལོ་མོན་གྱི་སྟོབས་དང་རྒྱུ་ནོར།

¹³ དེ་འདྲ་སོང་ཙང་སོ་ལོ་མོན་ནི་གྷི་བི་ཨོན་དུ་གཙོ་བོ་དཀོན་མཆོག་གནས་པའི་དབུ་གུར་དམ་པ་ཡོད་པའི་མཆོད་པ་འབུལ་ཡུལ་དེ་ནས་ཐོན་ཏེ་ཡེ་རུ་ཤ་ལེམ་དུ་ཕྱིར་ཕེབས་སོ། དེར་ཁོང་གིས་ཨིསི་རཱཨེལ་པའི་སྟེང་རྒྱལ་སྲིད་བསྐྱངས་སོ།

¹⁴ ཁོང་གིས་ཤིང་རྟ་འཁོར་ལོ་གྲངས་ ༡,༤༠༠ དང་རྟ་དམག་ ༡༢,༠༠༠ ཡོད་པའི་དམག་དཔུང་བཅས་གོ་སྒྲིགས་གནང་ངོ་། དེ་ཚོ་འགའ་ཤས་ཡེ་རུ་ཤ་ལེམ་དུ་འཇོགས་གནང་བ་དང་དེ་འཕྲོས་རྣམས་གྲོང་ཁྱེར་འདྲ་མིན་ནང་བཞག་གནང་ངོ་།

¹⁵ ཁོང་གི་སྐུ་དུས་སུ་ཡེ་རུ་ཤ་ལེམ་དུ་གསེར་དངུལ་ནི་རྡོ་བཞིན་འབོལ་པོ་དང་། འགྱམ་ཤིང་ནི་ཤིང་སེ་ཡབ་དཀྱུས་མ་ལྟར་འབོལ་པོ་ཡོད་དོ།

¹⁶ རྒྱལ་པོའི་སྐུ་ཚབ་ཚོས་མུསེ་རི་དང་སི་ལི་སི་ཡ་ནས་རྟ་དང་།

¹⁷ ཨི་ཇིབ་ནས་ཤིང་རྟ་འཁོར་ལོ་ཕྱིར་ཚོང་ལ་བཀག་བསྡོམ་བྱེད་དོ། དེ་ཚོས་ཧི་ཏི་པ་དང་སི་རི་ཡ་པའི་རྒྱལ་པོ་ཚོའི་རྟ་དང་ཤིང་རྟ་འཁོར་ལོ་ཚོང་འགྱུར་བྱེད་པ་དང་ཤིང་རྟ་འཁོར་ལོ་གཅིག་ལ་དངུལ་དུམ་བུ་ ༦༠༠ དང་རྟ་གཅིག་ལ་དངུལ་དུམ་བུ་ ༡༥༠ ཚོང་བཞིན་ཡོད་དོ༎